Tidamtu/Tidam theitu

Thaw thei ṭek ṭek tawh phawt hi chuan a changin natna kan kai a, tluk sual palh te, vanduainate kan tawk ṭhin. Hmanlai chuan inenkawlna a la awm ṭha lo a, thih mai kha a awlsam ṭhin hle. Vawiinah chuan kan lo changkang ta a, tihdam theih loh pawh hi a awm mang tawh lo a ni. A dik a dik chuan, Pathian pawh hi kan mamawh tawh lo ṭep a ni. Ram chhung leh pawn lamte kan han thlir chuan kal thlak, lung thlak, mit donate tih te, cancer vaccine-te pawh a lo awm ta. Cancer vaccine hi hmeiche tan a ni a, cancer vaccine pangngai tur chu zir chhoh mek a ni a, kum 2030 velah chuan peih hman an inring a ni (BBC). Thiamna a sang em em, tih theih loh pawh hi a awm mang tawh lo. Pathianin min lo siam dan hi a lo ropui khawp mai, an la hmuh belh zel turah ngai ila. Engtik niah emaw chuan mitthite pawh hi kan la kaitho ve thei mai thei a ni. Hetia thiamna a san viau tawh rual hian a tawpa thuneitu, doctor-te tih theih piah lamah hian Pathian thu thu, tih hun hi a lo awm ve leh bawk a.

Tidamtu: Isua zirtirte'n rawng an han bawl tak tak mai kha chu a ropui awm ka lo ti ve mai mai. Petera hlimin a rawn hliah tur laiahte khan damlote kha an lo awm ṭhin. Thlarau thianghlimin a awmpui nasa a, mipui pawh khan an zui hut hut ngei ang. Hman kum Krimas dawna Phunchawng vela camping an zuk siam pawh khan taksa damna mi tam takin an chang a nih kha; kei pawh hian ka mitin ka hmu ve a ni. Khawi lai hmun ṭhenkhatah erawh lemchangte pawh an lo awm ve ṭhin, an ti.

Heng tidamtu ho hi chu a zira zir an ni ve lo a, mahse, Pathian nena inzawmna thuk tak nei, inserh thianghlim, Pathianin a hman takte an ni. Kohhran upate pawh hi tihdam theihna nei tur awm tak an ni a, mahse, an nei lo hlawm; thil dangah, tunlai khawvel angah chuan pawimawhna, mamawhna tak tak an lo awm zawk a ni, i ti mai ang. Thi leh tho tur ni mah ila taksa damna hi a pawimawh, Isua rawngbawlna pawimawh tak pakhat a ni. Thlarau lam damna phei hi chu a ngaih pawimawh ber a ni.

Tidam theitu: Kan hre hlawmin ka ring. Doctor ni thei tur hian middle school vel aṭanga lehkhathiam thei tak, taima tak nih a ngai. Heng ho pawh hian an han zir tak tak hi chuan an cher kawk kawk zel mai a ni. Hun pawhin a daih lo, mut nan pawh hun an nei ngai mang lo ṭhin. An zir chhuah chuan doctor an lo ni ta. Chutih laiin keini chuan hei hi a ṭha, kei pawn ka ngeih lutuk, kan ti a, kan lo inchawh ve a, mahni thuin kan lo ei bawk ṭhin. Miin thi leh thau pawlha an zir chhuah kha keini chu ngaihtuah chiang mang lovin doctor lem kan lo chang leh mai thin. Kan hriselna lam hi kan ngai pawimawh tur a ni.

A kotlang aṭangin: Kum tir lam khan Youtube-a an dah, surgeon doctor-ho tih dan kha ka lo thlir ve a. Hmun hla zawk leh kilkhawra awm zai ngai ho, khawngaihthlak tak takte a thlawna zaina hun neiin an va kal chilh thute an sawi a, ropui ka ti hle mai. Ka rilru te te chuan, nangni hi thlaraumi dik tak chu in lo nih ber hi ka ti. Nia, hmun hla leh kilkhawr zawka chengte tan chuan inenkawlna hi a buaithlak hle mai. Doctor-te tan lah tlawmngaih han chhuah ngawtna chi a ni mang si lo a. Chuvang chuan, khawpuiah private pawn a tih chi zawk daih avangin zokhaw lamah chuan doctor indaih lo tih reng mai kha a ni lo thei lo a ni. Engpawhnise, intiam rual ṭhin se la, kum khatah vawi 2/1 tal free clinic ang chite hi nei kual thin se la. Mi dangte tana luan chhuah hi a ṭha, miin min fak lo a nih pawn kan hlim veng veng duh hle. Mite ṭanpuitu, tilawmtu nih hi a hlu.

Tun hma deuh aṭang khan live phone-in (radio) Inrinni leh hun danga mite hi ka ngaithla ṭhin a, a bengvarthlak ṭhin khawp mai. Engtikah mah kan hriat ve theih loh tur thil hi rin aiin a lo tam khawp mai. Kan taksaa natna lo awm ṭan dan te, tih leh tih loh tur thil te, engtia tih zel tur nge tih ang chite hi awlsamtêin awm hmunah, mi zawh buai pawh ngai lovin a hriat ve zung zung theih a ni.

Kan rilru leh taksa hriselna a pawimawh em em. A nih loh chuan hna a thawh theih loh a, lehkha a zir theih loh a, rawngbawl lam pawh a tih hleih theih loh. Anni sawi bak hi chu hriat tur a awm chuang lo a ni. Kan inenkawl ṭhat chuan kan lo hrisel ang a, kan hlim ang a, rawngte pawh nasa zawkin kan bawl theih dawn a ni.

A tawp nan chuan doctor-te hi tidam theitu an ni, a petu, ṭanpui ṭhintu chu Pathian a ni. Ṭawngṭaina nen doctor pan ila, tichuan, damna chu kan chang thei a ni.

- Lalchhandama Colney, Ph–9862982321