Mizoram Economy chawikan nan Rawtna Ṭhenkhat

Kan ram hi tlang ram a ni a, thawh chhuah vak kan nei lo a, Lo (jhum) neia eizawng kan ni. Sum chang thei thlai kan chin tam loh avangin sum kan lalut tlem a, kan State sum hnar ber chu Central Assistance a ni. Suma chang thei thlai chin kan uar ṭan a, mah se central aṭanga sum kan hmuh hman thiam hi ram hmasawn nan a pawimawh hle.

Mizoram Public Works Department Schedule Rate (PWD, SOR)

Mizoram PWD SOR hmangin Project estimate kan siam ṭhin. Central PWD SOR awm hma se, keini tan Mizoram PWD SOR hman a ngai a, PWD SOR hmanga estimate siam chu a sang lutuk a, a estimate san avangin, a estimate zatvein hna a thawh theih avangin a thawktu tur contractor-in midang hnenah 30% hlep (profit) in a hralh phal phawt a. 2nd contractor-in 3rd person hnenah 20% hlep (profit) in a hralh leh a. Contractor pathumna chuan Vai mistiri a saktir leh emaw a ni ang a. Kalkawng siam pawh chu tiang bawk chu a ni.

Chutiang an tih theih chhan chu PWD SOR a san vang a ni. Sorkar pawisa crore tam tak hnathawh nan ni lo a ral mai mai a, chuvang chuan PWD SOR a rang thei ang berin siam ṭha mai se, contract hna hralh a awm tawh lo ang a, a dik taka hnathawk thei turin engineer-ten hma an la thei tawh ang.

Doctor thiam kan mamawh

Mizoramin doctor thiam tak tak kan neih loh vangin natna serious reng reng Mizorama treatment la loin phai kan pan tir a, cancer veite phei chu kan tidam thei lo. Khawl ṭha tak tak kan nei a, a hmandan kan thiam lo a, state pawn aṭangin medical field zawng zawnga doctor leh technician thiam tak tak la lut ila, Mizoram sum tam tak phai lama luang chhuak ṭhin kan dang thei ang a, medical field-ah hna a tam sawt bawk ang.

Engineer ṭha rawih

Future vision nei engineer ṭha rawih emaw kan engineer neihte training tir emaw (capacity building) tih hi kan hmasawn nan a ṭul. Kan engineer-te an tlin loh chuan construction company ṭha aṭangin consultant ṭha kan ruai tur a ni. Infrastructure ṭha leh Hydro-Electric Project ṭha kan nei ang a. Kan lui zawng zawng hydro-electric project-ah siam ila electricity kan siam tur chu a tam dawn a ni. World Bank leh ADB aṭangte pawhin pawisa kan puk thei ang. Politician vision nei ṭha kan mamawh bawk - tichuan kan changkang sawt mai ang.

Amalgation of school

Tunhnaia Education Department Statistical report tihchhuahah Teacher Pupil Ratio (TPR) chu 1:13 a ni a, All India Teacher Pupil Ratio (TPR) chu 1:26 a ni. Chumi awmzia chu Towns leh Villages tam taka School engemawzat chu School pakhatah chhun khawm (amalgamate) thei tihna a ni. He thil hi Sorkarin zirchiang a, Primary School, Middle school leh High School amalgamate theih zawng zawng amalgamate i la, Teacher Post tam tak a chuang ang a, naupangte Education ṭha kan pe thei ang. Tin, India ram State zawng zawngah three language formula an implement tawh a, chu chu English leh Hindi leh Regional language a ni. Chutiang chu kan tih a hun.

State pawna kan ṭhalaite tan hna hmuh awlsam nan three language formula Matric thleng tal compulsory a ni tur a ni.

Ministerial leh Technical post awmze neia sem

Department ṭhenkhata Ministerial Service-ah post a tam em em a, section pakhatah computer thiam LDC emaw UDC pakhatin hna tam tak a tih theih tawh a, Mizoram Office tam tak chu Staff an tam lutuk a, officer pawh a bang chuang lo a, Secretary hrang hrang pawh a tam, Sorkar sum tihektu an ni. Chuvang chuan sorkar hnathawkte awmze neia sem kual hi sorkar sum renchemna ṭha tak a ni ang.

Grant-in-aid pek dan

Sorkarin lo neitute ṭan­pui­na a pek ṭhin chu a ṭha. Nimahsela, awmze nei loa mi ṭanpui chu sum hekna mai a ni. Rubber Board tihdan chu a ṭha, Rubber ching tak takte hnenah chauh ṭanpuina an pe a. Tin, lo neitu tihphur nan Minimum Support Price (MSP) thlai tin tan siam ila, kan production pawh a ṭha zawk ang.

Natural resources

Lei hnuai hausakna leh siklehsa hi Pathian thilthlawn­pek a ni a, lai chhuak thiam ila chuan kan hausa hle ang. Hydro-Electricity siamchhuak turin kan lui lian zawng zawng hi tuikhuah (dam) siamvek ila, internal water transport bakah sangha khawi nan leh irrigation atan pawh a ṭangkai dawn a ni.

Domestic tourism pawh Source of Income lian tak a ni a, chumi atan chuan Hydro-Electricity Project tan tuikhuah (dam) siam hmang ṭangkai ila, tourist hipna tur Tourist Resort leh tlangchhipah viewing tower-te siam ila. Tourist-te lo thlenna (entry point) a Inner Line Permit (ILP) siamsak dan ṭha ngaihtuah sak bawk ila, kan economy hi a ṭhang hle ang.

Professional Tax lak dan thar

Tuna kan Professional Tax lakdan hi a mak. Peon leh Chief Secretary kan rate a inang vek a, firm (shop/company) te pawh an income zirin category hrang hranga

ṭhen tur a ni. Income Tax ang thoin tax chawi tur tihdanglam a ṭul khawp mai.

Building/ house tax lak tur

Mizoram puma in ding lai zawng zawng category hrang hranga ṭhen tur a ni a, an plinth area zirin chhiah chawi zat tur bituk tur a ni a, Village Council-te khawntir tur a ni. Aizawl Municipal Council (AMC) area chhungah an enkawl ang a, a bang zawng UD&PA in a enkawl ang.

MLPC Act hman mai tur

Zu in miin zu in a sim dawn loh avangin Mizoram pawisa nuai tam tak State pawnah a luang chhuak zel a, zurui buaina siam chu sual a ni. MLPC Act implement ila survival of the fittest theory kan zir ve mai ang. Chu chu kan puitlinna tur a ni.

Kan pawisa state pawna luangral mek kan dang thei ang a, state economy pawh a ṭha lehzual ang.