KUM HLUI 2014 KHA
Kum 2014 chu tuma hman theih tawh loh turin a her liam ta. He kum chhung hian Mizoramah thil thleng tam tak awm mah se sawi vek sen an nih dawn loh avangin a langsar zual tarlang ta ila. Ngaihdan a tam a pawm dan pawh a tam; thim leh eng lama sawi lan te pawh a inang lo nuaih mai thei. Chuvangin, he kum chhunga thil thleng lian tham nia ka hriat a tawi thei ang berin han tarlang teh ang.
Chhiat tawh chungchangah kum hmasa 2013 lamah Zoram buaipik lai pawh ni si loah Saikhumphai hal khuk luih luih te, fimkhur tawk loh avanga Laipuitlang leitawlh tuara mi 17 lai nunna chan te, Mizorama thil thleng zen zen lo Tawipui ‘N’ a mi pakhatin in khata cheng pathum lai a thah anga Zoram deng dawt thei chanchin awm chiah lo mah se, Zoram pumah chhiatna chi hrang hrang thleng sawi tur a awm nual tho mai. Chhiat tawh avanga chhungkaw khata chengho mi pathum thihna ṭum thum a thleng a; ṭek dun hlum pawh pali lai an awm a ni. Bekang leh pa eisual avanga natna leh thihna hial thleng te pawh sawi tur a awm nual. Natna pangngai loa thihna thlentu tam ber chu lirthei chetsual kaihhnawih a ni awm e. Kum 9 mi vel inawkhlum pahnih lai awm chuan ngaihtuahna a tithui hle.
Thingtlang lo nei an tlem zel a, buh thar chhuah erawh kum hmasa aiin 2% zetin a pung a ni awm e. Kum dang angin chanchin thar luah tam lo mah se beidawnna karah NLUP hmalakna chuan harsa tak chung pawhin hma lam a la pan niin a lang a. Kuthnathawktute thawh rah zinga pakhat Red Oil Palm pawh a sawrna khawl thar hmangin seng ṭan a ni bawk.
Sum lamah chak tawk loh avangin Sorkar hmalakna tur tam tak chu a kal tur angin a kal thei lo a. Sum hman lama inrenchem hmalakna zingah hna thar siam leh lirthei thar lei khap te chu a langsar zual an ni. Sorkar hnathawk a hun taka hlawh lak theih loh avanga buai fe fe pawh an awm. Sikul kai hun sawn hma tumna lo awm chuan inhnialna tam tak a siam a, ngaihtuah chhunzawm tura dah a ni awm e.
Kum 2014 chhunga chatuan ram pan tate zingah KṬP a din tirha hnarkaitu pahnih Nl Zokhumi, Orgazining Secy (Pu J. Lalsangzuala, Minister hlui nupui) leh Tv Vanlalkunga (Pu), Assistant Secretary te leh Mizo hnahthlak zinga Master of Engineering hmasa ber Pu Clement Lalrema te hriat hlawh zual an ni awm e. Mizoram Premier League a khel ṭhin vanduai ta Tv Peter Biaksangzuala (Bethlehem Vengthlang FC) kha a ni; a thih thu hian Mizoram mai ni loin India ram leh khawvel pawh a fan hle a ni.
Kum 2014 chhung hian chanchin thar luahtu a ṭha lam leh chhe lam langsar zual nia lang 10 ve ve thlan chhuahte chu:-
Khaw eng lam
1. Santosh Tropy Mizoramin dawng
2. Dr. T. Ao Football-ah Mizoram an Champion
3. MPTP aiah MLPC Act hmang turin Dan siam thar a ni.
4. Sikul kai hun ṭan hma turin hmalak a ni.
5. Larsap 4 hmel kan hmu hman, a thim lam pawh a ni mai thei?
6. Mizoram Cabinet Meeting chuan Polytechnic 6 hawn belh a remti.
7. Buh thar chhuah 2% zetin a pung
8. Kut hnathawktute hlawhtlinna pakhat Red Oil Palm thar ṭan.
9. NLUP chhunzawm zel.
10. Tuikuk helhoin 2013 tawp lama mi 3 Mizoram chhunga an ruk bo chhuah a ni.
Khaw thim lam
1. Tek denhlum 4- Sialhawk khaw mi 2 leh Hmunnghak khaw mi nufa chu tekin a deng hlum.
2. In kang - Putlunga sih (in 12) , West Phaileng (in 3), Sesawngah (in 4), Champhaiah (in 2, mi pakhat a thi), Vairengteah (in 1 mi 3 thi).
3. Tuia tlahlum - Tuirivangah (naupang 2), Mar luiah (mi 2)
4. Pa eisual - Ngaizawl khuaah chhungkua a cheng mi 3 thi
5. Bekang eisual - Bungtlang 'S' leh Aizawlah bekang eisaulni a rin mi 4 thi.
6. Lirthei chesual - Siarang bul sumo chesual tum 2 ah mi 4 thi, Mel 3 bul car chesualah mi 3 thi, Sialsuak bul truck chesualah chhungkaw khat a cheng 3 leh Silchar lama cheng mi 2 an thi.
7. Lei chim : Sairang - Lengte inkar leh Tuipui - Darzokai lei chim nunna chan 1 leh hliam awm nual
8. In awkhlum : Naupang kum 9 vel mi 2 a in awkhlum
9. MPL a khel Peter Rosangzuala chetsual (thi) chuan Zoram a deng a, Indian news pawh a luah hle.
10. Thihna dang deuh: Kawnpui daiah nupa ruang chhar, Durtlang mibo zawnna lamah mi 2 in nunna hloh, Saiha veng pakhatah TV en duh zawng inan loh avangin unau in vawhlum..
Kum 2015 hian enge a her chhuah pui ang a her liam pui bawk dawn le aw? Pu C. Lalhneha, Lunglei Chanmari-II pawh December 20 khan kum 2014 chuan he leiah hmuh tawh loh turin min herliampui chu a ni si a; he thuziak pawh hi amah sunna ni mai teh se.