Zin kawnga ei leh in siam

Restaurant leh hotel kan hre hrang lo hi chu kan thiam loh pawh a ni chiah lova, hnam dang ṭawng a nih vang a ni.

A eng hming pawh hi pu se zin kawnga kan ei leh in min hluitute hi tun ai hian che thianghlim deuh se tih hi tun hma aṭnga ka vei ṭhin a ni a, tun hnaia ka zinnaah ka tawng leh ta a ni.

Mizoramah khaw kar kawngah chaw kan han ei dawn a, kan ei tur inchhawp dan hi tun hma ai chuan a fel deuh tawh a, tunah chuan bowl pawh kan hmang ve ṭan tawh. Kan ei siam dan erawh ka hmuh theih chinah chuan a la ṭawp khawp mai.

Choka a bal a, a ei siamtute an bal a, a semtute an bal bawk a, ei a tuiawm loh khawp mai. Tin, hei bakah hian thleng leh chawhmeh chhawpna dangte hi a fai tawk lo ṭhin bawk a, a zialo lam deuh a ni.

Ka sawi kual vak chhan chu ka zin ṭumin Vai mikhual ka hruai a, Mizo chaw a nih vangin Vairama an ei ang a awm loh thu ka hrilha a pawm ve mai a, mah se kan eina bungbel leh a chhawpna lam a fai lo kha chu a rukin a ten hle tih a hmelah ka hmu thei a, a zia lo khawp mai.

Sorkar hian thuneihna a neih leh neih loh ka hre ve lo a, sorkar thu chu ni se kawng kama ai leh in zuar tur hian license nei se, license nei tur chuan training paltlangte ngai se a ziaawm theih kei chuan ka ring. Tunah hi chuan kan ei leh in siam danah hian kan chim chin a la hniam a, kan incheina nen a inhmeh lo.