Aizawl Veng chei ka fang duh lo!

Masi bawr vel khan ka chhungten khawpui chhung chei en turin min sawm a, chhuanlam eng engemaw siamin ka pha a. A nihna takah chuan khang ka chhuanlam siamte kha chhuanlam tling lo a ni. Mahse kal duh loh chhan ṭha tak neia ka inhriat avangin chhuanlam ka siam ta mai a ni. Ka kal duh loh chhan chu, ‘Aizawl veng chei hian ka fan an phu lo!’ tih a ni.

Ni e, kei ve mai mai, engmah chhuan tur pawh nei lo, mi rethei hian ka en sak an phu lo ka ti ve tlat! Ka en loh avang khan engmah a danglam phah dawn lo tih ka hria. Kei pawhin hlawkna leh hekna tak tak ka neih phah dawn lo tih pawh ka hria. Mahse, ka thinlunga min ṭhohtu erawh hi chu a zia deuh ang tih beiseina ka nei.

Eng vangin maw nang ve mai mai khan, heng veng chei ropui lutuk hi i en duh loh khanglana? Lenlai i chân a nih hawt chu, tih melhin zawhna min zawt maw? Ka rilru ang pu mi ni la chuan hetiang hian min ti hauh lo tur.

Khatia sawrkarin ‘veng chei nalh ber lawmman kan pe ang,’ a tih hma pawh khan, Aizawlah chuan hunpui laia veng chei hi a hluar tawh ngei mai. Mahse, khatia sawrkarin aw-ka a han neih tak siah kha chuan, a hluar lehzual a ni ngei ang, kum danga chei ngai lem lote paw’n an chei phah niin a lang. Kum danga an sum sen ṭhin let an seng ṭheuh bawk niin a lang. Chuvang chuan sawrkar hi dem loh chi ziazang a ni lo!

Kan ram intodelh lohzia kan hre vek. Sum indaih loh avanga tunhnaia Zoramin harsatna kan tawh nasatzia te, chutih laia ‘veng chei nalh ber lawmman kan pe ang’ tih kha chu a in tham loh thlak, mipuite min bawl lutuk mah mah ka ti lo thei lo. An lawmman sem tur kha a tam tham lo a nih pawhin, an mi cho chhuah avanga veng tam takin kan sum khawhral tur kha an chhut pha lo em ni? Keini ang ram rethei, chawmhlawm lehnghal tih atan chuan mawi pawh a mawi lo.

Veng chei nalh lawmman pek min tiamtute hian, zirlai naupang scholarship pawh an pe kim hleithei lo tih te, tar chawmna sum takngial pawh a hunah an pe mumal thei lo tihte ka hriat hian kei chu nâ ka ti. Chutiang pawh ngaihtuah chang lek loa intihsiak niawm taka kan ti lé lü mai hi mipuite pawh kan nep ka ti bawk.

Zirlai naupang engzatin nge kum tawpa an scho’ lak ṭhin hi masi thawmhnaw lei nan hmang ṭhin ang? Khatia scho’ an lak theih loh tak avang khan, naupang engzatin nge kum khat chhungin thawmhnaw thar vawi khat pawh lei theih loh phah ang? Heng zawng zawng ka ngaihtuah hian, kan veng cheite hi en thei ziazang niin ka inhre lo!

Kan ṭhenawm khawvenga mi rethei tak tak, vanduaina avanga lei rem rap thei tawh lo, ṭanpui ngai hi engzat nge awm ang? Chutiang ṭanpuitu chu mi engemawzat awm ve bawk mah se, ṭanpui sen rual an ni lo. Ṭanpui sen an ni chuang lo, tih vanga lo inchhek milen ngawt lah a nunrawnthlak si. Chutiang hre reng chunga kan la par chei chuai duh hi chu a mak ka ti!

Hetia ṭhenawm khawveng, u leh nau te, rethei manganga an awm laia chaw dangral mai mai uma kan lo intihsiak mai hi a Mizo lo a, a kristian hek lo. Kan ram sum leh pai dinhmunin tlin se chu, thil tih awm lo a ni lem lo. Tih tak emah chuan, pathian lem betute mahin an theih tawka nasain an pathian an chawimawi a lawm le. Engah nge keini Pathian nung betute chuan kan tih loh tehlul ang ni. Anni aia nasa sain kan tih zawk tur a lawm! Mahse, kan ram dinhmunin a la zir rih tlat lo.

Kan ram kan intodelh loh chu thuhran, rethei leh hausa inkar a zau a, nitin ei khawp pawh hlawh chhuak zo lo mirethei kan la tam lutuk. Keiniho hi mi liante intawllennaah kan lo tel ve ang maw? Keizawng harsa ka ti! Cheng nuai khata buai ve lo chin tih tawk lekah ka dah.

Kan sawrkar pawh hian min bawl lutuk deuh a ni. Engah nge maw mipui lam pawh hi kan ṭhanharh theih reng reng loh le. Aw Zoram, harh la, chaw dangral mai mai uma phe phe loin i chanvo dik tak chang turin i ke pen rawh.