Savdhaan India

Savdhaan India thlirtute kum thar chibai vek u le. Tunlai chu Savdhaan India a lar khawp mai. A tak taka thil thleng chan leh a nihna hian a tihluin a ti hmuhnawm a. Thil reng reng hian ṭhatna leh ṭhatlohna a nei ang a; he Savdhaan-ah pawh zir tur tam tak a awm thei awm e.

Police pawimawhna

Police pawimawhna chu kan hria, dan leh thupek kengkawhtu an ni. Ram leh khawtlang him leh him loh, kan khua leh kan veng ral nuam leh nuam lohah mawh an phur a. An mawhphurna a pawimawh hle a, chutihlaiin Police-te hian an thuneihna an hman sual chuan thil a buaithlak duh hle.

He Savdhaan India-ah pawh hian kan hmu fo mai. Police misual nena inzawm, police zingah thuneihna hmang dik loa hmeichhia rikrap leh khawih, Police tham theih a tam mai.

Police-ten an thuneihna an hman dik loh hian thil a buaithlak theihzia a lang. Dan leh thupek kengkawhtu tur leh venhimna hna thawktu turte misual lama an ṭan tlat chuan a buaithlakzia kan hmu. Heivang hian misualte hrem lohin an awm phah fo a, mi fel leh dikten an tawrhphah zawk chang a awm ṭhin.

Police, milian leh thil ti theihten an thuneihna hmanga dikna an rahbeh vaih chuan ram leh khawtlang nuam a awm thei lo ang. Misual leh zahna chang hre loten nuam an tawl dawn a ni. Chutihlaiin Police fel leh dikna ṭan tlattute avangin misualten hremna an tawk ṭhin hi a ropui takzet.

Huaisen a ngai

Vairam hmeichhiate dinhmun a khawngaihthlak hle. An pasalte in lamah sawisak leh tihnawmnah an tawk fo.Tam tak chuan harsa leh hreawm ti takin a tuar tlawk tlawk a; an harsatna hmachhawn turin chakna leh huaisenna an nei lo. Hetiang tho hian khawtlangah pawh misual (mipa) ṭhenkhat lakah harsatna an tawk fo bawk. An harsatna tawh chu an nu leh pa leh chhungkhatte pawh hrilh ngam loin an awm a, a tawp thihna a nih loh pawn buaina lian zawk a thlen phah fo.

Harsatna kan neihte sawi chhuak ngam tura chakna leh huaisenna kan neih a ngai. I mimal zalenna hum him turin zalenna chanvo pek i ni. Chutihlaiin hmeichhia tam tak mi huaisen, thudik hailang tura police pawh a ṭul huna hlau miah loa an hmachhawn ngamna hi an chhuanawm takzet. Mahni mualphona tur pawh pawisa loa sual do tura penchhuak ṭhinte hi mi huaisen dik takte an ni.

Ṭanrual a ngai

Vaiho hi kawng tam takah sualna leh ṭhatlohna nei mah se kawng ṭhenkhatah chuan sual do tura an ṭanrualna hi a ngaisanawm. A bik takin, an hmeichhiate an chanvo hum him tura an ṭangrual leh thei tlat hi a hmuhnawm. An ṭanrual phawt chuan mi lian leh thiltitheih takte pawh a tawpah chuan an hneh thei tlat. Hemi kawngah hian chanchinbu mite hnathawh leh thiltih hi a chhuanawm ṭhin khawp mai.

Awle kum a thar a, mihring leh kan vela thil awmte chu a ngai reng kan ni. Chutihlaiin, sualna leh harsatna tam tak kan tawk mek zel. Chuvangin, i bul hnaia thil awmte hre chiang la, i dikna chanvo hria la, sualna do turin i mit leh beng chhi reng ang che. Savdhaan Mizoram, Mizoram fight back.