PAHAL (DBTL) Consumers Scheme

Mipuiin man tlawm zawka eirawngbawlna gas kan lak theih nan PAHAL-Direct Benefits Transfer for LPG (DBTL) Con­sumers Scheme chu sorkar laipuiin June 1, 2013 aṭangin India ram district 291-ah a kalpui ṭan a, harsatna leh thil fel lo hrang hrang chinfel ngaite a awm avangin sorkar laipui chuan scheme chu a ennawn hmasa leh a, siamṭhat ngaite chinfel a nih hnuah nikum November 15 aṭangin India ram district 54-ah kalpui ṭan leh a ni.

He scheme hi India ram pumah January 1 aṭang khan kalpui ṭan a ni bawk. Mizoramah pawh he scheme hi kalpui ṭan niin, hamṭhatna dawng thei turin veng hrang hrangah consumer-te an inziaklut mek.

PAHAL scheme dawng thei tur hian gas consumer card bakah Aadhar card leh bank account neih a ngai a, Aadhar card neilote tan bank account leh gas consumer card kimchang gas agent te hnena thehluh tur a ni.

PAHAL (DBTL) scheme hnuaiah hian consumer-te chu CTC (Cash Transfer Compliant) tih an ni ang a, gas agent hnen aṭangin eirawngbawlna gas a man pangngaiin an lei hnuah an sum sen belh zawng chu sorkarin an bank account-ah a dahsak dawn a ni.

CTC consumer ni lote chu PAHAL (DBTL) kalpui ṭan a nih aṭangin inziaklut turin thla thum chhung hun pek an ni ang a, hemi chhung hian subsidy-a eirawngbawlna gas lak phalsak an la ni ang. Thla thum ral hnuah ngaihhnathiamna hun, Parking Period pek an ni leh ang a, mah se eirawngbawlna gas erawh subsidy-a pek an ni tawh lo ang.

Parking Period chhunga CTC consumer an nih chuan hemi hun chhunga subsidy loa eirawngbawlna gas an lakna atana an sum sen belh zawngte chu an bank account-ah dahsak a ni ang. CTC consumer ni lote chuan CTC consumer an nih hma chuan eirawngbawlna gas-ah subsidy an dawng thei dawn lo a ni.

CTC consumer-te chuan financial year khat chhungin subsidy-in gas bur 12 an la thei dawn a, subsidy-a bank account-a sum lut tur zat erawh gas man a zir a ni dawn a, gas cylinder lakna man hi state tinah a danglam thei a ni.PAHAL (DBTL) scheme-ah hian chhungkaw ṭhen­khatin consumer card pahnih pathum te an nei a, mah se card holder awm tawh lo leh boral tawhte pawh an awm avangin consumer card holder leh bank account holder hming a inmil a ngai bawk si a, harsatna a thlen ta a ni. Bank account leh consumer card holder hming timil tur hian consumer card holder hming thlak a ngai a, hei hi Mizoram office hna kalphung khirh lutukah hian phurrit a tling.

Consumer card holder leh bank account holder hming inmil lo bakah hian chhungkaw

ṭhenkhat black-a gas connection neite tan consumer card neih hmasak phawt loh chuan PAHAL (DBTL) scheme dawng turin inziahluh theih a ni lo bawk.

Black-a gas connec­tion neite tan thuneitute'n con­sumer card siamna hun remchang siam se a duhawm hle. Hetihlai hian chhungkaw pakhat aṭanga consumer card pahnih pathum neite tan pawh card holder an awm tawh lo emaw a nih pawhin kawng remchang ngaihtuahsak se a duhawm hle.