Sorkar hian inrenchem a tum em? A chhana Ṭhenkhat

January 14, 2015-a Vanglaini Editorial kha mipui rilru ni thei mai ni lovin mipui rilru a nih ngei a rinawm a. Sorkarin mipui lam aṭanga sum lak luh dan kawng hrang hranga a dap hi kan Sorkar sumbawm ruah dan ngaihtuaha thil tihawm tak, mah se sorkar hi mipui lama tuan si a, a thil tih lama inrenchem leh lem lova a khawsak chuan a dik lovang ti zawngin editorial hian a sawi a. Hei hi thil dik tak, sawi lan ngai hliah hliah niin a lang.

Kan hre ṭheuh a, Sorkar chuan kumin 2015 aṭang hian mipuiin ration buhfai an leina Rs 5.50 in a tisang a, tichuan tunhmaa ration buhfai kg 1 Rs 9.50-a lei ṭhin chuan Rs 15.00 a kan lei a lo ngai ta a. Hei hi a sawisel thiam deuh chuan a sanna hi a percentage zawnga sawiin a sanna hi za zela 57.89 daih a ni tiin sorkar an dem hle a. Bazar rate, buhfai kg khat Rs 25.00 - Rs 35.00 aṭanga chhut erawh chuan kg 1 Rs 15.00 a lei hi ala man hle zawk a, sorkar hian la hloh thoin a hlohna erawh chu a tlem ta deuh tih chauh a ni.

Hetianga sorkarin a tih chhan hi sorkar sum luangral hnem lutuk engemawchen tih tawp nana ti a nih chu kan hre ṭheuh a. Mipui lam chauh tawrh tir chu a dik love tiin sorkar pawhin a mi pawimawh leh pawimawh lo ni ṭhin a duhsakna “VIP quota” kan tih mai pawh a ti tawp nghal a. He VIP quota tih tawp aṭang ringawt pawh hian sorkar chuan buhfai quintal 670, chini quintal 167 leh khawnvartui kilo liter 16.75 (liter 16,750) thlakhat chhungin a hum dawn a. Heng hi kum khat zawnga chhut chuan buhfai quintal 8040, chini quintal 2004 leh khawnvartui KL 201 (liter 2,01,000) mipui tan a neih belh dawn a ni. Mipui tan a neih belh lo a nih vek pawhin hetiang zat buhfai, chini leh khawnvartui leina hi a hum dawn a ni.

Hre chiang lem lovin ṭhenkhat chuan miretheite’n buhfai man to hi an tuar dawn niin an sawi a. Mahse heng buhfai tona hian BPL leh AAY te a huam ve lo tih hi kan hriat a ṭha awm e. Anni hi chuan a pangngai rengin an buhfai dawn hi an khul chhuak dawn a ni.

A nih leh Sorkar lam hian inrenchemna leh sum hailuhna lamah engtinnge tan a lak dawn tak? Mipui lam sawr vakin sorkar hi chu inren lovin a kal pangngaiin a kal mai dawn em ni? Heng zawhna chhannate hi mipui tana hriat chak awm leh hriat tur a awm a nih chuan hriat ngei ngei chi niin a lang. Ka hriat theih chin chin sawi han tum ta ila.

Hmanni mai, kum liam ta mah nise thla hmasa mai khan Chief Minister’s Office chuan “Economy Measures and Resources Mobilization” a tih chu Office Memorandum (OM) hmangin a tichhuak a. Hetah hian Sorkar Department hrang hrangin sum an inremchem dan tur leh sum tam zawk an hai luh dan tur ruahmanna a chuang a. A zavai chuan kan sawi seng lo ang a, a tlangpui han tarlang ta ila.

(a) Department-te’n an mamawh an leina atana sum tam tak an sen ṭhinte chu Taxation Department kaltlangin ‘C’ Form te hmang ve se tih a ni. Hei hian sum sen a tih tlem ngei dawn bakah sum hman dan pawh a langtlang dawn a ni.

