Sun control a bel theih ta

Kan ram hruaitute ka thlawp vena chu sun control bel lamah a ni a, car thar lei lamah chuan ka thlawp lo a, pawisa ka nei lo tlat. Ka car hlui chu sun control bel ve ngei ka tum a, February thlaah hlawh lak ve leh ka bel dum leh kâk mai dawn a ni. A chhan pali chauh ka han sawi ang e.

(1) Vanglaini lama kan lo hmuh fo angin sun control bel leh bel loh hi Supreme Court thu a lo ni daih awm a, anni hi chu an lal ber ber khawp a, hnial ngam chi a ni lo. Mahse a chinchang hre deuhin an han sawi chu Supreme Court duh dana kal dawn chuan kan nitin khawsak phungah hian thil tam tak tihdanglam a ngai a, Supreme Court duh dan diak diaka kal hi a harsa an ti. Chuvangin sun control vuah leh vuah lohah hi chuan inthurual ni si lo inhrethiam chungin i bawhchhe mai teh ang u, a ninawm e mai.

(2) Sun control vuah chu motor-a zin chi tan chuan ngeiawm no. 1 a ni. Keini ang thla khata vawi hnih vawi thum zin chhuak tan chuan zin kawng tihrehawmtu a ni ve asin, hei hi a zin ṭhang lo chuan in pawm lo mai thei a, han zin ve tak tak ula a darkar a darkara nisain direct tak maia min chhun chuan ninawm tak a ni. I sun control ang u.

(3) Khawpui chhungahte hian a eng emaw zahthlak deuh a nia lan fiah kûk hi. VIP-te'n sun control an vuah leh sap sap hi ka hrethiam khawp mai. Aizawlah phei chuan traffic a jam nasa si, VIP light invuah ta chu kan han bih duk duk a, a chhunga ṭhu hi an lai thei khawp mai. Ṭum khat chu VIP car hnungah hian bucket leh chawhmehte a awm ve ṭûn mai a, a bulah VIP pakhat chu suit leh necktie nen a ṭhua a inhmeh lo hle.

(4) Motor kan lei ve a, duh anga cheibawl theih loha min thunun hi a ninawm. Sun control bel dum phal lo, parda zar phui tlat phalte hi a va han ho, chuvangin in lak strick vakna chi pawh a ni lo.

Ka ṭhianpa Mum­bai-a zin chuan Mumbai-ah sun cobtrol invuahna motor a la hmuh nual thu a sawi a, chuvangin Vairamah pawh an lo zawm vek lo tih a hriat tawh a, kan VIP te vuah thik vang lam ni loin i vuah dial dial mai ang u. Traffic Police pawh kha in pawi kan sawi chuang lo a, Supreme Court pawi sawina a ni chauh zawk sia min lo zuk hek kher lo ula. Min man dawn chuan VIP motor in man a ngai a, in man ngam dawn si loa chuvangin 'sun control a bel theih ta' tih puang si loin heti hian inhrilhru sup sup mai ang aw!