Ramthimin ramthim kan vei!

Mizote hi Pathian thu duh, Kohhran larun tak hnam kan ni. Heti taka Pathian thu duh leh Kohhran larun si hian kan Pathian thu kalpui dan leh zawm tum dan hi a fuh em tih chu ngaihtuah tham a ni. Kohhran hrang hrangin ramthim kan vei dante hi a fuh chiah em?

Mahni ram pawh eng ni mang si lo hian, ramdang kan vei lutuk deuh lo maw? I ṭhenawm englem ni bik si loin in chhungkua a lo vei ve chhen che u hian, engtin nge i ngaih? Kan ṭhenawm ram, ramthim tia kan veite hian kan lakah eng riru tak pu ve ang maw?

Mahni chenna ram pawh tiêng thei loin, ramdang tihên tum chu a mak em a lawm. Kan ṭhenawm Tripura CM phei chuan, “Hmarchhak ramho kha lo lungngai suh u, kan êng siamchhuah hmang hian ka rawn chhun êng ve ang che u,” min ti! Keiniin ramthim tia, missionary kan tirh luhna ramin min rawn vei let tihna a nih chu.

Ramdanga missionary hnathawkte hi sawisel ka tum hran lo. Mahse, mahni ram chhungah pawh rawngbawl sen lohna hmun tam tak a awm a, hmundang lo ngaihmawh hmasak viau hi chu a dik lo. Missionary kan tirhchhuah dante hi han ngaihtuah chiang ve teh. Chanchin Ṭha hril kan duh vang chu a ni ber a, chutihrualin missionary thawnchhuah tam lamahte hian kan lo inel ru a ni thei mai lo maw? Kan Kohhran huang tihzau kan duh vang a ni em?

Missionary kan tirhluh tawhna phawtah chuan Kohhran din zel kan tum niin a lang. Tute emaw Kohhranin missionary tir lutin, Kohhran hial lo din tawh pawh ni se, kan Kohhran mi leh sa an nih loh chuan kan Kohhran ngei din kan tum ve leh a. Kohhran lo ding tawhsaa lawi ngheh ve mai kha kan hreh tlat ṭhin. Pathian thu nge hrilh kan tum Kohhran thu?

Chanchin Ṭha thehdarh ai maha ramdanga awm theihna remchang leh zirsang si loa hna zahawm, hlawh awm ve tho si thlakhlelh vanga missionary-a te hi an awm ang em? Chawmtu nei lo missionary hi engzat tak awm ang i maw? Min chawntute sum bawm hi lo keh ta se, mi engzat takin missionary hna hi bansan ang imaw?

Heti hum huma ram pawna kalchhuah hi a hun em? Fapa tlangboin, “Ka pa inah eitur a tam tehreng nen..” a tih ang deuh khan, kan ram chhungah thawhsen loh thawh tur a tam tehreng nen, ramdang vei hmasa tur kan ni em? “Mahni pawh in tidam thei si lo!” min ti mai lo ang maw? Mizoram hi ramthim vei nasa ber leh AIDS vei tam viauna a ni asin!

Kohhran leh khawtlang tana mi hnawksak tia vengchhung aṭanga kan hnawhchhuah leh an in hial kan kalsak te hian chanvo leh dikna an nei ve a. Hetiang tih ai chuan ṭanpuina hmanga khaichhuah tum ila kan ti fuh zawk ang. Sap thufingin, “Ril a ṭam tawh chuan eng thu mah hi, beng arawngah a khung theih loh,” a ti. Chuvang chuan, kan unau kan chhanchhuah turte pawh hi eitur kan pek puar hmasak phawt a ṭha ang.

Tin, heng mite hian Kohhrana tel ve hi an pawng duh loh ngawt lo. Kohhranin an eizawnna ve ber kan huatsakin kan do miau avangin anni tan chuan, Kohhrana tel ve ngam chi ziazang a ni lo. Kohhrana an tel tam ngam loh miau avangin, Kohhranin sual tia kan lo inzirtir ṭhin thil tam tak chu a sualna an hmu thiam ve lo va, an pawisa lo ta ṭhin a ni. A sualna lo hmu thiamin hre reng mah se, ti lo thei lo dinhmunah ding niin an inhre tawh tlat. Hetiang a nih avang hian Kohhrana an tel tam ve dan tur kan ngaihtuah a ngai. Kan Biak in ropui tak takte hi, heng mite tan chuan sakeibakbuk puk ang mai a ni thei! Biak in ropui tak tak neih hi a ṭha a, mah se a chhunga inkhawmte thlarau chan a ropui leh si lo chuan kan tan eng nge sawt ang?

Kan Biak in te hi tute emaw eiruk sum kan dawn hmanga kan sakte hi a lo ni mai mai lo maw? Pathian nge lawm anga Setana? Eiruk sum hnawl a, eirute hnualsuat ngam si lo hian, zu zuar rethei te te leh ruihhlo bawia tang mi chhumchhiate ṭingmit erawh pawisa hauh si lo Kohhran mi kan ni em?

Biak in ropui tak nei thei si hian, mi chhumchhia leh leirem rap thei lo, dai pelh laklawh tawhte chhanchhuah nana tha leh sum kan nei leh si lo a nih chuan, kan êng chu mi mithmuhah a êng lo tawp ang. Kohhran hrang hrang pisa puia thawk kan berampute len chakzia te hi mak i ti ve ngai em? Kohhran hruitu nih bak thawh dang nei lem loten in leh lo an neihṭhatzia te, lirthei nei lo bar an awm tawh lo te hian ngaihtuahna a van tivak thui duh em!

Ram rorelna fel tawk loh vanga dinhmun inchen lo lutuk pawh tih tawh nak alaia Kohhran chhungah lehzel dinhmun a inthlau lutuk hi chu a dik lo. Ramin leiba kan ngah lutuk zaha laa retheih huama veipui zawk tura ngaih Kohhran hruaitute thleng thlenga kan lo inla lian ṭhin hi chu a dik hlawl lo. A nihna takah chuan, heng Kohhran hruaitute’n an hlawh lak zawng zawng pawh hi ramthim tia kan vei em emte thawh chhuahsa a ni! Ram intodelh lo lutuk keiniin an ram thawhchhuah hmanga kan vei let ve chiamte hi zah nachang hriat a hun.

Ramthim kan vei dawn ro ro a nih chuan, kan ram ngei hi vei hmasa ang u. Kan intodelh a, kan leiba neihte kan tlak theih hunah ram pawn chu kan vei suau suau dawn nia. Chutih hunah chuan, kan Pathian thu sawite pawh a let tam takin Lalpa’n mal a sawm ang a, thlarau bo tam zawk kan man thei ang. Kan ṭawngkam khat lek paw’n thil a ti thei tawh ang - kan ṭawngkam aiin kan thiltihin thu a sawi tawh zawk dawn miau a.

Do tur dik tak kan do loh avang te, vei loh tur kan vei vang te leh hmasawnna tur hmasa zawk lama hmasawn loa a ler aṭanga hmasawnna kan beih avangin tunah hian Zoram chuan thim chhah tak kan hmachhawn mek a ni.