AMC neih hma nge tha kan neih hnu?

Aizawl Development Authority kan neih hunlai kha a ngaihawm ka ti... Anni kha chu office lian lo, staff tlem te, pawisa pawh tam lovin hna an thawk a, nimahsela hna an thawk tak tak a ni.

Aizawl Minicipal Council a ding a, tunah chuan Aizawl Municipal Corporation tih a ni tawh a, ADA aia an hnathawh ṭha zawk hi kei mi mawl hian ka hmu chuang miah lo.

AMC term hmasa ber kha zahpuiawm takin an khar ti ila ṭawngkam uchuak hmangah ka inngai lo. An pawisa thehchhuah tamzia leh an hnathawh ka buk hian kei ka lung a awi thei lo. An in sorkar chhawk avangin hnuhma lian tham min hnutchhiah lo. Contract an sem zozai kha a va ham tam si ve - kha kha maw AMC chu.

AMC hian thil tam tak tih tum duh suh se. Aizawla in sak khuahkhirh ringawt hi an theih chuan an hlawhtlingah ka ngai ang. ADA kha chu an khauh a sin, mi lian an thliar lo. Tunah chuan Aizawlah building sang pui pui a ding ther leh fur tawh. Khawpui lailiah an ding tohlawt luah a, AMC hian permission an pe nge an hai der zawk? tihte min ngaihtuah tir a ni. AMC hian Aizawla traffic movement hi an siam rem theiha in sak dan an siam ṭhat bawk chuan a tawk ka ti.

Tunah hi chuan buai leh ṭul tak hian an awm a, an hnathawh kei ka la hmu lo. Contract tenau te te hmanga lungrem leh side drain siam hi chu hna a tling lo.

Ram hnuk khawih tham ni lem lo mahse free wifi min zawrh lai te khan thil tak tak turah kan lo ngai a, mahse hei an reh leh ta daih mai. AMC hrim hrim hian engnge an thawh, partking fee khawntu tur zawn hi an hna pui ber a ni mai dawn e a!

Hei hi chu village council tan pawh a harsa lo. AMC chuan Aizawl khawpui hi eng tin emaw tal khalh ve rawh se. "AMC a din hnu kha chuan.... kan heti ta a ni," tih tur ka la hmu lo. ADA kha a ngaihawm ka ti rum rum mai.

- Remtluanga