MOTOR PERMIT REPLACEMENT LEH REGISTRATION CHUNGCHANG
Transport Minister chuan Taxi leh City Bus permit Replacement (a hlui a thara thlak) a phal tawh loh avangin mi ṭhenkhat lirtheia eizawngtuten an motor Taxi/ City Bus te chu a hlui chhiat tawh em avangin an hluihlawn nual tawh a ni awm e. Kum thar kan lo chuangkai leh ta bawk a, kan sorkar hian heng hi lo ngaihtuah chiang ve se.
1. Permit replace a nih hian a motor hlui hi public sevice-ah hmang tawh loin private vehicle-ah emaw road off (tlan thei tawh lo) a siam ṭhin a nih avangin Taxi/ City Bus a pun phah chuang lo.
2. Taxi bikah hian accident case-ah (Police leh MVI report a awm chuan) permit replacement an phalsak a ni awm e. Heng chauh hi phalsak loin motor kum 10 tling tawh hi chu motor neituin a duh thu leh danin a phut angin replacement tih phalsak mai sela. A motor hlui kha a service dawn tawh chuang lo a, Taxi/City Bus a pun phah dawn chuang lo.
3. Khawpui chhungah Taxi/City Bus hlui leh ṭawp tak tak service tir ai chuan a thar vek service sela, ram dang mite hmuhah pawh a zahawmin khawpui hmel pawhin a mawi phah ngei ang.
4. Tun hnaia Taxi a pun tak vak chhan ber chu replacement vang ni loin kum engemaw zat liam taa Taxi permit pek chhuah, an register tak loh (taxi a la hman loh) a awm reng chu a ruka renew phalsakin pek chhuah a ni a. Permit thar issue sak ang tho a ni si. Hei tak hi Taxi a pun chakna chhan ber chu a ni zawk.
5. “Taxi / City Bus a tam tawh lutuk” tia replacement phal si loin engvangin nge thil ti thei apiang hnenah Aizawl khawpui chhunga service tur City Bus permit 15 lai a pek chhuah leh tak mai? Tlem lai deuha Mizoram Com Owners Association-ten nawrh an huaihawt pawh kha an nawrh chhan han ngaihtuah chian chuan an lo demawm hauh lo mai.
Kan sorkar chuan motor dahna (garrage) nei lo tan lirthei a register theih tawh loh tur thu kha a chhuah a. Hei pawh hi sorkar thuchhuakah chuan zawm hlawh lo ber pawl a ni awm e. Lirthei register-tu zingah hian garrage nei chu mi zaa sawm pawh an tling kher lo ang. Heti chung hian nitin mi 40-50 in lirthei an register reng tho bawk si! Tute emaw sum siamna remchangah a chang mai mai thei awm e. He thupek hi sut leh mai sela a ṭha lo maw?
Permit replacement chungchangah pawh hian mipuiten ro rel tura thlan tlin an nih ang hian lirtheia eizawngtute hmakhua ngaiin Taxi/City Bus permit replacement chung chang hi ngaihtuah ṭha leh se la thil ṭha tak a ni awm e.