Taimak leh rinawm i zir thar ang u
Kum thar 2015 Vanglaini chanchinbu chhuak hmasa ber Editorial kha ka lo chhiar a, 'Kum tharah taima zawkin' tih a thupuia hmangin kum thar 2015 chu kan tana kum ṭha a nih theihna turin mahni lam insiam ṭha ila, kum liam ta aia taima zawkin hnathawk ila tiin rawtna a rawn siam a.
Eng hna pawh thawk ila kan taimaka kan rinawm phawt chuan zawmthaw tak leh depde taka titu ai chuan kan thawk ṭha zawk dawn tih a chiang. Chumi piah lamah rinawmna leh taimakna kan nun pui phawt chuan kan rilru lam a dik bakah kan mizia leh nunphung thlengin zahawm leh entawntlak takin kan nung thei dawn tihna a ni.
Mi rinawm lo leh mi phakar kan tih maite hi chuan nunphung leh mize awhawm an nei ngai lo. Chutiang mize nei mahni hnathawhnaah pawh rinawm lo, thawk duh reng tho chung sia mahni hnathawhna sawisel reng mai te, hlepruk theihna tur kawng ringawt melha phakar taka che ṭhinte hian taima takin hna an thawk thei ngai lo a. Rilru nghet lo takin an thawk a, an hna thawh mek aia ṭha zawk thawh tur an hriat chuan loh avangin an thawhna ngaiah an thawh reng a ngai tho a, vui hmui tichhah bur chungin an thawk a, an nun pawh a hlim thei miah lo a ni.
Mi rinawm lo leh eiruk ching mi chuan a hriat loh hlanin a chhungkaw member-te ah a mize ṭha lo tak chu a tuh thuai a, a nupui fanauteah a mize ṭha lo chu a kangkai thuai a, a tawpah chuan mi rinawm lo leh hlep ruk ching rilru ṭha lo tak rilru chu a chhungkua-ah a ṭai darh ta ṭhin a ni.
Mize dik nei aṭanga sei lian naupang chu a nulat/ tlangval hunah pawh miten mo leh makpa atan an iai tlat a, chhungkaw innghahna chhungkaw hotu ber aṭang a dik tawh loh avangin miin an thinhrik tlat ṭhin.
Hei tak hi a ni pawi chu. Chhungkaw hotu ber a taimak loh a, a rinawm miau loh chuan chhungkaw member dang phei chu meze dik neihtir a har tawh khawp ang. Kan rilru leh nungchang, duh zawng te hi kan fa, naupang te te te pawh hian an hre nghal thuai ṭhin.
Chhungkaw hotu ber fel leh dik tak tan pawh fate mi taima leh rinawm ni tura chher hriam a harsat tehlul nen, chhungkaw hotu berin a zir loh phei chuan chhungkaw pum tan mize dik neih chu thil harsa tak a ni a, chhiatna rapthlak a ni ringawt.
I taimak a, i rinawm khan nangma tan pawh a ṭha a, i bul vela awmte tan a ṭha a, i hnathawhna emaw i mi chhawrte tan pawh entawn tlak mize zahawm i nei tihna a ni. Chuvangin, he kum tharah hian Mizo mipui hian taimak leh rinawm i zir thar leh ang u.