KUM 2015 AṬANG CHUAN... (Part-I)

1. ‘Infrastructure and Contract/ Supply Works’ kan khua leh venga thawkte chu - a estimate, eng tianga thawh tura ruahman nge, a thawh hun turah a thawk zo em tih uluk takin khawtlang mipuiin vil ila. Nasa taka kan ṭangkai pui bakah hna thawh chhiat sawi fo hi a bo tawh ang.

2. Chief Minister leh Minister te, sawrkar pisa a thawk, chhiatni leh ṭhatni, NGO leh pawl ho hmalakna chhuanlama office chuahsan fote hian sim tawh se, ‘file pending’ hi a reh tawh ang.

3. Mipuite chanvo eiruk hi pawlho leh Kohhran chauh ni lo, mimal pawhin do tawh ila, reiloteah ‘Serafim State’ kan siam thei ang.

4. Kan hotute hian kan sawrkar sum dinhmun pachhiatzia leh ‘Sawrkar hmasa kih hnawk' hi sawi mâmna zawngin puhmawh tur zawng fo tawh loin kan harsatna lai sukiang turin thapui thawh se, hma kan sawn thuai ang.

5. Kan political party hruaitute hi hun kal tawh leh thu mu hnu kai thoa inbei inbei tawh loin, “engtin nge kan ram hi kan siam ṭhat theih ang” tih chauh ngaihtuah tawh se.

6. Bible-in, “Sawisel suh u, sawisela in awm loh nan” a ti a, thu belh chian dawl lo lutuk hmanga sawrkar leh party emaw, Kohhran leh NGO te, mimal insawi chhiatna leh diriamna tinrengte hi bansan tawh ang u.

7. Sawrkar phalnain zu zawrh a ni tawh dawn a, eng thilah pawh rethei leh hausa te inang khat pâta hrut rual ni tawh se.

8. Bansan a har viau ni maw, political party tin hotuteah hian kum 1980 hunlai leh a hma lam hun anga min la hruai tum, thudik ziktluak lo leh dawt puarpawlêng sawi hrat la awm nualte hi kan ram ṭhanmawhbâwk an ni. Politician-te rin ngama in awm a ngai ta.

9. Isua ringtu ram hi Vai ram a ang zo ta. Midangte thil tih ṭhat infak sak aia mite thil tih sual kan lo chang rân ṭhin hi sim tawh ang u. Chawimawi tlak chawimawiin sel ngai chu sel ila, siam ṭhat ngai i siam ṭha ho ang u.

10. Transport department leh City Bus Owner’s Association-te hian remruatna fel tak siamin, zan dar 12:00 thleng tal chu Aizawl chhim leh hmar, chhak leh thlangah stand mumal tak neiin City Bus paruk emaw, pasarih vel tal chu a inchhawkin service tir tawh se. Chhiat ṭhat tawh chang te, hnathawhna hmuna khaihlak chang leh laklawh thilah lirthei hawl chhuah tur nei lote leh Taxi hire-na tur nei zo ve lote phurrit nasa takin a chhawk ang.

11. Chawhmeh zawrhna hmun hrang hrangte thianghlim zawka sawngbawl ni tawh se. Lei bal kan rahna tur pheikhawk pawh saranga tuamin bawm chhungah kan pack a, darthlalang phenah zuarin kan hrufai hliau hliau ṭhin. Chutih laiin kan kawchhunga lut tur ei leh in turte chu kawngpui sir vaivut khu karah te, bazar hmun diak leh khu karah kan chap a. Cancer leh natna hrang hrangte hi vei lo ziazang kan ni lo, uluk tur zawk uluk nachang hre tawh ang u.

12. Ngaihsan tur dik ngaisang a tura zirtirna uar sauh sauh ang u. Politician leh officer corrupt, an hlawh leh sum lakluh mil loa khawsate ngaihnep nachang hria ila; officer leh MLA pension tawhte an hun laia dik taka an thawh avanga mi inhnuai luaha la khawsa ve mai maite ngaihsan leh chawimawi nachang hre thar zel bawk ang u.