HOTUTE KAMCHHUAK

Ni 15.1.15 (Thursday) Mizoram sorkarin zu zawrh leh in phalna dan a hman ṭan ni taka Vanglaini chanchinbu chhuakah Mizoram sorkar hotu lian Pu Hawla leh Pu Ziraten Kuthnathawktute Ni hmannaa an thusawi an rawn ziak a. Vawi hnih vawi thum ka chhiar nawn hnuah he thu hi ka rawn ziak ve a ni.

Kuthnathawktute nia a thusawiah hian Pu Hawla chuan mi ṭhenkhatte hekna avangin NLUP an sem dan chungchangah Central sorkarin Mizoram sorkar chu in sawifiah tura a tih thu a sawi a. NLUP hi sawifiah leh sawi fel ngai flagship programme a va ni tehlul em? A dawn thleng a lei, Chrismas hmaa sem chuan... an bawng dawn an talh chuan a talhtute chu... Pu Hawla ka ngei aṭang hian Central thleng thla kher lo NLUP chungchang sawifiahna hriat tur a tam tawh khawp mai. In duhsakna hmanraw chung chang sawifiah nana Bible chang a rawn hman hi a dik khawp mai. Mahse, Pathian thu behchhana Pu Hawla thusawi tam tak hi eng vang nge mi ṭhenkhat hian awih loh chana an chan tlat.

Synod Social Front-in NLUP chungchang an zirchianna thu a rawn tarlang thla diat diat a. A dawngtu mipui zingah za zela ṭhena engzat nge party mi leh sa ni a, eng zat nge party nihna nei lo tih erawh chu a hmaih leh tlat lawi a. A dawngtu zinga za zela sawmkua pariat chu party mi leh sa (chu pawh Congress party mi vek. Rs 2 an pek vek hmel a?) Tin, za zela 98.3 in NLUP hmangin eizawnna nghet an neih theih an inrin thu a sawi bawk. Ka hriat phak chin a dawngtute hmalakna aṭang ringawt pawhin hei hi chu a ṭhelh chian hle ka ring.

Hlemhlet leh kut tling loa sum lak luh kawngah a fihlim thu chu a hun leh hun loah pawh sawi mai zel angin tarlan a ni bawk. Eiruk kawnga fihlim leh kut faite hi anmahni insawifiah lo mah se ṭhenawm leh an hnathawh puiten an chiang mai ṭhin. Pu Hawla hian a dinhmun leh nihna hi a chian em avangin a nih anga lang chhuak lo tura insawi mam hi ṭulin a hria nge hetiang thu a sawi hi chhiar tur a awm leh ṭhin. Lengpui Airport hmun tur buatsaih laia Department driver pakhat thusawi, “Compensation la tur ṭhenkhat hi chuan ser kung khat pawh nei loin ser kung tam tak man an dawn hmel e," a tih nghe nghe kha.

Mizote chu Chanchin Ṭha hril tura Pathiah koh kan nih thu leh India ram chu kan thu hrilna tur a nih thu a sawi te hi amah ngei hian ngaihtuah nawn thei se. Chanchin Ṭha hril tur hian Chanchin Ṭha la hre lote sakhaw serh leh sang khawih leh an tih anga tih hmasak kher a ngai em ni? Sum ngainat chu sual tinreng bul a nih thu leh sum ngainatna bawiha tluk luh hlauhawm thu sawi fo siin N.L.U.P hming vuahin sum a sem reng bawk si a. Thawk mang loa sum neih tumna thinlung NLUP hian Mizote rilruah tuhin a hre lo nge, Pu Hawla hruai party-in sum leh thil dang sem hmanga mipui hip an chin aṭang chiahin a thlawna dawn tumna rilru hi kan nei nasa niin a lang. “Sum ngainat reng reng loh tur, Congress party-in sorkarna khawp vote a hmuhna tawk chauhin sum chu ngainat tur,” a tihna zawk em ni!

Pu Hawla hi mi hnunga kal loa hmahruaitu nih tum mi niin ka lo hria a. Hemi nia a thusawi vang hian ka hre ṭhelh tih mau chungchang a sawi leh mau hman ṭangkai dan zirtir tura Taiwan mite an chah mek thu a sawi aṭangin a chiang tlat mai. Mau leh a sawngbawl dan, ram hmasawn theihna tur a nih chungchangah hi chuan tu emaw hnungah a kal tih hi amah ngei pawn a phat ka ring lo. Kuthnathawktute chu mi zahawm leh pawimawh, an puala ni hman phu reng a nih thu bak hi he mi ni hian a sawi tam lo nge ziah kim loh zawk? Kuthnathawktute hmasawn dan tur, an tana ṭanpuina emaw ruahmanna sorkarin a siamsak lam reng reng a sawi lo em ni? Kuthnathawktute mamawh leh an lawmna tur lam a sawi loh chuan a kaihhruai sorkara VIP te an va lunghnur mai awm em!

Hemi nia thusawitu dang Pu Zira pawhin Kuthna­thawktute Ni an hmanna a tel te chu an nalh hlawm mah maha a hriat thu leh kuthnathawktu tak takte tel ve se a duh thu a sawi a ni awm a. Kuthnathawktute tan nalh a thiang lo em ni? He mi ni hian an tel ve lo reng em ni? Tute nge he ni hmang tura kal khawmte chu ni ta?

NLUP dawngtu, a tak taka hnathawktute fuih thar nana hman a hlawkthlak zawk tur thu a sawi bawk a, Aizawl ni lo hmun danga hmanna zawng zawng pawh kuthnathawktu tak tak tel loa hman a nih chuan hun hlu tak khawhralna a nih a hlau a ni ngei ang. Engpawh nise pehhel awm loa rilrua awm ang sawi mai chi mizia a nihna hi ka ngaisang reng reng e.

He thu ziaka ka buai mawlh mawlh laiin chhiah pe tura kal a ngai tih ka hrechhuak a. Kan in, kan hmun lo ram ngai reng 2013 - 2014 atana Rs. 1634 /- kan chawinaah kum 2014 - 2015 atan chuan Rs. 4004/- chawi a ngai tih kan hriat chuan ka phu zawk a. Eng vang nge heti em ema a pun? Damlo thih hlauhawma awm chu thisen an khaisak ṭhin alawm ti rilru chungin ka pawisaah sain a daih lo chung puk belhin chhiah ka pe ta a ni.