Hmasawnna hi khaikhin chi a ni lo

Mizo pa fing ve pawl tak tura ka ngaihte hian, "Congress sorkar chuan phul lem phah chiah an thiam a, thil dangah hmasawnna a awm lo. Phullem phahna atan sum hmang lo hian a aia ṭangkai zawkah hmang rawh se," tihte hi an sawi ṭhin a, a sawitute hian mahni mawng an hlim ni berin ka hria.

Sorkar sum che vel hre chiangtute chuan sum hi duh duhna atana hman theih a nih lohzia an hria a, a hmanna tur bik a awm a, chu chu thiam taka hman chuan hmingṭhatpui theih a ni a, hman ṭhat loh chuan hmingchhiat phahna thlen thei a ni a, hei hi tuna Congress sorkarah kan hmu.

Tun hmain Sports Minister dang kan nei fo a, anni hunlai khan artificial grass hi a la chhuak lo a nih pawhin a ngaihna chu hre deuh se ṭhen­awm Manipur leh Tripura-te hi sports infrastructure lamah hian kan awt ngawih ngawih lo ang.

Grass phah vangin Mizoram kawngpui hi a chhiat phah lo a, kawngpui chhe bawk khelmual chhe bawk neih ai chuan, khelmual ṭhaa kawngpui chhe neih chu a la ṭha zawk. Hman deuha gas a vante khan artificial grass phah theia gas pawh sem thei lo tiin mi ṭhenkhat phun Facebook lamah ka hmu a, gas pawh sem thei lo artificial grass pawh phah thei lo neih hi a la hlauhawm fe zawk asin. Hmasawnna awm hi hmasawn lohnalai awm sawi chhuahna atan aitsik niawm taka sawi chi a ni lova, lawm viau tur zawk a ni asin.

Grass phah ngawr ngawr hi ka sawimawi dawn lo, department pakhatin hma a sawn chuan kan lawmpui tur a ni, phunchiarna hmanruaa hman chi a ni lo. Intifing taka, "Chumi pawh ti theia chumi ti thei mang si lo," tihna chi a ni lova, "Hemi kawngah hi chuan fak an phu a ni, helam kawngah hian ṭan han la thar leh thei phei se a ṭha lehzual ang," tin hi kan sawisel dan tur a ni ang.

Mipuiin kan hriatthiam loh zawk chu sorkar sum harsatzia min hrilhtu berten an car la chhe hlei lo thlakna atan car thar man to an han lei vel hi an demawm zawk daih. Ngawi mai mai se a ṭhat nen an la insawi thiam zuah zuah a, ngawih hun hi hriat a ṭha. Hmasawnna hi khai khin chi a ni lo a, pawisa ren tura min tituten an ren lohna lai erawh hi chu kei pawhin ka sawisel lo thei lo.