Zoram politics

Kan ram politics kalphung ngun taka thlirin, hnam damna leh ram hmasawnna kawngah hian a beidawn thlak hle a ni. Mahni hamṭhatna zawng loa ram leh mipuite ṭhatna tur duhtute chuan party politics luhchilh loa pawn lam aṭanga siam ṭhat theih a ni lo tih an hria. Mipui rorelna dik tak siam theihna kawng awm chhun chu party politics luh chilh hi a ni.

Kan ram politidcs hi a kal dik lo a, her rem a ngai a ni. Kan politician-te hian politics hi mipui rawngbawlna thianghlim a ni tih an hai der a, mahni tan hausak nan leh ropui nan an hmang a, thu neihna chu sum siamna tur emaw an ti a, sum chu inlei lal nan hman tur emaw an ti bawk.

Kan aiawha kan thlan lalte hian mipui hmasawnna tur lam aiin anmahni lam an in dah pawimawh zawk avangin an chungah rinna kan nghat ngam lo a ni. Mi hausate an hausa tual tual a, miretheite erawh kan rethei tulh tulh a ni.

Zoram hian kalphung thar a mamawh a, mipuiten kan dikna leh chanvo dik tak kan chan theih nan rorelna fel leh ṭha kan mamawh. Sorkar chu mipui te ta, roreltute chu mipui aiawha ding, mipui chhiahhlawh a ni tih pawmtu politician hi kan ramin a mamawh e. Ram hmangaihtu dik, pasalṭha mi huaisen inlar a hun e. Hlemhletna kawnga fihlim, hmathlir nei ṭha tak takte u, ṭhut ngawih reng a hun ta lo; intel khawm a, he ram leh hnam tana kawng tinrenga hmasawnna tur ngaihtuah a hun e.

Mipuite hian politics hi kan ngaihtuah lem lo a ni maithei, mah se politics hian mitinte min ngaihtuah a, min nghawng vek a ni. Kan ram leh hnam hian nang kha a mamawh che a, a au reng che a ni tih hria la, Zoram tan rawn pen chhuak rawh le.