Khawmpui lian neihna atan Hall lian/rally ground kan mamawh
Mizo kan nih vanga khawmpui leh puipunna lian tham huaihawt ching kan nih a rinawm lo a, mahse mihring kan nih vang zawka pungkhawm ngai kan ni tih erawh kan pawm vek awm e.
Mizoramah hian kohhran, tlawmngai pawl, political party leh zirlai pawl hrang hrang a tam hle a, khawmpui leh rorelna inkhawm lian tham tak tak pawh kan huaihawt zing mawlh mawlh hle. Hetihlai hian mahni pawl puala puipunna hmun nei erawh sawi tur an awm mang meuh lo a, pawl lian tak tan lo chuan puipunna hmun neih hi a har reng a ni.
Hetiang kan nih vangin kohhran leh pawl te'n khawmpui an huaihawt dawnin veng/khua khelmual-ah pandal sak chawp a ngai a, pandal sak nan thing leh mau bakah a chei nan sum tak kan mamawh piah lamah ni 4-5 vel khawmpui neihna tura ṭhiah leh mai tur pandal sak nan sum tam tham tak kan khawhral ṭhin a ni. Kan khelmual ṭhenkhata football khelh nan bika phul lem phah a nih hnu ngat phei chuan khawmpui leh puipunna dang atan kan buai ṭan tawh niin a lang.
Hun lo la awm zel tura kan hlawkna tur ngaihtuahin puipunna hmun hall emaw rally ground kan mamawh ve ta niin a lang a, khaw tin mamawh erawh a ni loa, mahse district khawpui zawng zawngah erawh awm thei se a duhawm hle.
Hemi atan hian kan sorkar emaw kohhran liante che chhuak hmasa se a duhawm hle a, pawl leh kohhran te'n mawi chawia an hman tur hall emaw rally ground kan siam thei a nih chuan kan buaina tam tak kan tinep thei dawn a ni. Rally ground hi kohhran leh tlawmngai pawl te chauhin an mamawh lo a, state sorkar leh political party te pawh a mamawh nasa zual an ni. Sorkar pawhin kût leh ni pawimawh hrang hrangte lawmna huaihawt ṭhin a ni a, hemi atan pawh hian rally ground chu kan thil mamawh a ni.
Puipuinna atana hall lian emaw rally ground kan nei thei a nih chuan kan khelmual neihte infiamna mite tan kan serhhransak thei ang a, kalphung awmze nei kan siam theih phah bawk ang.
Mizoram UPC chuan an kohhran assembly neihna atan Zonuamah Assembly Centre an nei niin ka hria a, an entawn tlak hle. Kohhrante hi khawmpui huaihawt ṭhin kan ni a, nakin hun lo la awm zel turah pawh khawmpui la nei zel tur kan ni. Mizoram UPC te'n Assembly Centre anmahni puala an siam hi an bengvar hle a, kohhran dang te pawhin kan thei a nih chuan entawn ang u.