(b) Inluah manah hian sorkar hi ala inseng nasa hle a. Hemi tihtawp nan hian OM chuan tih tur sawi pahnih a nei a. Pakhatah chuan in an luah hawh laite a ṭul leh ṭul loh enchian a, quarters-te pension tawh leh sorkar hnathawk thi tawhte chhungkuain an la luah reng em tih enchian a, a ṭul anga hmalak a ni a. A pahnihnaah chuan Department ṭhenkhat hian ram zau pui pui luah sen loh an nei a. Heng Department-te hian ram leh in nei lo, Department dangte hnena pek dan ngaihtuah nise tih a ni.

(c) Awmze nei lova bungraw lei tam tak a awm a. Hengte hi hman an nih loh chuan write-off a ngai ṭhin. Heng hi ṭul lova sum senna mai mai a nih avangin Department-te chuan bungrua an lei danah fimkhur lehzual tawh se.

(d) Sorkar hnathawkte medical reimbursement hi sorkar sum senna ber pakhat a ni a. Hemi thilah hian Central sorkarin Health Scheme (CGHS) a kalpui ang deuh a sorkar hnathawk bikte tan health care scheme siam dan ngaihtuah.

(e) Commissioner/ Secre­tary ṭhenkhat chuan motor an kawl theih bak aia tam an kawl a. An kawl theih zat bituk, pahnih aia tam an kawl loh nana hmalak nghal.

(f) Chhawrna tur awm tawh si lo, mah se sorkarin an hlawh a la pek reng driver chuang 200 vel an awm mek a. Hengte hi ban ṭhen dan emaw, a mamawhtu sorkar Department a insem dan emaw ngaihtuah.

Hengte bakah hian rawtna tam tak duan chhuah a ni a. Heng rawtnate hi sorkar Department-te’n an bawhzui ngei a ni tih a chian theih nan sorkar Department-te chuan thla thum zel (quarterly) a an hmalakna chu quarter zo chiah thla kal mek chhungin an thehlut zel tur a ni tih a ni. Kan hriat ṭul ta zawk chu sum leh pai lama sorkarin harsatna lian tak a tawh avang hian sorkar chu a awm mai mai lo a ni tih hi a ni a. Sorkar ber a pachhiat viau chuan a tuartu chu mipui bak kan ni ngai lova. Chuvangin Chief Minister’s Office in OM a siam hi Department-te’n bawhzuiin an zawm em tih hi mipui lamin kan chhuipui hi kan mawhphurhna a ni a.

Ration buhfai man to te, tui bill sang chho te leh electric bill sang ve zel te pawh hi mipui hian kan thlir thiam a ngai a. Sorkara chhunluh tih tham nei si lo hi kan phunchiar mah mah em tih te pawh kan inenlet a ngai awm e. Kan hmuh thelh leh kan hriat ṭhelh ṭhin pakhat chu sorkar hian a hranpain sum a nei lo tih hi a ni. Sorkar sum kan tih te hi mimal leh company a chhiah hrang hrang leh thil siam chhuah leh ram pawn a thil thawn chhuah/ lakluh chhiah a chawi tirte aṭanga sorkara tlingkhawm hi a ni. Keini Mizote phei chu kan la vannei a, income tax te hi kan la chawi lo zawk a. Sorkara kan chhunluh ve chhun te lah sorkarin thil min tih sak man, electric eng min pek man te, tui min pek man te leh lei man tlemte kumtin kan chhun ve te hi a ni mai a. Heti khawpa sorkar tan sum lama thawhhlawk si lo hi kan phunchiar mah mah ṭhin niin a lang.

Kahhlum ni ta, America President hlui John F. Kennedy-an “Ka ramin enge min tih sak ang tih aiin ka ram tan enge ka tih ang,” tih a sawi kha hre reng ila. Sorkar kan sawisel danah pawh awmze nei, ṭangkaina nei, Sap hovin “Constructive criticism” an tih ang hi ching chho ila, kan theih ang angin sorkar ṭawiawmin puibawm ila, ram nuam leh ram ropui chu kan la luah ngei ngei ang tih hi a rinhlelhawm lo.