DUHAMNA ṬHA LEH ṬHA LO

Khawvel hnam tin zingah mihringte nun chu duhamnain a chawk buai ber a, mi dikte duhamna chuan thil ṭha a thlen a, mi dik lote duhamna chuan thil ṭha lo a thlen ṭhin. Mi dik leh rinawmte duhamna chuan chintâwk a nei a, mi duhamte duhamna chuan chintâwk a nei lo. LALPA’N thil ṭha ti tura a din mi dik leh rinawmte chuan thil ṭha ti turin hma an la zel a, an hmalaknain thil ṭha a thlen chu mi tam takin a zar an zo ṭhin. Thil ṭha loah erawh chuan an inveng fimkhur ṭhin.

Mimal duhamna ṭha lo avangin khawvel indopui pakhatna a chhuak a, indopui pahnihna pawh duhamna ṭha lo avangin a lo chhuak tawh bawk. Khawthlang ram sorkar zingah Russia-in Ukraine lak tumin a tibuai reng a, China pawhin Taiwan thliarkar lak tumin a tibuai reng bawk. Khawvel indopui pathumna tichhuak mai thei an ni ta. Heng buainate hi a lo chhuahna chhan chu anmahni ram awp chinah an duh tawk mai lo va, a aia ram zau zawk awp beh tuma duhamna ṭha lo an neih vang a ni.

Duhamna chin tawk nei lo mihring (mahni hmasial)-te chu hringnun kawng tinrengah hmuh tur an awm a, chutiang mite chu politician-ah te, sawrkar hnathawkah te, tualchhung inrêlbâwlnaahte tam tak an awm. Chung mite chu mi tluk loh khawpa ṭawngkam thiam, an ngaihtuahna thianghlim si lote an ni. Sa pêltuin mi hmuh loh laia sa a kap ang mai hian mi hriat loh hlanin an hmaa sum lo kalte chu thiam tak maiin chin tawk awm lovin inhaivur nan an la peng ṭhin. Mipuite lah chuan chutiang mite chu kan ngaisang zawk a, an bula awm mi dik leh rinawm chu che thei lovin an siam ṭhin. Mi hnialkhân thiam tak an nih bakah an hun leh tha te, an sum leh pai lamṭang siam nan an ren loh avangin hnung zuitu an ngah hle ṭhin a ni.

Eizawnna nei ṭha lo chhungkaw harsa ve tak takte zingah pawh duhamna ṭha lo thinlung pu an awm ve tho mai. Chung mite chuan thawhrimna te, tawrhchhelna te, lungawinate an tlachham a, vawi leh khatah cheng sang tam tak hmuh tumin, ruih theih thil chi hrang hrang an zuar ta ṭhin a ni. A sawhkhâwk chu na tak a ni; ni tinin kan ṭhalaite an thi zawih zawih ta mai a nih hi.

Duhamna ṭha thinlung pu chungin duhthawh taka hma kan lakna turte chu Mizo tlawmngaihnaah te, thawhrimnaah te, faina kawngah te, Zo nun mawi chawi vulnaah te, eirukna donaah te, mi dangte ṭanpuinaah te, nun kawng dik inzirtirna kawngahte an ni.

Kan neih rosum hun hlu zawngte,

Mite’n an thlir i hlan ve ang;

Ṭanpui ngaite zawng ve ila,

Chutin kan nun a hlim ve nan.

- H. Neihchungnunga, Durtlang