Zingkara khawhar lenpui hi

Hmanni khan khawhar in pakhatah ka lenglut ve mial a, midang pawh an lo leng nual a. Titi khawchang eng eng emaw an sawi laiin ka beng verh ve deuh pakhat, "Zingkara khawhar lenpui" an sawi chu ka ngaihtuah zui a; a ni thei mai awm mange ka ti ve ta a ni.

Accident vang emaw, lungphu-chawla thi thut an nih loh chuan mitthi hi hun engemaw chen enkawl, chhung-te'n hah taka zan eng-emawzat an tlaivarpui hnua thi an ni tlangpui. An thih hun a inang kher lo ang a, a ṭhen chu tlaivarpui ngai loin an vuiliam nghal a, kan mitthi neih tam zawk hi chu tlaivarpui ngai an ni deuh ber. Tlaivarpui ngaia thi an ni emaw, vuiliam nghal an ni emaw, mitthi chhungte tan chuan a chauh thlak thei hle-in a rinawm.

Khawhar inah kan len dawnin kan hman hun nge pawi-mawh kan lenna turte remchan hun tih ka ngaihtuah zui phah a, kan hman hun ai chuan kan lenna turte remchan hun ngaihchan a ṭhat ka ring. Mahse hei hi zawm har tak a nihna chin pawh a awm mai thei. Tunlai hian mitin kan buai em em tawh a, kan remchan huna khawhar lenpui mai pawh a awl viau ta ve ang.

Veng pakhat khawhar inah tuk- ṭhuan eikhamah ka leng lut ve a, chutah chuan nu ber leh a ṭhiannu an inkawm keuh keuh a; an sawi ka hriata ka ṭawmpui em em chu zing ṭawngṭai inkhawm bang khawhar ina leng ṭhin ninawm an tih chu a ni. A ni tak a, khawhar chhungte hi an hahin mutmu pawh tuah mang loin an awm a, chuta chhapah kan remchan hun tia zingkar lenluh chiam hi a lo dawngsawngtu tan chuan a ninawm dawn mang e, ka ti.

Chuta lusun nu sawidan chuan, "Inleng neih hi kan rilru hah min chhawk-tu ṭha tak, Pathian min pek a ni a. Amah-erawhchu, zan eng emaw zat damlo kan buaipui a, kan tlaivar zan pawh a tam a; kan han thi a, nu leh pa,
ṭhalai tam takin min tlaivarpui a, a tukah mi ṭhahnem takin min vuiliam pui a, kan lawm hle. Zanah kan mu ṭha hlei thei lo a, a tuk zingkarah inleng an lo pungkhawm a, zan mu ṭha thei mang loa kan awm hnuah zingkara lo leng lutte hlim taka lo chhawn a ngai leh si a, a hahthlakin phurrit a belhchhah duh khawp mai," a ti a.

A thusawi hi dik ka ti hle. An ṭhian duna an sawinaah phei chian zing ṭawngṭai inkhawm bang lenglut an ninawm hle niin ka hriatsak a. Zanah lah inti bengvar takin lengkhawm an ṭin hnuah pawh haw tum mai lo an la awm cheu bawk chu lusun hlim tan chuan a ninawm duh hle ang tih a hriat bawk.

Heng nu pahnih ti ti aṭang hian zing kara khawhar lenpui te, zan rei tak thlenga lenpui tum hi sim deuh atan a ṭhat hmel ngawt mai.

- Lal Rinmawia