Witness Statement lak chungchang kha

Ni 9.1.2015 zana kan chhungkaw chunga chhiatna rapthlak tak lo thleng avanga min lainattute, a ṭul apiang min thawhsaktu mi hrang hrangte leh kan thlavang hauhtute zawng zawng chungah lawmthu kan sawi e.

Kan vanduaina tawh hi a rapthlak em a, social media lamah te, chanchinbu lamahte hmun kan luah nasa hle a, chhiartute ngaihdan hruai sual palh thei thu dikhlel deuhte pawh a lang ta nual mai a, pawi kan ti takzet a ni.

Withness statement lak dan tih thupui hmanga Pu C.Lalrinchhunga Advocate-in social media lama Aizawl SP hnena open letter a thawnah leh, Vanglaini chanchinbua ni 24.1.2015 chhuaka lo langah khan, hmun danga thil thleng avanga withness statement police-ten an lak dan chu kan hriatpui lo a, keimahni chunga thil thlengah erawh chuan Pu C. Lalrinchhunga Advocate khan thil hriat sual palh a nei nual mai a, chhiartuten thu dik an hriat theihna tura sawi fiah a ngai ta hial a, inthlahrung takin kan han sawifiah ang e.

Kei hi C. Vanlalhruaia, Springfield School-a Vice Principal ka ni a, vanduaina thlenna in hnuai kha School-ah leh Hostel-ah kan luah a, vanduaina thlentirtu misual lo mantute kha kan hostel naupangte an ni. Ni 19.1.2015 khan police officer pahnih kan office-ah lo kalin, court-in thu hriat belh duh a neihte hrilh turin zirlaite hruai chhuah lawk rem kan tih leh tih loh min rawn zawt a. Kan remtihna thlapin a tuk ni 20.1.2015 chhun dar 12 velah khan zirlai pali leh zirtirtu pakhat chu Police Station-ah ni loin, court-a thu sawi turin motor-in an rawn hruai a, sikul ban hmain motor bawkin an rawn dah leh mai a. Pu C.Lalrinchhunga Advocate-in kan sikul naupangte witness-a koh danin rapthlak a kai lek lek ni awma a lo hriat thu a rawn ziak mai hi, a hre sual palh a ni tih chhiartute kan han hrilh ve a ni e. A ziah hmain phone talin min han zawt se, thu dik kan lo hrilh mai tur a ni a. Tunah chuan Pathian khawngaihna zarah kan naute pawhin ṭha takin an zirlai an zir chhunzawm leh tawh e.

Kei hi David Rothangliana ka ni a, vanduaina rapthlak tak a thlenna hmun thleng hmasa leh, vanduai chhungkaw aiawha witness-a ṭang ka ni. Police-ten investigation an tih dan leh witness statement an lak dan Pu C.Lalrinchhunga Advocate-in social media-ah leh Vanglaini dt. 24.1.2015-a a ziah kha ka lo chhiar a. Kan chhungkaw chhiat tawhdan chhuitu Police-te kan laka an chet dan mawi lo leh rapthlak hial ni awma a hria kha thu a dawng sual nasa hle a ni. Kan chhungkaw lam aṭang chuan witness tumah Police Station-ah hruai kan ni lo a, court lamah erawh chuan statement pe kan awm ngei a, chu pawh chu office hun chhungin zawh vek a ni. Hmeichhiate Police Station-a hruai a, rei tak nghah ngai a, thim hnu pawha hren reng ni awma a rawn ziak mai hi, thu a hriat ang ang finfiah hmasa loin a rawn ziak mai niin a lang. Chhiartu tam takin ngaih dan dik lo in neih phah ang tih kan hlau a, inthlahrung takin thu dik kan han ziak ve ta mai a ni e.

Kan vanduaina tawh hi rapthlak hle mah se, min lainata min ṭawngṭaisaktu zawng zawngte zarah kan thla a muangin kan rilru a fim ve ṭan mek a, chutih laia rilru tina thar thei chi leh, ṭhahnemngai taka chhuitu police-te demna lam thu, thu dawn dik lo lehnghal, mi puitling taka ngaihten an rawn ziak mai hi pawi kan ti takzet a. Keimahni chunga rin dan inhnial zawng zawngten min lo hriatsak atan, hrehawm ti tak chungin he thu hi kan rawn ziak ve mai a ni e.

Kan vanduaina tawh natzia min hriatpui a, thuthang thehdarh kawngah pawh min dimdawi hram hram turin, mi zawng zawng kan han ngen nawn leh e.