Retheihna chapopui ṭhin
Hnam chapo, engteh chiam ni chuang si lo kan ni. Mi retheite hmangaihtu Pathian tih kan changchawi a, Mizo tam tak hi chuan kan retheihna hi kan chapopui hle zawk niin alang. Mi hausa apiang biak an nuam a, an inngaitlawm zawk hle tawh a, a rethei thei hi a chapo po kan ni.
Mi tam tak hi chuan kan retheihna chhuanlamin dân bâka khawsak emaw, dânin a phal loh pawh tilui thei tlat angah kan inngai ṭhin. Aizawlah hian a ni bik zual em tih a ngaihtuah theih. Kawngpui kam, mipui kea an kalna turah inzawrh phal loh, thil zawrh pho awi loh tiin thuneituten hman aṭangin thuchhuah an siam fo a, mi tam tak chuan mi retheite eizawnna tihchhiatsak a, mi hausate chauh ngaihtuahah thuneitute an chhuah ṭhin. Mi a retheih avang leh, a eizawnna a hniam avanga mipui leh vantlang tana harsatna siam thei a nihna a awm bik lo.
Kan retheihna chhuanlama dân phal bâk chêt tum hi a ṭha lo a, retheihna chapo a ni. Chutihrualin retheih avanga kaikun a, zak tak leh inthlahrunga awm tur tihna a ni lo, dan leh vantlangin kalphung leh tih ṭhin kan neihte hriain, chumi zuia kal ve mai ṭha a ni. Retheite chanvo leh chanai mi hausaten an lain, min chhuhsak nia kan hriat chuan dân a awm a, chumi hmanga beih mai tur a ni. Court-a ukil rawihna tur pawisa ka nei si lo, tih a ngai lo, sorkarin ukil rawihna tur nei lote tan ruahmanna a siam vek tih hria ila.
Sum hmuh a pawimawh a, kan khawsakna atana thil ṭangkai leh pawimawh, a loa kan awm theih loh a ni. Retheihna chhuanlama hmanga dân phal bâk thil tih erawh Pathian pawhin a duh hauh lo. 'Keini chu kan rethei a, bul ṭanna tur pawh kan nei lo a' tia ruihhlo zawrhte hi mi hausa ei rute nen Pathianin a duh loh dan chu a inang rengin ka ring. Tam tak chuan kan retheihna kan chhuanlam a, mahni intung nung a, taima taka thawh aiin, retheihna hmanga mi thil neih laksak dan kan ngaihtuah ṭhin.
NLUP hi thil ṭha tak a ni a, bul ṭanna nei lote tan bul ṭanna ṭha a ni. Chutihlai chuan mi tam tak chuan NLUP pawisa an dawng a, an dawn chhan aiin, an awh zawng lei nana an hmang daih mai hi chu a zahthlak a, sorkarin pawisa a pe zui lo fo pawh hi sorkar ka thiam hle. Hetianga dik lo taka NLUP pawisa hmang ṭhintute bawk hi rethei chapo kan tih ang hi an ni hlawmin ka hria. Retheihna chhuanlama midangte tana harsatna siam hreh miah lo, mahni phu tâwk sit tlat si an ni duhin ka hria.
Taima taka thawk, mahse dinhmun a tleu laklawh vangte, sorkar inrelbawlna fuh tâwk loh avangtea ding chhuak thei lo emaw, harsatna ziaawm thei lo an awm. Heng mite hi ngaihtuah an ngai a, sorkar leh thuneitute hian an hlamchhiah reng a nih chuan a dik an thinrim rawn so chhuah hun a rapthlak hle ang. Thuneitute hian mi retheite hi an VIP tak takah dah se, a sawia sawi ringawt lo hian an duhsakna lantir se la, an tan kawng sialsak se, an chanvo tur dik tak an chan theih nan politician leh hausate hi hlau lo se a duhawm khawp mai.