HEI ZET LE KALPHUNG THAR CHU A NI MAI LO MAW!
An hotupa a nia lawm min ti an awm pawhin a awm tho e, politics a ni emaw, a ni lo emaw, tu pawh fak phute chu fak ila, sawisel âwm te pawh sawisel zel ila, siamṭhatna tur atan chuan a pawi lo e.
Kum chanve dawn a lo ni reng tawh mai, kan sawrkhar thar, ZPM sawrkhar kalphung thar, mipui Sawrkhar, Bana kaih tih te hi engtin chuan kan hotute hian hma an han la dawn ni maw? tiin ka lo thlir ve rân mai a. Kan Chief Minister berin Raj Bhavan Circular lown hmuna lakluh an nih ṭum khan, mahni in lama lawmpuitu ṭhianṭha, ṭhenawm khawveng lo nghak ṭhupte pawh tlan pel a, Chhanchhuahna Camp Tawngtai Bethel Camping Centre, Lungverh a pan ding nghal a, a zuk tlawh hmasa ber te kha 'Ram rorelnaah Pathian ram lo thleng rawh se' tih thu a ngaih pawimawh zia a tilang kha a ropui e.
Heng a hnuaia kan tarlan te hi kan sawi ṭhin a, kan la sawi tam tawk lo mah mah lo maw?
1) Hun rei lo te chhunga Health Care Scheme hnuaia damlote senso bill, Health Care bill tang ṭhup mai, Damlo ṭhenkhatte phei chuan la hman lo va, an thihsan tak an han chingfel duak mai te.
2) Sawrkhar leiba tam tak an han tlak duak thei te leh
3) Sawrkhar hnathawk te hlawh leh pension hlawh, thla chanve hnu lama la ṭhinten a hun taka thla thar tira an han la ve ta te.
4) Tar pension a let dawna an han tihpunsak thei maite hi. Hengte hi ZPM kalphung thar Sawrkhar hnathawh chu a ni mai lo maw?
Heng bakah Department hrang hrang ten, kalphung hlui her danglama hma an lakna te sawi tur a va tam em!
Sawrkhar hmasa hun laia Agri Minister in TELHAWNG FARM a buaipui viau leh, Supply Minister in CHAKAI FARM an buaipui viau ang te kha buaipui leh sawi zuipui lo va, thawktute ráwn chung zela kut hnathawktute chawk phur leh hamṭhatna tur zawnga hma an han la chho ṭan te hi, a thlamuanthlak khawp mai le!!
Tun ṭuma Supply Minister in ngun taka ngaihtuahna hmang leh, râwn tur awm te rawn chung zel a, CARD VAR siama Buhfai man tih danglam a'n tumte hi ṭhenkhatin namen lova an sawisel laiin, a ṭhat zawk tur thu chiangkuang taka hrilhfiah zel a nih bakah, Sawrkhar hmasa Sawrkhar chak taka Supply Minister Pu K Sangṭhuama ngei pawhin, hei hi chu a ṭhat zawk tur thu a rawn sawi chhuak hian a hrechiang thawkhat viau ni tur a ni. Sawisel mai lovin inṭawiawm zui zel zawk ila, chu chu kalphung thar hmalak tur dan dik tak pawh a ni.
Tun hnaia kan Chief Minister hmalakna te hi a va ropui em! Keini ang veng kilkhawr deuha awm tan leh rualpawl vak lo tan chuan, MHIP Golden Jubilee bial lamah hmanpuiin a thang mek em ni chu aw? Kan lo tih mek laiin Delhi tlangah Prime Minister hmuin, zing thingpuite an lo zuk in dun reng chu lo niin. Kan Zohnahthlak unaute Bom ho nge? Bangladesh lam aṭanga nunau thlaphang mangang himna zawnga min rawn bel lawm lawmtute, hmangaihna leh lainatna nei miah lova BSF Police ten an nawr let nawk nawk a ni tih thu an hriat chuan awm hle hle thei lovin, huaisen leh pa taka ṭawngchhuakin “Hei hi chu ka mawh a ni,” tiin tu mah pawh rawn lovin Prime Minister hmu turin Delhi a pan zui.
Prime Minister leh Minister pawimawh deuhte chu an chenna inah hmuin, “Heng kan unau, raltlan mangangte an sahimna zawnga min rawn bèltute hi ka thawn let dawn lo,” an ti tawp mai hi a va thlamuanthlakin, hotu nih a va tling riap riap tak em! Chu mai a ni lo, anmahni nel tak leh zah takin kan Zoram thlai thar, thei, Rawtuai, Sapthei leh Dragon Fruit thlengin puar nawlh tham thartem na chang zuk hriaa maw le! Thil hi a hlu emaw hlu lo emaw lam ni lovin, duhsak taka kan han inpekte hi a lawmawm a, inhriat zuina atan pawh a ṭha khawp a, kan hotute vai putar ho pawh an lawm khawp ang le.
India ram Sipai lalber General Upenda Dwivedi in khual ṭha thlena zanriah ei tura a lo sawm tak te hi a lawmawmin a va ropui em! Zoram hmasawnna tur leh kum rei tak Aizawl hmun laili laia Assam Rifle sawn chhuah tur chungchang thleng hian mumal takin an sawiho turah ngai ila, Mizo Scout Battn. din chungchang te, Sainik sikul thlenga an sawiho te hian rah ṭha a thlen i beisei ang u.
Engpawhnise, Zoram mipui tlemte tlangram boruak ṭha leh thengthaw taka chengten kan mamawh, Buh leh Bal, Thlai chi hrang hrang eng hunlai pawha kan chin theihna ram hi, kan pi leh pu Sailo lalten huaisen taka Syhlet leh Ghaziabad Jail thim thlenga thih chilhtute leh, thih huama an lo beih leh an lo humhim hi keini ṭhangthar fing leh hmanraw ṭha leh mi thiam awm tawhte hi chuan, Zoram thar i siam teh ang u.
Khawvel Indopui pahnih hnua Japan, South Korea te, tunhnaia Vietnam, Taiwan leh Thailand ramte an vawiin dinhmun anga an dinna a la rei lo. Ram hi huaisen taka hruaitu, mi ṭha, mahni hmasial lo leh corrupt loten an hruai chuan, hun rei lo te chhungin hmuh theihin a lo danglam mai ṭhin a ni tih, heng ram aṭangte hian a hriat theih mai awm e. Chutiangah chuan mipuite an hlimin hma an sawn ṭhin. Hawh u, fak phute chu chawimawia fakin, fin chhuah leh zilh ngaite chu hrilh zelin, rinawm leh taima taka thawk tur leh an thahrui tichak chung zelin, ZORAM THAR - KALPHUNG THAR, MIPUI SAWRKHAR - i siam ang u.
- Lalhmangaiha Sailo
Holy Cross Bakery, Ph : 9436360275