Chanchinbu ṭangkaina
Krismas leh Kumthar inkarah hian chanchinbuten karkhat zet chawlh an hmang ṭhin a, chanchinbu chhiar ṭhin tan chuan a khawharthlak ṭhin hle.
Hei hian chanchinbu ṭangkaizia leh a loa kan awm theih lohzia a tichiang hle. Chanchinbu ṭangkaizia hi mi tam takin an ngaihtuah ngai meuh lova. An duh lai an chhiar puat puat a, an dah leh mai ṭhin. Chanchinbu hi mipuite rawngbawltu pawimawh tak a ni a. Thil chi hrang hrang min hrilhtu a ni a, sorkar chetla vel min hrilhtu a ni a, Mizoram, India ram, khawvel chanchin thar ber ber min hrilhtu a ni. Sorkar thupuan, advertisement, sorkar thupek min hrilhtu ber a ni bawk.
Mimal advertisement kan hriatna hnar ber a ni a, entirnan:- Vanglaini ngatah pawh hian tui in tur, motor hralh duh, lei duh, in hmun hralh duh leh lei duh, hmingthlakna leh a dang chi tinreng a tam mai. Thuziak miten nasa takin an finna an pho chhuak a, music lam, sport lam thu tam tak kan hriat phah bawk, sawisen a ni lo. Tunlai phei chuan a lem (picture) nen min hlui thei tawh a, a bengvarthlak mai ni lovin a hmuhnawm tel bawk a ni. Heti taka chanchinbu pawimawh leh ṭangkai hi ngaihhlut nachang kan hriat a ṭha. A man te hi pek hreh tur a ni reng reng lo.
Nikum lamah khan Mamit aṭangin phai lama kal chanchinbu mite Gauhati thlenna chungchangah duhthusam lo thil a thleng a, khang te kha a pawi hle. Chanchinbu a ṭangkai kan tih hian a enkawltu Editors etc te an pawimawh em em a ni. Minister, MLA, Officer te anga sum pe chhuak chi ni lo mah se mipui tana an rawngbawlna hi ngaihnep chi a ni hauh lo. Ṭhenkhat chuan sorkar tluk hiala an dah pawimawh chu chanchinbu hi a ni.
Hetiang taka pawimawh a nih avang hian chanchinbu i la chhiar duh a nih rau rau chuan a lak man chu zangkhai takin pe mai rawh. Tin, chanchinbu hi chhiar thuak thuaka dah chhe mai lovin vawng ṭha ila nakinah en duh hun a lo thleng leh thei a ni. Mi tam takin an duhzawng thu ngaihnawm deuh a awm loh ṭum chuan an chhiar ṭha peih lova, lehkhachhiaah an chantir thuai zel, hei hi thil fel lo tak a ni. A pawimawh lai tak chep thlaka vawn ṭhat te hi a ṭangkai hle.
Chanchinbu pawimawhna hi i hre thar leh teh ang u. Heng holiday, Krismas leh Kumthar vuakvelah te hian chanchin chhuak regular tihte hi chhut fo teh. Chanchinbu man an khawn changa phun ṭhin nih ai chuan chak taka petu nih mai hi a ṭha zawk.