Tu Mah Hmusit Suh

Prof. RL Thanmawia lehkhabu 'Chuailo bu 3-na' ka chhiar aṭangin Lalsangzuali Sailo kha piangsual a lo ni reng tih ka hre chauh va! Lalsangzuali Sailo khan a ke lamah harsatna a nei a ni awm e. "Piansual si piangsual a nih hriat hauh lova awm leh thei mi tumruh..." tiin Prof. RL Thanmawia chuan a ziak nghe nghe a ni.

Hetianga Lalsangzuali Sailo kha a lo awm vang hi ni maw, rualbanlote kha a khawngaihin a hmangaih a, hei vang hian an tan hla a phuah nual nghe nghe. 'An tan ṭhian ka ni ang a' tih hla, Lalsangzuali Sailo phuahah chuan:

Ka kutte–kut chak lo tan,

Ka kete–ke baite tan,

Ka bengte–bengngawngte tan,

Ka mitte–mit delte tan!

An tan ṭhian ka ni ang a,

Anmahni tihlim zelin;

Rualbanlo unaute ṭanpui hi,

Ka tum ve tawh ang a.

tiin a han sawi a. A chang tawp berah chuan kan mawhphurhna hetiang hian a sawi:

Famkim reng kan awm lo ve,

Harsatna nei vek kan ni;

Anmahni hmangaih ve hi,

Kan mawhphurhna a lo ni.

tiin.

Rualbanlote hi kan hmusit tur a ni lo vam kan hmangaihin kan ngaihsak tur a ni zawk. An tan ṭanpuitu leh ṭhian ṭha kan ni thei. An tan ṭhian tha leh ṭanpuitu ni thei ila a va duhawm dawn em.

Piangsualte hmusit mai tur kan ni lo. Anmahni anga vanduaina tawka piangsual ve thei kan ni tih kan hriat a pawimawh. Hetiang a nih avang hian ‘Piansual leh phâr chârin tlai luat a nei lo, tiin Mizote chuan kan sawi ṭhin kha.

Kan mihringpui, zu ruih hmang, damdawi hmang suala a tel lova awm thei tawh lo, mi retheite hi kan hmusit tur a ni lo. Chuti a hnehin kan zahin kan hmangaih hle tur a ni zawk. Pathianin ang khat vekin min en a, hmangaih dan leh duhsak dan inang rengin min hmangaih a ni tih kan hriat fo a ngai. Pathian thinlungah kan hlu em em ṭheuh a ni tih kan hre bawk tur a ni.

Kan hma hun lah engmah kan hre lo. Kan hmuhsit tak takte ai hian hmuhsitawm zawkah kan awm thei reng a ni tih i hria ang u.

- Zoliansanga Tlau