Ka thlakhlelh BSI

Vengpui lama ka chhuahvah changa ka hmuh ve leh zauh ṭhin BSI hi tunhma chuan chuti taka thlakhlelhna ka nei ngai lo a. Mahse, tuk khat chu a ṭhatna thuruk ka hmu ve ta tlat mai. Kan veng lamah lokal ve ṭhin se la aw... tihna rilru ka pu ta a. Ka hmuh fuh leh hun hun chu khawlai pawh ni se ka bia ang a, kan in lama lo kal ve ṭhin turin ka ngen ang ka ri rilru a.

Tuk khat chu hun remchang ka nei ta. BSI nen chuan kan intawng ta chat mai. A hmanhmawh hle tih chu hre mah ila, ka duhna te chu ka han hrilh hram a, a chanchin tawite ka zawt bawk a. "Unau pang kan ni a, a naupang ber dawttu ka ni. Ka nu leh pa chu kan khuaah an la awm a, kei erawh chu ka nau nen Aizawlah mi in luahin kan khawsa a, ka nau chuan a rem rem a thawk ve ṭhin..." a ti a.

A mi chhan dan aṭang chuan mi pangngai tak a ni tih a hriat theih a, amah hi hang ngaihnobei an tih ang hi a ni a, a pumrua pawh a te chhe lo. Sa inphut tawk tak a ni. Thingtlang lama an khua chu Mizoram hmar chhak kil lama awm a ni a, Aizawla an in luahna veng hming nen sawi lang lo mai ila.

Pian leh murna lamah chuan ani hi thingtlang lam chhuak a ni a, kei hi chu pi leh pu aṭang tawha Aizawl lam chhuak ve ngat ka ni. Chhuan tur erawh ka nei chuang hauh lo. Ani nen hian Pathianin Mizoah min siam a, ram khatah kan cheng a, Kristian kan ni ve ve a, chuti ni si inen mihrang tur kan ni em ni? teuh lo mai.

Inṭhenawm khawveng kan nihna aṭang te, Mizo kan nih tlan ṭheuh avang te, Kristian kan nih ṭheuh avang leh chhiat ni ṭhat ni a inmamawh tlang ṭheuh kan nih avang te hian inthliar hrang tur leh inhmusit tur kan awm lo hrim hrim. Ṭhenkhat lehkha thiam sang deuh, ṭhenkhat in leh lo ropui tak nei, ṭhenkhat sawrkar hna sang thawk leh pianphung fuh leh hmelṭha deuhte pawh kan lo ni thei. Kan nihna chapopuiin kan lo inchhuanpui deuh ṭhin pawh a ni thei a, Lalpa hmaah erawh chuan kan la inchhuang sual hle ta ve ang le!

BSI taimakzia te, a hawihhawmzia te, a inngaihtlawmzia te ka han hre chho ta zel a, inchhuan khum thei ka ni thlawt lo.

A tan thil tihsak theih ka nei ve a nih ngai chuan tihsak ve ngei hi ka bat niin ka inhria. A thla khat hlawh pawh sing hnih leh za tel fe a ni a, ka lawmpui hle. Damloh chang te a nei ve ṭhin ngei ang. Kan inah vawi tam a lo kal tawh a, lirthei a nei lo a, city bus-ah a chuan theih tawk chuangin a bak chu kein a kal mai ṭhin.

BSI nen hian kan dinhmun a inan riau chang a awm. A changin thlan tla hliamin a lo kal a, thli leh ruah sur changin a huh leh hluam a, ni sa leh ruahsurin a dang ngai lo. A lo kal lahin ka lo awm ngai lo a, a lehkha hi chu ka hmu ziah a, ka chhiar nawm fo a, ka khawhar min hnemtu ber a ni.

Chuvangin, an harsatnate hriatthiam puiin, chanchinbu semtute hi i lo duat ṭheuh ang u khai! A man te lo pe ṭha ila, 'I va chuti khati lo ve" ti mai loin, kan VIP-ah kan dah thei zawk ang em?

BSI ka tih pawh hi kan veng lama chanchinbu semtu - Biaksanga inngaitlawm - tihna lam tawi mai a ni e!