Chhiatna rapthlak leh a behbawm

Kum 2015 kan chuangkai chauh a, kum ṭantira Mizoram ti ti tam ber chu Zarkawt Veng tlangval Mawitea bo thu a ni nghal a. A hnuah mi kut tuara boral ni ngeia langin a ruang chhar a ni ta mai a, a pawi tak zet a ni. Mawitea ruang hmuh thuin mi a barakhaihna thinphu pawh a reh hma ni 9.1.15 (Zirtawp) zan dar riat velah Republic Venga inthahna rapthlak takin Mizoram min rawn barakhaih leh a, a va pawi em! Chhiatna tuar chhungkuate - Pathian awmpuina leh thlamuanna inchungah lo awm zel rawh se.

Ni 9.1.15 zana inthahna kha Mizoram mai ni lo, khawvel pum huap ngaihtuah pawhin thil rapthlak eltiang a ni. Hetiang thil rapthlak tak kan Zawlkhawpuiah a thleng ta mai hi rilru a na a ni. Kha chhiatnaah khan mi panga laiin nunna hlu tak an chan a, he tualthihna thlentirtu hi a phutawk hremna pe ngei se. Dan kengkawhtu rintlak tak tak kan nei a, dik leh fel takin dan an kengkawh turah ngai ila. Thil finfiahna kawnga hma latuten hma an laknaah an tha tichak zawnga lo ṭanpui hi mipuite tih tur a ni.

Ka han sawi duh tak chu kha tualthahna rapthlak takin a ken tel, a behbawma thil lo thleng veho kha a ni. A hmasa berah chuan kha chhiatna thlentirtu misual khan mi ṭhenkhat kut chu lo tuar nel nual hman mah se kan Police-ten an hna ṭha taka thawkin mahni nunna hial pawh thapa mipui thinur laka misualpa nunna an han hum sak thei kha Mizoram Police huaisenna a fakawm. Boruak ṭha lo zawk thleng tur laka mipui min uap tlattu Central YMA leh Branch YMA hruaitute kha in tlawmngaihna a ropui bawk e. Chutiang a nih lai karah khatianga nopang pawisawilo leh hmeichhe awm nem zawk pawh zahna chhete mah nei loa rawng taka thattu kha mipuiin Police kut ata chhuhsak tuma ‘thi rawh se’ tia au rual dual dual pawh kha thil awm tak a ni. A tuartu chhungte tan mai bakah Mizoram tan chhiatna rapthlak tawpkhawk a ni. Chutih lai karah Mizo mipuite kawng engemaw ti zawnga min zirtirtuah hman tum nghal bawk ila a va ṭha dawn em.

Chhiatna thlentirtu pa chu mipui laka a him theihnan tiin a sa him nan chhiatna tawkte ṭhenawmah dah a ni a. Khami ṭuma mipuiin kutthlak ve tuma kan nawr vak vak kha thil tih awm tak a ni. Mahse, khami police kut ata chhuhsak kan tumna lama pawisawi ve miah lo misual an dahna in (chhiattawkte ṭhenawm) kha ti khawpa kan han suasam mai kha chu mitinte kan in en let a ngaiin a lang. A ṭhenin misual an dahna in chu leirawhchan, lung etc. hmangten an han vawm a, an bang tile an han chhu chhe vak maite kha chu khami in neitute tan kha chuan phurrit a va ni dawn ve le!

Chu a chhapah an bang tile chhut kehna aṭanga lut ṭhenkhatten khami in neitute steel almirah-a an pawisa dah an lo ru leh zel te han hriat phei chuan, mi chhiatna remchanga lo hmanga rukrukna hun atan lo hmangtute khan kan Zonun mawi hmai an tibal tak zet a ni. Khatiang thil kha tun hnuah thleng tawh lo se a duhawm khawp mai.

Tunlaiah Social Network - whatsapp, facebook etc. hmangin awlsam takin chanchinthar mai bakah milem te nen lam kan in thawn zung zung thei ta. Chhiatna a thlen hian mitthi chhungte tana hmuh nuam lo leh an rilru hreawmna tizualtu ni thei, mitthi ruang hmuh nuam lo tak tak thawn darh loh nachang hriat hi thil finthlak tak a ni. Tin, a lo thlirtu lampangte pawh lungphu ṭhalo leh thlalak rapthlak deuh an hmuh avanga an hriselnain a tawrh phah theih tam tak a awm tih hre bawk ila chuvang chuan thu leh thlalak thehdarh kawngah a chin tawk i hre tlang bawk ang u.

Khatiang chhiatna rapthlak, hmelmate chunga thleng tur pawha kan duh loh kha Mizoramah hian thleng tawh lo se tih hi mi tin duhdan a ni ang a, mah se khawvela awm kan la ni miau a, nakinah kan Zoram hian engemaw chhiatna neuh neuh kan la tawng leh lo ang tih hi a sawi theih loh. Chutiang hun a lo thleng palh hlauh a nih chuan pawi sawi ve miah lote tana harsatna thlentu ni lo turin mitinin rilru fim tak puin tha i thawh ṭhin ang u.