An Man A, An Chhuah Leh Mai Zel A! ('Bail' chungchang)

Mi ṭhenkhat ngaih danah chuan, thil sual 'criminal offence' (tual thah, rûk rûk, pawng sual, kut inthlak, inrawk leh thil sual dangte) ti-a puh man an niha, tân ina tâng ta mai lova, a hnu lawka khawlaia zalên taka an lêng hmuh an nih hian Court leh police lamte kan dem rum rum ṭhin hi thil hriat chian tâwk loh vang a ni.

Mi nawlpui hriat thiam danin han sawi ila. Hetia mi nawlpuiin an hriat dana mi sual nia puh man an nih hnu deuh lawka lung ina tang lova kan hmuh leh ṭhin hi BAIL-a chhuah an nih vang a ni; thu buai chu court-in a rêl tak tak hunah pawi khawihtua puh thil tih chu finfiah a ni ang a, he hunah hian thiam loh chantira hrem emaw, thiam chantira chhuah zalen tak tak emaw a ni chauh dawn a ni.

'Bail' chu thu buai sawi tak tak hmaa lo chhuahtir lailawkna hi a ni a; thu buai sawi tak tak huna inlan ngei ngei tura thil dahkham (security) neia pawi khawihtua puh lo chhuahtir lailawkna a nih chu.

Thil sual tia puh, mi tu pawh man an nih hian an chungchanga thu tawp Court-in a siam hmaa lo bail hi thil tih ngei tur a ni zawk a ni; Supreme Court phei chuan inhremna ang ziazânga pawi khawihtu nia puhte bail dilna lo phalsak loh ngawt hi a theih loh (Bail cannot be withheld as a form of punishment, the Hindu July 8, 2024, pp. 12) a ti a; inchhuah lailawk phalsak loh hi pawi khawihtua puh, a sualna finfiah hmaa 'mi ṭha, pawi sawi lo' ni si chu hremna a ni ringawt mai, tiin Court sang ber chuan a lo sawi tawh a ni.

"Ram danpui Article 21-nain a sawi anga pawi khawitu nia puh chuan a chungchang thu chu khel vat a nih theih nan court pawh huamin State emaw, hremna lama ai awhtu (presecuting agency)-in a dikna chanvo a humsak thei lo emaw, a pe thei lo emaw a nih chuan, a pawi khawih chu a nasa lutuk a ni tih ṭanchhan vang ringawtin a bail dilna chu dodal tur a ni lo. Article 21 hmanna hi pawi khawih nasat emaw nasat loh emaw lam a ni lo," tiin Justice J.B. Pardiwala leh Ujjal Bhuyan ṭhutna bench chuan a sawi (Op. cit.).

– Dr J.T. Vanlalngheta