Hnatlang Intihhmuh Chi Tak A Ni

June ni 6, 2024-a Zotrek Adventure Club-te Tlawng luia tui pump leh a chhehvel tifaia an hnatlan thu kha social media lamah ka lo hmu a, lawmawm ka tiin ka lo chhuang hle mai. Khatiang hnatlang kha anni mai bakah pawl hrang hrang, YMA, KṬP, SAY leh a dangte pawh hian intihhmuh chi tak niin ka hria.

Kan hria a, kum tin mai tui a lo len deuh chuan kan Aizawl khawpui tui pump-na hmunhmate tuilianin a tihchhiat loh leh, tui a nut lutuk vanga pump mumal theih loh a awm ṭhin a. Heng hunah hian department lam kuta dah ngawt loin, mipui hian kan tih ve theih ang angte thawk a, a ṭul anga sawrkar tha tichak zawnga hma kan lak hi khua leh tui kan nihna kawnga kan tih ve ngei tur niin a lang.

Tlawng lui lianin harsatna a thlen fo zingah Aizawl tui pump hleih theih loh a nih hian mipui bawk hi a tuartu hmasa kan ni. Tun ang fur laite hian department lam berâwn chunga a ṭul ang anga mipuiin tui thianghlim kan in theihna turin tha zu thawh hi intihhmuh ila, Mizo kan nihna kawngah pawh kan tih âwm tak a ni ngei ang.

Aizawl ka awm ve lai khan tui harsatna hi kan tawk ngai meuh lo. Tlawng tui pump mumal theih loh avangin vawi khat chu tui kan nghei hlauh mai a, tukverhah hian ka dâk a, ruah a sûr buan buan a, tui kan nei dêr si lo. Khatiang tur chi chhungkua kha an tam ve ngawtin ka ring.

Hawh u, Aizawl tui pump-ah khuan a thawktute kut tichak turin hnatlan intihhmuh ang u. Tui harsatna hmun hi khaw nuam a ni ngai lo a, chhungkuaah pawh inhauhna a titam fo.

- Madawnga Khiangte, Rulchawm