TEHNA

Tehna hi thil pawimawh tak a ni a, a pawimawh em avangin tehna hi a dik lo thiang lo. Tehna ber a dik loh chuan engkim hi a dik lo vel vek ṭhin.

Tehna dik leh dik loh chu a tehtu mawhphurhna a ni. Tehna dik a hman avanga hlawkna te, a tehna a dik loh avanga harsatnate chu a tehtu chan vek tur a nih avangin a tehtu dinhmun hi a pawimawh hle.

Teh sual aia pawi chu tehna dik lo hman hi a ni a, a nghawng a na bik. Teh sualah chuan a tehna a dik a, tihpalh vanga tehsual a ni. Tehna dik loah erawh chuan a tehna chawpa a dik loh avangin a pawi thui em em a ni.

Kan tehna a dik loh avang hian mimal, chhungkua, khawtlang leh ramin hma a sawn thei lo a, chu chuan retheihna ruamah min hruai lut mek a. Retheihna chuan beidawnna a siam a, thihna thlengin a awm phah a, a pawi hle.

Tehna dik lo chuan hma­sawnna tur a tihṭhuanawp a, Kohhranah pawh bu a khuar a. Kohhran mite mamawh ber thlarau lam chaw a pek theih loh phah a, chu chuan taksa thihna bakah thlarau boralna a thlen a, a pawi ber hle.

Tehna a dik loh chuan ngaihsan loh tur ngaihsanna te, ngaihsan tur zawk ngaih­nepnate a lo awm a, chu chuan kut tling loa sum lak luh duhna a hring a, rualawhna sualah mimal leh chhungkua an lo tlu ṭhin a ni. Ṭhenkhat chu retheihna ruamah an tluk phah ṭhin a ni.

Khawtlang leh sawrkarah pawh tehna dik lo hian bu a lo khuar nasa a, tehna a dik loh chuan hmasawnna hna kan thawh nasat poh leh mirethei an pung mai dawn a ni. Ram hmel a timawi lo a, hnamdangte'n min hmuhsit phah bawk ṭhin. Khawtlangah chungnung lo tur an chungnun phah a, hruaitu ni tlak loin ram an hruai phah a, chu chuan mipuite rilru a hruai dik lo ta ṭhin a ni.

Sawrkarin a thil tihṭhat tehna atana sawrkar hmasa tihsual a hman a, sawrkar hmasain a thil tih ṭhat tehna atana sawrkar ṭanglai tihsual a hman bawk chuan kan ṭhang lo tawp a nih loh chuan ṭhang lo tur lai a ṭhang tihna a ni a, kan ram leh hnam a piangsual dawn tihna a ni.

Tehna dik lo hmangtu chu mipuite hi kan ni a, a tuartu pawh mipuite bawk kan ni. Teha dik kan hman a ngai a, ngaihsan tur dik kan ngaihsan a ngai; dawm kan ngai dik tak kan dawm kan a, hrem tur dik hrem ngam turin mitin hian tehna dik kan hman a ngai a ni. Mi ṭha leh fel nih hi a har lo em em a, kan tih tur dik tak kan tih a, kan tana ṭha lo leh kan tih loh tur kan tih loh mai hian mi ṭha leh dik, mite'n an fak kan ni mai ṭhin. Chuvang chuan tehna dik hman hi kan ngaih anga thil harsa a ni lo e.

Kan nitin nun leh chhungkua te, kan kohhran te, khawtlang leh sawrkar dik tawk tawh lohzia kan hria a, kan Pathian mai bakah kan thlahtute thlarau pawh a zahawm em em a ni. A bul ber chu kan tehna a dik loh vang a ni a, a tihdam dan pawh tehna dik hmang a, tidam a, tehna dik hmangtu tur pawh mipuite kan ni.

Tehna dik lo kan hman chuan mite hnungah kan awm reng dawn a, chu chuan kan tana buaina, zahna leh rilru piansualna, kan thlahte thlenga pawi thei tur a thlen dawn avangin kawng tinrengah tehna dik i hmang ang u.