Zoram tan khua a thim tual tual em ni?

Ṭhalai, nu leh pa, pi leh putena kan nghahhlelh leh engto ber chu Zoram khawvar hun a ni. Rambuai lai khan Zofaten khawvar hun nghakin vai sipai leh MNF sipai inkarah thin thi lovin kan lo awm tawh a, rambuai a zo va, Zoram chuan hmel thar hmu mah se a hmu chin a va tawi em.

UT aṭangin State-ah hlankai kan ni a, hnamdangin min chimbuai ta lo chu: hmasawnna a zuana zuang awm tak a nih laiin mawnga charbeh ang maiin a awm ta tlat mai hi a va mak ngai em? MNF zalenna sual dan khan sawisel a hlawh viau a, mah se MNF lam erawh chuan sawisel an duh bau lo. Vai chauh khan Mizo kut an lo thlak em ni? tihte hi chhui tham a ni.

Mizoramah, Mizo ngeiin ro kan rel a, hmasawnna zawng kan hmu na meuh mai, mah se Pu C. Pahlira (RIP) leh Pu Ṭhenphunga te hi Zoramin nei lo ta ila, kawng nei mumal lo leh kawlphetha siamchhuah tumna nei lo hian kan lo awm reng lo’ng maw tih te hi ngaihtuah a ngai viau mai.

Kawngpuia motor mawng inzawm put hi hmasawnna a ni lo tih kan chian tluk zetin mimalin in sang tak tak a nei pawh hi hmasawnna a ni lo tih kan hre vek a, kan kawmthlang Tripura chuan kawlphetha a hman sen loh a thar chhuak a, khawsak phungah chuan kan rahbet a ni. Chutiang khawpa khawsak sang si chuan engati nge Tripura CM, CM zawnga rethei bera ngaih si khuan hmasawnnaah min khum tlat thung le?

Mipui hian ram hruaitute kan beisei dan chu mipuite ei leh ina ṭam lo leh, hmasawnna hrang hranga hmasawn hi a ni awm e. Buh kan thar chhuah te, kawlphetha kan thar chhuah te, kan thlai leh kan ran te hi ram pawna thawn tham chu sawi loh, a rama chengte mamawh takngial pawh kan la nei thei lo te hi tu mawh nge? Sorkar sum hi khawihah nge a kal?

MLA pakhat chanchin an sawinaah chuan, “A MLA chhung zawngin a lainate hna a hmuhsak vek a, pa fing tak a ni,” an ti a. Tunah hian a la MLA zel si a, mi engzah tak hna hmuhsak tawh ang maw? Police dept a kut vung tamzia te, pianphung aṭang pawha Police dept aia Supply dept a thawk awm hliah hliahten Police dept a an han thawk ṭutte hi thil mak nge thil nuihzathlak? Hnathawh kawr kan haktirten heti hian a ni maw hna an lo thawh ṭhin?

MPC, MNF, Congress an sorkar tawh a, kan mamawh leh kan tlakchham a la ngai reng! MNF khan pawisa an lo sem tawh a, mah se term khatah khan an hnathawh tur ang zawng zawng an thawk zo ta duak emaw tih turin an term hnihnaah kha chuan hnathawh tur alawi pawh an hre lo lek lek a ni.

Rev. Chanchinmawia thihnain Zoram a tuam laiin inthlan a ni a, MNF chu chiang takin paihthlak an ni. Congress-in PM special package aṭangin NLUP nuai khat min lo zawrh bawk nen, Congress chu nalh takin an han tling a. NLUP an han sem tak tak chu sorkar hnathawkin hlawh lak tur an nei lo a, contactor-in hna a thawk zawm thei lo a, sum che vel chu a ṭhu tawp a ni ber mai. NLUP nuai khat dawng kim chu Congress fa, sorkar hnathawk leh khawsak nuam tak pawh khan an la vek awm e. A bang zawng chu a mamawh nia an hriat hnenah cheng sing hnih velin an han sem leh a - Prime Minister pawh a lu a hai ngawt ang!

