Thurochhiah i siam tawh em?

Chhungkuaa hotu ber i ni a, thupui hlapui pawt chat thei ber tur i ni. Tichuan, Pathian malsawmna dawngin in leh lote i nei thliah thliah a, chutah chuan i chhung leh kuate nen hlim tak leh thlamuang takin in cheng a. Mahse, vanduaithlak takin i dam chhung ni lo tawp ta se, i in leh lote kha eng tin nge ni ang? I ngaihtuah ngai em?

I thih hunah i in leh lo leh bungraw hlute i chhung leh kua, i hmangaihte'n an inchuh buai vak thei tih hi i ngaihtuah ngai em? I dam laia hlim leh thlamuang taka in chenhona kha ro inchuh buai avangin thuneitute'n loh theih lohna avangin, tala lianpuiin tu m'a luh theih lohin an kalh bur thei asin. I tha leh zung, i sum leh pai nuai tam tak i sen ralna kha i thih hnuah i thihsan i chhung leh kua, i thih nia mittui sengtute tan buaina bul (apple of discord) a ni thei tih hi i ngaihtuah ngai em? Chutiang chu chhungkaw tam tak chungah a thleng tawh a, a thleng mek bawk a, mi tam tak chu an rûm tlawk tlawk a ni. Court-a thubuai inchiah mek zingah chhung leh khat, ro inchuh avanga thubuai hi thubuai tam pawl tak a ni mek a ni.

Thih hnua hmangaihte buaina leh innghirnghona lo thleng thei tur chu i dam lai leh i harhfim lai ngei khan i chingfel thei a ni. I chinfel dan tur chu thurochhiah mumal taka siamna hmangin a ni. Thurochhiah hi mi tam ber chuan kan kum a tam tawh hle hnu, kan thih dawn ruaia siam turah kan ngai. Apokripha-ah pawh kum upat hnuah chauh miin thurochhiah an siam ṭhin thu a sawi nghe nghe. A dik khawp mai. Kan thih hun tur chu hre lâwk ila thurochhiah hi thih dawn hnai têah siam a fuh ber ang.

Amaherawhchu, tu mahin kan thih hun tur kan hre lo hi a ni buaithlak lai chu ni. Tu pawh accident-in kan thi thut thei a, stroke avangin thi chiah lo mah ila, ngaihtuahna fim hmang thei lovin damchhung ní kan chhiar thei. Kan hma huna thil thleng tur hi eng mah kan hre lo a, kan hre lo tak zet. Chuvang chuan, thurochhiah siam thei dinhmuna kan din tawh chuan thurochhiah hi kan harhfim lai ngeiin siam mai tur a ni; a finthlak ber. Kan thih hnua ro chungchanga buaina a awm dawna a lan lem loh pawhin siam tho a finthlak. Thih thutna avanga thurochhiah mumal siam ta lo tu leh fate zingah ro inchuh buaina rapthlak tak tak a thleng fo tawh. Chu buaina chu a hrehawm satliah mai ni lovin, chhungkaw tan pawh a zathlakin a mualphothlak hle. Thuhriltu tam tak lahin an thusawi tifiah turin tehkhin thuah an la hmansak fo ṭhin lehnghal a, a hrehawm dan leh zahthlak dan a thuah hnih thuah thum ṭhin hle a ni.

Mizo Hnam Dan Bung 12-naah hian thurochiah chungchanga hriat tur chi hrang hrang a inziak a. Hemi bunga a tarlan dan angin thurochhiah hi hetiang hian a siam theih:

1. Ro neituin a dam laiin leh a harhfim laiin ṭawngkain thuro a siam thei (hei hi rikrum thil, thurochhiah siam hmanhmawhthlak lutuk a nih loh chuan thuhretu pahnih tal an awm a ngai).

2. Ro neituin thurochhiah hi ziakin a dah thei (hei hi duhthusam a ni a, a hnuaiah hian entirna kan han tarlang e).

3. Ro neituin ama thurochhiah ngei pawh a siamṭha leh thei.

Thurochhiah siam theitu:

Thurochhiah siam theitu chu ro neitu a ni. Ro neitu chu chhungkaw pa ber a ni a, pa ber a dam tawh loh chuan chhungkaw nu ber a ni. Heng chungchang hi Mizo Hnam Dan bung 12-naah chiang takin a lang a, a bu nei lo tan pawh Google-a awlsam taka zawn hmuh mai theih a ni a, kimchang takin ziak lo ta mai ila. Kan ṭangkaipui zawk tur, Google-a hmuh mai theih loh hi han sawi zui ta zawk ila.

Thurochiah ziah dan:

Thurochhiah ziah dan hre lo a awm theih a, ziah dan chi hrang hrang a awm thei ang. Mizo Hnam Danin a phût anga thurochhiaha ziah lan turte kimchang taka tarlangin hetiang hian entirna han siam ta ila.

THUROCHHIAH

Kei, Lalrivunga s/o Zakapa, Bawngkawn Chhimveng, Aizawl hian a hnuaia mi ang hian thurochhiah ka siam a, zan khat mitchhîn ka lo tawk palh a nih pawhin a hnuaia mi ang hian kalpui ngei tur a ni e.

1. Bawngkawn Chhimvenga ka RCC building (Mizopa chhiara chhawng nga) hi ka fapa tlum ber Lalduhawma h/o Lalsiamthari hian a vaiin a chang ang.

2. Sairanga ka kuhva huan (ṭin 4 hmun) khu a vaiin ka fapa Lalremthara h/o Zalianthangi, Khatla hian a chang ang.

3. Chaltlang Lily Venga kan in (Assam type) chhâwng khat hi ka fanu Zairemthangi w/o Zomuansanga Chaltlang Lily Vengin a vaiin a chang ang.

4. Ka motor pick-up (registration no. ziah ni se) hi ka fapa upa ber Zothanliana h/o Julie Liansangi, Lunglei Rahsi Vengin a chang ang.

(LALRIVUNGA)

Bawngkawn Chhimveng

HRIATPUINA

A chunga thurochhiah Pu Lalrivunga'n a siam hi kan hriatpui a, a dam ṭhat lai leh a harhfim lai taka a siam a ni tih kan hriatpui bawk e.

(LALMAWIZUALA)

Bawngkawn Chhimveng

Phone no. 0000000000

(RAMDUHSANGA)

Chaltlang Lily Veng

Phone no. 0000000000

Hetiang deuh hian ziah ni se. An hming chungah khian hming sign ṭheuh hnua a date ziah tel thlap tur a ni.

Chutichuan, he thurochhiahna lehkha hi mahni pawhin a kawl ṭhat mai theih a, fa sual deuh neite erawh chuan mahni venga mi rintlak deuh YMA President emaw, kohhran upa emaw, pastor-te thleng pawhin an kawltir mai ṭhin; chu chu him pawh a him viau mai.

Thurochhiah siam hi ro khawmtu turte entir kher loh pawh a ṭhatna zawk a awm mai thei. A pawimawh ber chu bo lo se tih hi a ni. Hetiang taka chianga thurochiah miin a siam chuan court-ah pawh khin hneh mai mai theih a ni tawh lo.

Chutih rualin, thurochhiah hi a lema siam an lo awm ve leh tlat ṭhin a, chutianga tih ching chu na taka hremna a awm sa thlap a ni.

- Zomawia Khiangte,

Goshen Home, Biate