SUAL A NI LO BIK EM NI?

Sual, thil sual leh thil dik lo titu, ram leh khawtlang hmelma kan tih hian eng chen chiah hi nge kan huam tir a, eng thil chiah hi nge sual kan tih a, tute hi nge ram leh khawtlang hmelma, thil dik lo ti a, khawihtute an ni tia kan sawi ber a, eng ang mite hi nge misual hmuha kan hmuhte chu ni le?

Heng ang zawhnate hi mahni ṭheuh pawh han inzawt ta ila, a ni lo zawng leh a dik lo zawnga awma khawsakna hi sual chu a ni a. Zu leh ruih theih thil chi hrang hrang hi thil sual chu an ni a, a zuar ṭhinte hi ram leh khawtlang hmelmate chu an ni. Mahse heng thil titute ringawt hi mi sual, thil sual titu leh ram leh khawtlang hmelma an ni ngawt bik lo.

Kohhran pakhata, an evangelist pakhat ka mi hriat chian, elcetricals bungraw lam dawr nei chuan pulpit tlang aṭangin ruihhlo laka fihlim lote hi hmusit tak leh kohhran hmelma angin an sawi a. An zu zawrhna aṭanga an sum hmuhte pawh sum thianghlim lo, kohhran thawhlawmah leh sawmapakhat atan pawha pek tlak loh ang hialin a ṭawng khum fo a, a dik ve reng mai. Ka rilrua rawn lut chu, he thu sawitupa hian a nih dan tur dik tak pela a pung uma a let hnih, let thum (Maximum Retail Price) rate aia to daiha dawr thil a zuar ṭhinte hi sualah a ngai lo bik em ni tih hi a ni.

Retailer hmasa lam a miten an enkawl laiin BPL buhfai kg 35 kan lak/ khulh ṭhin a, a buk a dik thei khawp mai. Mahse tunah erawh chhungkaw pangngai tak, an nu ber pawh an kohhran nu pawla nihna nei leh an pa ber pawh an kohhranah mai ni lo, NGO-ah pawh nihna nei a, ruihhlo do pawh nuam ti tak chhungkuain an enkawl ta a, a buhfai lakna (Fair Price Shop) retailer hna an han lak hnu meuh chuan a buk a tlin lohzia mai chu sawi ngaihna pawh a awm lo. An teh fet thiam khawp mai. Dik lo taka buk lung khaia, buhfai sem kha sualah an ngai lo bik a, thil dik lo titute zinga mi an ni tih an in hre duh miah lo nia!

Mipui chan tur sum lo eiruk te, sorkar sum dik lo taka lo chheprel te hi sual kan ti a, kan do a, heng ang mite hi kan hmu sakhi a, ruihhlo zuartute hi midang nun chhiat pawh hreh lo, midangte hmangaihna nei lo an ni tiin kan hmusitin, an chenna in hial te kan kalh sak a. Veng aṭang te kan hnawt chhuak hial ṭhin a, chutih laiin dik lo taka tehna buk lung khai a, a MRP rate aia to daiha dawr thil leh thawmhnaw te, in chhungkhur mamawh chi hrang hrang zuar ṭhinte hi thil dik lo ti a, khawihtute angah kan ngai leh der si lo hi a mak ka ti deuh ṭhin.

Thil a nihna ang tur dik tak pela kan tih hian sual kan ti a ni tih hi kan hriat a ngai. Bible-ah chuan, 'Fel lohna zawng zawng hi sual a ni,' tih a ni. Fel lohna chu eng nge ka hre ṭheuh. Tichuan, fel lo taka thil titute hi thil sual titute chu an ni tihna a nih chu. Chuti chuan a man dik tak aia toa thil zuar ṭhinte pawh hi thil sual titu, ram hmelma an ni ve tho.

Sorkai laipuiin thil man tur fel fai taka a bithliah laia chumi ang lo deuh, a aia to deuh leh a black ang tea thil zuar ṭhinte hi ruihhlo zuar a, ruk ru a, mi pawikhawihtute nen hian danglamna an nei lo a, thil sual titute vek an ni.