Hmeichhiate tan mahni invenhim
Ram hmasawn leh changkang apiangah hmeichhiate dinhmun a ṭha a, chutiang bawkin mi fing leh mithiamte leh mi puitling apiangin hmeichhiate hlutna an hria a, an zah der thiam. Hmeichhiate hi vulnerable persons zinga chhiar kan ni a, hei vang hian ram hrang hrangah Women Empowerment te pawh nasa taka an beih fo ṭhin ni.
Mizoram pawh hma kan sawn chho zel a, hmeichhiate dinhmun pawhin nasa takin hma a sawn a, hmeichhia kan nih vanga innek chepna vel chu Mizoramah hi chuan a awm vak lo a, a lawmawm hle. Hmeichhiate chhaih nawmnah kan ni ṭhin hi chu a pawi hle a ni. He thil hi engtia tih chi nge ni ang tiin ka lo ngaihtuah ve ṭhin a, kan thil tawn aṭanga ka hriat tak chu hmeichhiate hian kan thiamlohna lai chen hi a awm ve a ni. Min pawmpui leh pawmpui loh chu ka hre lo a, hei hi chu mimal ngaihdan ni rawh se.
Ṭum khat chu kan College-ah ka ṭhianpa nen kan titi mawlh mawlh lai chuan ka mawng hi an lo beng a, ka ngaihdan a ni lo khawp mai a, ngawih liam ka tum a mah se a hnu lawkah chu pa chuan hmeichhe mawng te chu ben vel mai mai tur a rawn ti leh ta zui a. Ka thinrim ka insum zo ta lo a, ka ṭhianpa ka hrilh a, keimah ngeiin ka hau dawn ka ti ta a. Chu pa hnenah chuan ka lungawi lohzia leh khatiang zawnga hmeichhe dang pawh ti tawh ngai lo turin ka hrilh ta a, he pa hi hmeichhe chhaih hrat tak a ni a, mah se hemi ni aṭang hi chuan kei chu mi chhaih leh ta ngai meuh lo a, ka lawm hle. Tin, kan Asst. Professor pakhat pawh hi tlangval pahnih hian an lo chhaih nawmnah deuh a, ani chuan chu mite hnenah chuan chutiang zawnga hmeichhiate chhaih tawh lo turin leh dan hmanga a hrem theih thu thlengin a hrilh a, an zak khawp mai; an chhaih leh ngam tawh miah lo. He mi aṭang hian hmeichhiate hi keimahni ngeia kan inven him hi a lo hlawk hle a ni tih min hriattir.
Mizote hi khawtlang leh Kohhran rawngbawlhonaahte awm khawm luih luih ṭhin kan ni a, hetiangah hian mipa tam zawk chuan hmeichhia an nel zawng deuh han kuah vel thuak thuak ching hi an tam hle. Hei hi thil mawi lem lo tak a ni a, midang lo hmuh ve atan pawh hmuhnuam lo tak a ni. Hetiang hmuna lo awm ve kum upa lamte pawh an zahawm a, sim a ṭha hle in ka hria. Kan innel a, kan inkawm ngeih tlang a nih pawhin inkuah kher loh te, in pawm kher lo te hian hna hi a thawhho theih reng a ni.
Tin, nupui nei tawh tan phei chuan khawtlang leh rawngbawlna hmunah nula han kuah vel emaw han chhaih vel te hi thil zahawm lo tak a ni. Hetiang kawngah pawh hian hmeichhiate hian kan lo hnar thiam a ngai hlein ka hria. Amaherawhchu, kan ngaithei miau a nih chuan han tih theih vak awm lo a mah se ngaihthei lo tlangpui ila ka la ti fan fan duh. Kan lo ngaithei viau a nih chuan mipa dang dangin min zuam palh a hlauhawm hle a ni. Tin, khatiang ang vek tur khan hmeichhiate kha min lo ngai thei a, a ṭha lo hle. Hemi kawngah hian in zah der tawn thiam tura hmalak ṭheuh kan ngaiin ka hria. Hmeichhiate hi kan inven thiam a ngai hle a ni.
Tunlaiah chuan mipa fing leh puitling apiangin hmeichhia an zah der thiam a, an ngaihlu thiam bawk. Hetiang ang mipa bula awm chu a himin a hahdam thlak hle a ni. Mahse hetiang ang mipa hi Mizo zingah chuan a tlem zawk an la nih avangin hmeichhiate hian mahni him nan hma kan lak ve zel a ngai a ni. Inchhaih nazawng hi a huatawm miah lo, mah se chutiang ni loa ṭawngkam mawi lo tak, zahmawh rawng kai leh taksa in khawih sak zawnga inchhaih ang chi hi chu ngawih liam pui mai loh a ṭhain ka hria. Hmeichhiate zahawmna hi hmeichhiate kutah a awm a, kan vawn him tlat a pawimawh hle a ni. Mipatena min zuam mai mai lo tura kan awm thiam a ngai a, keimahni hian kan in veng him ve thei a ni tih hi hriat a ṭha.
Hemi kawngah hian kan dikna leh chanvo te hi kan hriat ve a ṭul hle. Kan Constitution hian hmeichhiate dikna leh chanvo hi a ngai pawimawh a, keini hmeichhiate pawh hian kan ngai pawimawhin kan ngaihven ve a ṭul hlein ka hria. Hmeichhiate zahawmna tinep tur emaw tibo tura chhaih nawmnah hi IPC Section 509 hnuaiah kum 3 thlenga lung in tantir leh pawisa chawi theihna a ni tih hi a hmei a pain kan hriat a ṭha hle.