Mihring nunna kan hlut tur a ni

Kumin chu kum thar kan chuang kai dek dek a, Mizoram hmun hrang hrangah tualthihna leh ruang chhar chanchinin min deng nghal awn awn a. Kum thar January ni 10 vel kan hmang awrh chauh a ni a, hemi ni 10 chhung vel chauha Mizorama ruang tam tawhzia ngaihtuah hian a lungchhiat thlak a, ṭhenkhat tan phei chuan he kum thar hi kum ṭihbaiawm tak niin a ngaih theih hial ang.

Hmanlai ti mai ila, 1990 chho vela Mizoram boruak kha kan hria ang a. Khang hunlai khan Mizoramah hian ruang chhar leh tualthah thawm hriat tur a tam lo hle ṭhin a, ruang chhar leh tualthi awmchhunte pawh kha mak kan ti hle ṭhin.

Sawi ta mai mai ila, kum 20 vel chauh liam ta khan Aizawlah Vai leh Mizo inkarah inhmuh thiam lohna lian tak a awm a, dawr tam tak suasam a ni a, khati taka buai nasa si kha mak ang reng takin nunna chân erawh an awm lem lo a nih kha. Dawr bungrua erawh an suasam nasa a, police-ten theih tawpin veng ve bawk mah se bungraw bo tam tak a awm bawk a ni.

Tun hnaiah erawh mitthi ruang chhar te, accident rapthlak pui pui leh rawng tak taka inthahna a thleng ta fo mai. Hetiang zel kan kal chuan Mizoram hi nunna hlut lohna ramah kan chan thuai ang a, Kristian ram hi chen tlak lohna ramah kan siam mai ang tih a hlauhawm ta.

Misual leh pawngsual chingte lakah pawh mipuiin a haw haw zawnga lo chet ve hluai a, mihring nunna hial lak a nih ṭhinna te hi kan tihtawp vat a ngai.

Civil miin misual man zawng ni loa misual chunga kut thlak ve vak hi dan kalh a ni a, mihring nunna la tawhte hi an hmui ngial ngai lo bawk. Nunna hi a hlu a, eng vang mahni mipui mimir hian mihring nunna kan la thiang lo. Misual chu a hremtu tur dik tak court-in a hrem mai dawn a ni.

Chuvangin, tun aṭang hian Kohhran leh khawtlangah pawh mihring nunna hlutzia kan in zirtir tam a ngai ta.