Witness Statement lak chungchang

A hmasain Mizoram Police-te hnuchhui kawngah leh misual man chhuah kawnga in hna thawh hi khua leh tuite hian kan thlamuanpui tak zet a ni. In hnathawh chhuanawm tak hi tun hnai pawikhawihna hrang hrangah pawh hian hmuh tur tam tak a awm a ni.

Ka sawi duh erawh chu, ropui taka hnuchhui a, misual man chhuah ngawt hian hremna a thlen thei ngawt lo tih hi a ni. Tun hnaiah Republic Veng tualthahna rapthlak tak thlengah leh Zarkawt tlangval, Mawitea thih chungchangahte leh case dangah pawh a ni awm e, abik takin naupang leh hmeichhe thuhretute statement lak chungchangah hian Case IO te hian dan ngaih pawimawh loh lian tak an nei ta nual mai a, hei hi a pawimawh em a, investigation ti-rintlak lo thei thil a nih bakah hmeichhia leh naupangte dikna chanvo bawhchhiatna lian tak a ni tih chu inhriat thiam tho ka ring a ni.

Section 160 Cr PC ah chuan hetiangin kan hmu - Police officer’s power to require attendance of witnesses. (1) Any police officer making an investigation under this Chapter may, by order in writing, require the attendance before himself of any person being within the limits of his own or any adjoining station who, from the information given or otherwise, appears to be acquainted with the facts and circumstances of the case and such person shall attend as so required : Provided that no male person under the age of fifteen years or woman shall be required to attend at any place other than the place in which such male person or woman resides.

Republic Veng tualthihna chung changa naupang witness an koh dan phei kha chu rapthlak a kai lek lek zawkin ka hria. Sikul-a a awm lai Police Form famkim nena inthuamten an hruai ni awma sawi a ni a, zan khawthim thleng pawh khan an la rawn hawntir lo tihte a ni leh ta zel a ni. Chutiang bawkin hmeichhe ṭhenkhat ṭawngkamahah pawh witness statement pe tura nileng leh zan rei tak tak thlenga Police Station a an awm ṭhin thu an sawi hriat a nih fo mai.

Tun hnaiah veng pakhat, YMA hruaitu’n veng nula ṭhenkhat witness atana an koh, nileng leh zan rei tak tak thlenga Police Station lama an lo charhbeh chungchanga a lungawi loh thu a sawite hi ngaih pawimawh hlawh se a ṭha ngawt ang. Mipui thlamuantu tur leh misual man chhuah nana dan anga hnathawk turten hetianga an ti zawk tlat hi a vanduai thlak a, hmeichhiate leh naupangte dikna chanvo danin a humhalh sakte bawhchhiatna lian tak a ni tih loh rual a ni lo.

A thuhrimah midangte (kan sawi tak hmeichhia leh naupang ni lo) pawh nise witness statement lak tura koh a nih tawh hnua nileng leh zan rei tak tak thlenga Case IO an nghak ṭhin a nih chuan... hei baka witness harass-na hi a awm dawn emaw ni le(!). Statement lak dan hrim hrim khan Section 160/163 CrPC hi a kalh tawh hrim hrim a dan hmaah engmah a ni lo ang tih a chiang. Section 160 hnuaia kohte hi reasonable expense pek pawh hi Police Deptt hian in tih tur leh hetiang hi kan Police uisathiamte hnuchhui dan a nih tlat chuan misual man chhuah kawngah hian mipuite hian kan thawhpui duh lo che u hun a la thleng ang tih a hlauhawm hle a ni.

Hetianga hmeichhia leh mipa naupang kum 15 hnuai lam station a koh chingte hian Constitution Article 21 an bawhchhia a, a tuartu tan damages claim theihna thil a ni a, Supreme Court leh High Court direction an bawhchhiat mai bakah Police leh mipuite inkarah thawhhona a tichhe thei bawk a ni tih hi hmuh hmaih chi a nih ka ring lo.

Hmeichhia leh naupangte dikna chanvo hi kan ngai pawimawh lo a nih pawhin hei erawh chu ka sawi hram duh, khatianga dan loa statement lak kha Defense Lawyer te hian ching chhuak sela, thil pawi tak a thleng ang. A chhan chu investigation kalpui danah khan dan bawhchhiatna lian tak a awm tawh sa hrim hrim a, thilsual titu (accused) hrem mipuiin kan duh em em kha awlsam tein a chhuak daih thei a ni. Hman deuh khan Aizawl veng pakhatah chhun en leh khaw laiah vai pakhatin Mizo nula pawng sual tumin nasa takin a pawt a, mi ṭhenkhat lo awm hnaiten an chhan hman hlauh a, a him ta a ni. Kha case-ah pawh khan lo lang chiang ta chu Section 354CrPC (outraging modesty of women) chauh IO-in a charge niin a lang a, khatih hun lai khan Criminal Ammendment Act 2013 kha kan la hman loh avangin Bailable Offence a ni a, Court a produce a nih velleh khan Court chuan bail-tu a hmuh chuan bail-a chhuah ngei ngei kha a bat a ni. Bail-a chhuah a nih hnu khan a tlanbo zui ta niin ka hria. Eng vangin nge attempt to commit rape (U/s 376/511 IPC) an charge loh tih hi zawhna lian tak a ni. Chuvang chuan Case I.O-te hian investigation lak chungchangah hian dan (Cr.P.C) tih tur leh tih loh tur a sawite hi ngai pawimawh ta sela, mipuite hian kan thlamuanpui lehzual ang a, misual pawh dan ang taka hrem a nih ngei ka ring.

A tawp ber atan a chunga hmeichhia leh mipa naupang kum 15 hnuai lamte Station a koh chingte lakah hian dan (Cr.P.C leh Constitution) bakah Supreme Court-in direction a siamte a kalh avangin an chungah departmental action lak ni sela, a tuar tawhtu naupang leh hmeichhiate (hriat theih an la nih chuan) hnenah pawh a tawk fang zangnadawmna pek ni bawk sela. Tichuan, Police-te leh mipuite hian misual man chhuahna kawngah thawhhona ṭha zawk kan neih theih ngei ka ring a ni.

Ngun taka ngaihtuah chunga dan anga hma i lak ngei ka beisei.