TUTE NGE PASALṬHA?

Hmân laia Mizo Pasalṭhate kha sa kâp thei, ral donaa huaisen leh mi hrât khawkhêng, khawtlangin a thlamuanpuite an ni ṭhin. Tunlai hunah erawh pasalṭha hrilhfiah dan pawh a lo danglam ta. Sa kâp thei leh ral dova a ṭul huna che chhuak thei kan mamawh tawh lo. Pasalṭhate kha mi dangte aiin an danglam bîk avangin an lawr bîk ṭhin a, mite chawimawi leh fak phut vanga thawk an ni lo. Mi dangte dai loh ram dai a, a hniak tam lohna lam huaisen taka zawh ṭhin mi an ni a, khawtlangin an thlamuanpui hle ṭhin. Tunlaiah hian Pasalṭha ni turin kan hma zawn ṭheuhah tih theih kan nei, kan ram kan hnam, kan khawtlang tan thangchhuah thei turin theihna kan nei vek. Nang eng nge i tih ve theih le?

Tun ang huna Pasalṭha ni tur chuan silai neih a ngai lo va, dan lova silai nei phei chu thlamuanpui tham an nih loh chu sawi loh, man theih hial an ni ta! Thil a lo danglam zo ta a, tunlaia pasalṭha nih theihna ber chu eng nge ni ta ang le? Ram leh Hnam, Kohhran leh Khawtlang tana thlamuanpui tlâk nun kan nei em? tih hi mahni inzawh fo a va ṭha em. Hmânlai chuan Pasalṭhate kha khawtlangin an thlamuanpui a, tunlaia pasalṭha ni tur chuan phût let nei lova tlawmngaih chhuah te, dikna leh rinawmna nunpui te, mi ṭangkai nih tum te, mi huaisen nih te leh adt hi pasalṭha nihna tur atana nunpui tur pawimawh tak a ni.

Hmânlai nen chuan kan khawsak phung a danglam ta hle a, kan chhungkaw tan pasalṭha kan ni em? kan ram leh hnam tan, kan khawtlang tan, kan kohhran tan thlamuanpui tlâk nun kan nei em? Engtin nge chu nun awhawm tak mi dangte thlamuanpui tlâk nun chu kan neih theih ang? Pasalṭha ni tura hlen ngai leh nunpui ngai tia kan sawi tâk nei tur khian tu nge pawimawh ber kan tih chuan, keimahni hi kan ni. Keimah aṭanga bul ṭan ṭhat emaw, insiamṭhat emaw, mi dangte zai ngai chung zela a ṭul huna a hun leh hmun zir ang zela huaisenna neih te, dikna leh rinawmna nunpui tura thlauhthlak ngam nun neih te, thil dik lo do let ngam khawpa chan ngam te, phut let nei hauh lova tlawmngaih chhuah te leh a bâk tam tak a awm.

Pasalṭha ni tur chuan danglam ngam a ngai a, mi tin hian kan nunkawngah duhthlan theihna kawng zau tak kan nei ṭheuh a, a chhe lam leh a ṭha lam thliar hrang thei vek kan ni. Hmânlai Pasalṭhate kha a hniak tam lohna lam kawng an zawh avang leh nun huaisen leh tlawmngai, mi hrât khawkhêng an nih avangin an danglam a, thlamuanpui tlâk nun an nei reng a, tunlaiah erawh chuan a chhe lam kawng phei zawh nuam kan ti a, a ṭha lam kawng chho kan zawh peih tawh meuh lo va, kan thil ṭha tih mi dangten an hre lo ang tih kan hlau emaw tih mai turin, sawi nuam ti ber ber kan ni ṭhinte hi inen let fo kan ngai. Fak leh Chawimawi phut lova a taka thawh chhuah tum tlat mi, kan Pasalṭhate hniak hnung zui zel tur kan ni tih hi kan hriat nawn fo a ṭul.

Ram leh Hnam, Khawtlang leh Kohhran tana thlamuanpui tlak nun kan neih theih nân Pasalṭhate nun dan hi entawn ila, ni tin kan nunah hian a ṭul ang zelin seng luh kan tum ve tur a ni. Khawtlang pawhin a thlamuanpui leh ram tana mi chhenfâkawm ni tur hian mi dai peih loh dai fo a ngai a, phut let nei lo nun neih a ngai a, thil dik lo do ngam khawpa huaisen a ngai a, a ṭul huna chân ngam te, inpeknate a ngai. He Pasalṭha nihna kawng hi kawng awlai a ni mai lo va, kawng pik leh harsa tawn ngam a ngai. Pasalṭha nun ngaihsanawm tak, mi dangte pawhin an thlamuanpui nun nei tur hian nang leh kei hi kan pawimawh ber. Mi dangte tih atana ti mai lovin, kan ram leh hnam, kohhran leh khawtlang tan eng nge ka tih ve theih tih te hi mahni i inzawt fo ang u. Mahni nun ṭheuhah pasalṭhate nun awhawm leh ropui tak hi seng luh tum ila, mi dangte tana innghahna leh thlamuanpui tlak nun kan neih theih nân i inzir zel ang u.

- Vidpuia Hrahsel