Nuai khat a tih chhung khan kawlphetha, road tax, petrol, nitin mamawh engkim a to nghal vek a, chhungkaw pa ber hnen a thlen meuh chuan thla hnih chhungin a zo a ni der mai. NLUP dawng tam takin an kawngkhar lu chungah an NLUP trade thlan an tarlang ngam lo pawh hi a mak lo. Nuai khat dawngte lah hian an hmalak tawhna sa tihluih ni awm takin chanchintharah an han tarlang a, purusen to tawh dan ngaihtuahin a intu lo viau.

Tualthahnate hian mihring sualna nasat tawhzia a entir a ni ringawt lo, sorkar inrelbawlna balhzia a entir bawk a ni. Officer chenna in kan hmu a, a hnathawh nen chuan a inmawi viau, mah se work cultural-ah chuan eiruknain zung nghet tak a lo chelh reng tawh si a. Pulpit phena biru ṭhin khan pulpitah damna a hmuh tawh loh avangin doctor lehkha a zawng chung zel a ni lo'm ni?

Khehpuam a lo lar khan, tualthahna hi a thleng dawn chauh tiin chiang takin ka lo ziak tawh. Congress sorkarin a mawng lang rawtin NLUP ah sorkar sum a dahsawn a, central aṭanga pawisa lo kal se, a awmna chin hriat loin a bobil zung zung a, scholarship pawh a hunah kan dawng thei lo hi a mak ka titawp thei lo. Zirlaite pawisa dere pawh hi sorkar hian a khawih peng thiangah ka ngai ngai lo, mah se MSU khan pawisa a awm tawh thu leh semchhuak turin sorkar nawr lo ta se, 2014-ah scholarship hi sem a ni ang em? NLUP atan te hian kan scholarship dawn turte hi a lo ṭhu reng lo ang maw?

MZU a hnalak dan dik loh avanga MZP hmalaknaa Aizawl College zirlaiten Mizora University main gate kan dang a, khang thilte kha kan lo ti lo ang tih ka hlau - a hnathawkte pawhin MZU inrelbawl dan dik lohna an sawi nasa em mai!

Sorkarin a manifesto lian ber tihhlawhtlin a tumna lamah dan leh hrai pawh a zah thei lo, police dept thlengin an ṭam a. Sorkar hnathawkin hlawh an la thei lo a, contractor pawh an chet theih tawh loh avangin thingtlang kawng pawh a chhe hle a ni.

Kan khawsak a sang tawh a, nitin mamawh a lo sang ve zel bawk a. Sorkarah hna han thawk dawn ila, hmelhriat neih loh tan chuan hna hmuh a har tawh si. Hnain min daih loh avangin ṭhalaite lu a hai a, pawisa inlaksak tumna avangte hian mihring nunna pawh kan zah zo tawh lo a ni. Kan kawtthlerah Whisky, Rum, Vodka, Beer lei theia a inphochhuah hunah phei chuan engtiang taka nasain nge tualthahna hi pung ang le? Chuvangin, mahni inchhung in rel fel a pawimawh tluk zetin sorkar ṭha kan thlan chhuah thiam pawh a ngai. Nuai khat hi engtikah mah kan dawng kim vek dawn lo, chu ai chuan nuai khat ka dawn hmain mi engzah nge tualthi tiin lo chhut ta ila, kan tisual lo mai thei.

Sorkarna lo chelh tawh zawng zawngten tun dinhmun hi min hruai thleng ta. Rambuai lai kha chuan hnamdang nen kan indo - tunah erawh Mizo kutah Mizo ruang kan hlawm ta fo mai, Zoram tan khua a thim tual tual? Kan hmaikawr ṭheuh phelin, Mizoram tan ram i dai thar leh teh ang u.