CVJAC-te ka dem lo thei lo

Commercial Vehicle Joint Action Committee (CVJAC) bultumin sumdawnna lirthei hrang hrangte neitute chuan lungawi lohna lantirna atan an lirtheite an tlan tir lohna kha a la rei loa, kan la hre vek awm e. Khami ṭuma CVJAC ho thil tih dan kha ka dem mai ni loin, ka dem takzet zet a, sorkar pawhin a tih tur a ti tawk lo.

Lungawi lo an awm chuan an lungawi lohna an lantir ṭhin. CVJAC pawhin lungawi lohna an nei a, lungawi lohna lantirna atan lirthei an tlan tir lo a nih kha. Mah se, an lungawi lohna lantir danah khan an kuang lo an nawr ka ti lo thei lo. Mipui min zah lo hlein ka hria a, an lungawi lohna lantir dan kha a dik tawk loh vang pawh a ni ang, ka hmuh danah chuan mipui thlawpna pawh an hmu ṭha lo hle a ni.

An lirtheite an tlan tir lo kha lehlamah chuan an rights a ni a, mahse lirthei tlan duhte an dang erawh kha chu an kuang lo a ni tawh. Sumdawng lirthei a tlan loh na na chuan mi tam tak tan a buaithlak hle a, harsatna tawk pawh engemawzat an awm a ni.

CVJAC an nawrh zarah Mizo tlawmngaih-na a rawn lang chhuak a, mi tam tak chuan pawisa beisei hauh loin a mamawhte tan an lirthei an thawhchhuahpui a nih kha...a va mawi em Zonunmawi a par vul leh ta... Mah se, maw mi tlawmngaite vak chhuak kha CVJAC duty-te'n an lo ngai thei lo maw, a va han zahthlak tak em. Mizo an ni ve ta lo em ni?

Tlawmngaia vak chhuakte'n mi mang-angte an phur tur dang tawk an awm kha mak ka ti in, thin a va tirim tak em. An tih loh tawp tur an ti a ni, tun hnuah chuan lungawi lohna an lantir leh anih pawhin sim hmak tawhte u. Anih loh chuan mipui kan thinrim mai ang tih a hlauhawm. Mi tlawmngaite tibuaitu nih kha a zahthlak zia hre mawlh rawh u.

MST Bus tlante pawh-in dan an tawk, aw in kuang lo in va han nawr chiang tak em, CVJAC te u inngaihtuah chiang teh u. MST Bus hi sorkar ta a ni a, an duh hun hunah a duhna hmun hmunah a tlan tir thei. Nitin mamawh leh bungraw dang hrang hrang phurte pawhin dan an tawk a nih kha, CVJAC-te u roreltu leh thuneitu in ni emaw in ti em ni?

In lungawi lohna lungawi lo ve lo, an lirtheite tlan tir duhte in dang ngawt kha in tih loh tawp tur a ni. In lirtheite in tlan tir lo a nih chuan in thuneihna a ni e, a tlan duhte in dang erawh in thuneihna piah lam a ni. Lungawi lohna in lantir leh a nih pawhin mahni kuang lo chu nawr tawh reng reng suh u.

Tin, sorkar lam pawh ka dem duh. Hun engemawchen CVJAC-te'n an kuang lo an nawr chung pawha an ngawi tlat kha mak ka ti hle. Mizoram hi a duh duhin thuneihna an lekkawhna hmunah a chan lohna atan sorkar hian a tih tur ti vat ṭhin se a va duhawm em. Mi tam tak manganga an awm lai khan khawnge sorkar a awm?

A nawrh rei deuh hnua sorkarin police chakna hmanga lirthei tangkhangte an chhuahtir kha a lawmawm tak zet a, kha kha sorkar tih tur dik tak a ni. Mah se, ka la ti fan a, sorkar kha a ngawi rei hle. Tun hnuah chuan lungawi lohna lantir an awm leh a, thuneihna an mahni thua an lek leh a nih chuan rang takin sorkar che tawh ṭhin se a duhawm hle.

Thuneihna nei lote'n an duh duha thil an tive ngawt hi sorkarin a phal tur a ni lo. Chuti a nih loh chuan sorkar hian zuam a hlawh telh telh a nga, chumi tuar tur chu mipuite an ni. Mipuite rin ngam, rintlak sorkar a awm zel theihna atan sorkar hian a hun takah a tih tur ti mawlh ṭhin teh se.

- Lalṭhatluanga