Mizo duplicate

'Mizo ka ni' ti chungin, inti huaisen deuh leh hlauh nei lo ang maiin, tlawmngai ve tlatin i inhria a. Motor accident awm se, a hmun i thleng hmasa ber a, mah se, engnge thlen hmasak ber i duh nachhan kha? Pocket money leh sana thar tuak nan tiraw?

Misual i hua a, pawngsualtu leh tualthattu i ten a, dam ve lo se tiin ngaihdan pawh i nei hial a. I pianthar ni leh thla theihnghilh ṭhakin i sahal a, pawikhawihtu chunga pawi khawih i chak hle a nih kha ti raw?

I rilru ka hria, ''Zuzuarho in chu vawm chhiat a thiang. Tualthah hmangte in chu halral sak vek a pawi lo. Mi pawngsual chingte motor chu vuak darh vek mai tur'' i ti.

Chungnungbera emaw i inti a, hremna lekkawh turin Judge emaw i inti a, mi ngaidama ngaidam lo turin Pathian ni tlata inhriatna i nei ti raw? YMA motto hre hauh loin i inla tlawmngai satliah ve ringawt a, kutkem nei chunga hunawl hman ṭhat i thiam viau bawk.

Na i ti em? Na ti duh lem suh, mahni nihna zahpui loh tur. Misual i vuak tumna lamah nang aia fel i hliam a, tualthattu denhlum i tumna lamah tual i that lek lek a nih kha.

Mitthi ipte aṭanga i pawisa tur zen chhuah pahin kutkem nei i hmusit ṭhin. Tlawmngai lemchang, Mizo der, tling lo tak chungin ka ngainep che.

Suit haa Bible zakzeh chung leh eiru thei dinhmuna i din velaha eiru mai tur i ni em tih zawhna chhang thei lo chungin zonun zemawi i sawi chhen ṭhin an ti. I fapa ar ruk kha chu thil pawi a ni ve lo ti raw? Tlawmngai lemchang, nang Mizo duplicate... ?