Kum 2015 aṭang chuan...

1. Sawrkarin ration buhfai leina man a ti to a. Chuvangin, ration buhfai chu mihring tana ei tlak leh quality ṭha chi chauh chawlut tawh ila, fair price shop aṭang pawhin a buk tling ngeia hralh ni se.

2. Mirethei leh harsa zawkte damloh nikhuaa pan rawn ber Aizawl Civil Hospital hi tihchangtlun leh tihlen zel nise. Natna khirhkhan bik thilah lo chuan Referral Hospital Falkawn pan kher ngai lo se.

3. Ram hruaitu zin haw Airport-a inhmuah bûng bûng te, khawilo an zin kualnaah senso hautak zet maia official leh party worker-ten motor tam taka zui duah duah ṭhin hi sim tawh ang u.

4. Car man to a ni emaw, sawrkar bungrua leh hmanrua reng reng, a ṭul tawpkhawk leh mamawh ngawih ngawih bak lei belh tawh suh se.

5. CSS leh RMSA hnuaia thawk te, Muster Roll-a thawk pawh nise; sawrkar hnathawk hlawh reng reng a hun takah pe thei turin ṭan lak ni se.

6. Phul lem phah kawngah leh sports infrastructure/ discipline hrang hrangah hma kan sawn chak ang hian ei leh barah te, inkalpawhna kawngpui ṭha nei thei tur te, ram mipui himna tur te, power hnianghnar zawka neihna kawngah te, thianghlimna leh hriselna chungchangah te, mipuiten chhiah chi hrang hrangah phurrit kan phurh lohna turin chak taka hmalak ni se.

7. Sawrkar hian state pawna hna zawng tura ṭhalaite fuih fo hi ‘mahni mawng hlimna’ a ni tih hriain sim tawh se. Ṭhalai lehkha thiam leh thiam lote tan state chhungah eizawnna siam thei turin ram dang leh state pawna Company te, Industry leh Factory te ko lutin ram chhung ngeiah bul ṭan ve tawh ang u.

8. Khawtlang mipuiin Idol leh Icon chawimawia kan hlut ang hian, UPSC leh MPSC level-a tling tharte hlut nachang hre tawh ang u.

9. Thil man reng reng sawrkar hian a ‘rate’ siam felin uluk takin ‘control’ tawh sela. Eng thil man pawh a zuartuten an duh hun hunah tisang tawh lo se.

10. Aizawl khawpui lun laiah tun ai hian inthiarna hmun tam zawk siam nise. Vantlang zun ina lo e mai ṭhin te, zu funna leh damdawi bur ruak hnutchhiah ṭhinte hian sim hram tawh se.

11. Social media hmangsualtu chhuichhuah kawngah kan Police-te ṭuan a ṭhain an fakawm a, social media hmangsualtute chu an phu tawk hremna pek zel ni se. Chutih rualin Police bakah Kohhran leh NGO-te hian social media hmang ṭhintute hnenah uar leh zualin Awareness Campaign beihpui thlak teh se.

12. Traffic jam hi Aizawl khawpui nunphung tikhaihlaktu ber a nih avangin khawpui chhung kawng sira workshop hnawk zual 42 hi khawpui daifemah sawnin, motor parking nei lo office 49 zet awm mekte dinhmun enfel bawk se. Nilenga mahni dawr kawt leh office kawta motor park ṭhinte hian zing leh tlaiah driver-te in hruai tir mai se, Traffic Jam a ziaawm phah ang.

13. Thingtlang mipui, a tak taka kut hnathawk ṭhinte hi a tam zawk chu sapṭawng leh vaiṭawng thiam lo an ni a, department dawr dawnin harsatna an tawk a, ṭawng thiam an hruai ṭhin. Chuvangin, kut hnathawktute kaihhnawih Head of Department-ah Mizo ṭawng thiam ngei dah ni se.

14. Kohhran hrang hranga rawngbawltute hian Biakin leh an chenna in inkar chauh rawngbawlna hmun a ni lo tih hria se. Khawi hmunah pawh awmin eng hna pawh thawk se, an miziaah hai rual lohin rawngbawltu an ni tih hriat theih teh se.