Rangvamual leiminna hmun hi

Rangvamual-ah nikum aṭang khan leimin reh thei lo a awm a, mimal lei laih vanga min ang hialte'n puh a ni a, inspection team-in an enfiah chuan helai zawn chhak lamah zu bilhna khuar a tam vangin helai lei hi a dup tih an hmuchhuak a ni.

Mimalin inhmun an laih vang emaw, a chhak lamah zu bilhna khuar kek kuk a tam vang emaw chu engpawh ni rawh se. He leimin hian mipui a tihbuai dan zawng zawng kan hria a, ruah a tlak hlek chuan lirthei kal hleih theih loh khawp a ni tih pawh kan hriat kha.

Tunlai hian khua a ṭha a, chuvangin lirthei tan pawh harsatna a awm lo tih theih a ni. Mahse kan hma lawkah ruah a rawn sur leh ngei ang a, chung hunah chuan kan buai leh ngei dawn tih a chiang. Leimin vanglai phei kha chuan lirthei control nan traffic police duty chawt a ngai a, JCB nena hnathawh reng a ngai bawk si a; a mangangthlak em em a ni.

Chuvangin, tun ṭhal lai hian helai hmuna harsatna a thlen loh nan kan mithiam leh sorkara a concern department chuan ngaihven a ṭha khawp mai. Sawi tawh angin ruah sur thei reng a nih vangin hetia kan dah ringawt chuan kan buai leh ngei dawn. Ruah a sur chuan lei hnip tam takin kawng a rawn hnawh leh ang a, mipui tan harsatna a thleng leh dawn khawp mai.

Chutiang harsatna a thlen loh nan tun hi mithiamte chet hun a ni ta. Nakin lawkah harsatna thleng thei pumpelh nan sorkar pawhin beng chhi se. Helai kawng pawimawh tak hi kan ei leh bar luhka ber a nih bakah khual ṭha luh chhuahna kawng a ni bawk si a. Ṭhal laia tih tur ṭul ang angte an tih a, chet an lak loh chuan kan buai leh ngei dawn a ni.