Ṭhat theih miah lohna bawm – Party politics

Kan rama kan buaipui ber eirukna (corruption) zung chu party politics a ni tih ka ziak tawh a. Engtiang chiahin nge chu party politics system-ah chuan eirukna (corruption)-in a luhchillh dan leh chu party politics system chu ‘Ṭhattheihmiahlohna Bawm’ a nih dan tlangpui kan ziak dawn a ni.

He party politics system hi kan ram leh hnam siam ṭhat kan tumna hmanrua ber a ni a. Kan inṭhatsiakna leh fel kan tumna ber chu ‘Ṭhattheihmiahloha Bawm’ a nih si chuan engtin nge kan ṭhat theih tak ang? Engtin nge ram leh hnam damna tur chuan kan beih tak ang, tih chu zawhna pawimawh tak pawh a ni.

Kan politician ṭhenkhatte chuan ‘Manifesto chu kan insiam ṭhatsiak mai mai alawm’ an ti tihte pawh hriat tur a awm. Kan ram rorelna kal tawh, kal mek leh lo la kal zel dan tur han thlir pawh hian party politics hmang hi chuan engtikah mah kan ṭha thei dawn lo niin a lang. Chuti a nih si chuan party politics system chu inbumna bawm, ṭhat theih miah lohna bawm a ni tih a tichiang hle a ni.

Kum 1947 India rorelna hnuaia kan luh aṭanga party politics system hmanga kan lo kal tawh dan leh chu party politics system chuan kan thlarau, rilru leh taksa a ei chhiat dan te, kan hnam, ram leh kohhran a ei chhiat dante pawh a tlangpui kan sawi ang.

A hmasa berah chuan kan thlarau nun a ei chhiat dan hi han sawi hmasa ila. Party politics chu lal leh thuneih inchuhna a ni a, chu lal leh thuneih inchuhna chu Bible-in kan buan te, kan hmelma a tih chu a ni. Ephesi 6:12 ‘Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e’ tih kan hmu. Chu lal leh thuneih inchuhna chuan thil mawi leh mawi lo pawh a ngaihtuah tawh lo va, lal leh thuneihna an chan theihna a nih dawn phawt chuan eng hmanrua pawh hman hreh lohna a awm a. Chuvang tak chuan tuna party politics hmanga mawi lo taka lal leh thuneih inchuhna chu Pathian nung ringtute’n kan tih ve atana mawi lo, Bible zirtirna nena inkalh a ni. Kan thlarau nun tichhetu bul a ni kan ti thei ang.

A pahnihnaah chuan, Phillipi 2:3-ah chuan, “Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se,’ tiin min zirtir a. Rom 13:8-ah chuan, ‘Inhmangaih tawnna chauh lo chu tuma engmah ba suh u, mahni mihringpui hmangaihtu chuan dan chu a zawh famkim tawh si a,’ tih kan hmu bawk.

Party politics system chuan mahni aia mi dangte sual zawk, ṭha lo zawk, fel lo zawka ruat dan min zirtir thung. Party politics system chuan inhmangaih tawnna min zirtir lo va, indo dan min zirtir a, remloh lenna hmun a nih avangin remna leh felna leh thlarau thianghlimin hmun a chang thei lo. Chu party politics system chu thlarau lam thil ni lovin tisa thil a ni. Thlarau leh tisa thil chu thil kal rem thei lo leh indo tlat a ni. Chuvang chuan Kristiante tan chuan tuna he party politics system hmanga rorelna siam a, lal leh thuneihna kan inchuh dan hi kan tih loh tur a ni. Kan duh vang reng pawh ni lovin party politics hian thil ṭha ti thei lovin, inhmangaih thei lovin min siam a, ṭhat duh leh Pathian thu awih duhte kha Pathian thu awih thei lovin min siam a ni tih hi hai rual a ni lo.

A pathumnaah chuan, party politics system chu Zo nun ze mawi ṭhiattu a ni. Kan pi leh pute hunah chuan khaw tinin lal neiin, a kaiza vengtu khawnbawl upate nen ro fel takin an rel a. Ṭhalaite enkawltu atan val upa an awm leh mai a. Rorelna fel tak neiin ‘Sem sem dam dam, eibil thi thi’ tih leh, ‘Thih leh ruam khatah, dam leh tlang khatah, tiin an lo khawsa ho ṭhin.

Tuna rorelna kan neih mek party politics hmanga rorelna hi chu thlei bik neia rorelna a ni lo thei lo. Party MLA ngah ber khan sawrkarna an siam a, sawrkar chu anmahni ta, an party ta bik angin an kalpui a. Rorelna khawlah pawh chuan anmahni party ni ve lote chu anmahni eptu pawl (opposition) an ni. Democracy chu mipuite siam, mipuite ta tiin sawi ṭhin mah se, a tak takah chuan party siam, party ta anga kalpui a ni. Party chhunga mihring awm tate kha an sual ta tihna a ni kher lo. Amaherawhchu, a kalphung (system) kha a dik loh tlat avangin party system rorelna chuan ṭha thei miah lovin a siam zawk a ni. Zo nun ze mawi chuan duhsak bik neih te, thlei bik neihte a do tlat laiin, pary politics-ah chuan duhsak bik neih te, thlei bik neihte chu kalphung tur rênga ngaih tluk hial a ni.

Chuvang chuan, tuna kan rorelna khawl siam dan leh rorelna kalpui dan party politics system hi ‘Ṭhattheihmiahlohna Bawm’ a ni tih chu phat rual a ni lo. Chuti a nih si chuan, chu Ṭhattheihmiahlohna Bawm chu engtin nge kan siam ṭhat ang? Engin nge kan thlak tak ang? Chutiang tur chuan engtin nge hma kan lak ang tihte kan la sawi zel ang.

- Rev. Dr. Zaichhawna Hlawndo