Kum 2015 bandh huaihawt loh kumah aw

Kan Chief Minister chuan Mizoramin sum leh paiah hun khirh tak a hmachhawn mek tih a sawi chamchi a, tun hnaiah ṭul bik thilah lo chuan sorkar hna thar lak leh lirthei lei a khap thu a sawi bawk.

Sum leh paia kan state harsatna hi inrenchem policy hmanga sutkian a tum mek niin a lang. Food Civil Supply & Consumers Affairs Department pawhin tuialhthei leh eirawngbawlna gas inrenchem a ṭulzia in zirtirna tun hnaiah an buatsaih a, kum 2015 chu inrenchem kumah kan puan a ṭul hmel ta hle.

Hemi rual hian sorkar aṭanga mipui­te'n man tlawma kan dawn, buhfai, gas, electric, tuialhthei leh thil dangte hi sorkar pachhiat loh kum pawha inrenchem reng ngai a ni.

Sorkarin sum leh pai dinhmun siamṭhat a tumna hian mipui a nghawng zel dawn a, hei aia nasa leh chhe zawk hian min nghawng lo ang tih tu nge sawi thei? Kan dinhmun a chhiat em em lai hian sorkar laka lungawi lohna lantir nan emaw sorkar kar nan pawl hrang hrangte'n bandh leh strike emaw mipui eizawnna nghawng thei thil huaihawt lo ngam ila a duhawm hle.

Mipui eizawnna nghawng thei bandh emaw strike neih hi state pachhia nen a inhmeh lo a, sum leh paia sorkar chetchhiatna hi mipuite'n an taka kan tawrh ṭan tawh avangin bandh leh strike avanga tawrh lehzel hi Zoram mipuite'n kan phu lo. Hei vang hian kum 2015 chu bandh huaihawt loh kumah puang ang u.

Bandh neih a nihin a tuar nasatu chu sorkar hnathawk leh sumdawng liante ni loin nitin eichawp zawnga hnathawkte an ni a, a tuar turte hmaa thupha chawi chunga tihtur tih tlang tho hi mipuite'n kan kham tawh.

NGO emaw poli­tical party te'n bandh an huaihawt hi mipuite'n kan thlawp lo a, mah se sorkar hnathawk leh school naupang tan chawlhna remchang a nih avangin an sel lo mai zawk a ni. A tuartu nitina eichawp dapte hian auchhuahna remchang an neih loh vang zawkin bandh hi kan haw lo emaw tih chi a ni lo.

Pawl tihhming-ṭhat tum vanga sorkar tihmualphona atana bandh huaihawt hi mipuite'n nasa takin an tuar a, bandh avanga kan thil hloh hi a huaihawttute thupha chawi hian a rul zo lo nasa.

Sorkar khalh ngil tuma pawl anga hmalakna atan platform hrang hrang a awm a, tunlaiah chuan print media, electronic media leh social media thlengin kan hmang thei tawh a ni. Mipuite pawn chhuak thei loa khap bet a, bandh huaihawt hi dan palzutna a ni a, sorkar tihdik loh avanga tihmualpho tumna leh khalh ngil nan bandh aia rintlak, platform dang zawng ngam ang u.