Mizoram - India lam hawi!

Vai leh Mizote kan indo aṭangin kum 28 chuang a liam ta, vai sipai laka kan tawrhna leh ser te la nung mah se India ram chhunga awm kan nih avangin Zoram mipuite India lam kan hawi a ngai ta.

India ram state dangte ke pen ruala kan kal duh a nih chuan India chungchang leh thilthlengte kan ngaihven a ngai a, kan hriat chian a pawimawh a ni.

Kan ram chhunga thlamuang taka kan awm hi a tawk tawh lo a, kan him reng dawn lo. Chu vang chuan Mizo ṭhalaite hian khawvel intihsiakna hrang hrangah raltiang ram kan thlir a ngai a, kan ram hi kan pi leh pute hun aṭangin vai leh sap-in vawi eng emaw zat min run tawh a, tunah chuan silai leh thisen chhuak loin ṭhalaite'n vai ram kan lak ve a hun tawh.

Zohnahthlak ṭhalai tam tak chu India ram state hrang hrangah hna thawkin mi hlawhtling tak tak pawh an awm ve nual ta. Hei hi vai ho thil hlauh ber pakhat a ni a, kan tan India ramah state dangah damkhawchhuah a harsat phah a, chi inthliarna a hluar phah bawk. Mahse hetihlai hian Mizo ṭhalai huaisen tak tak India ram state leh rampawn thlenga hnathawka inhlawhfaa Zorama lama mahni chhungkua leh mahni unau zirlai chawm mekte pawh an awm ta fur mai, hei hi a ni India ram kan la hnehna tur chu!

Kan aia hnam lian zawkte hi Mizoram chhunga kan ngam viau hi a tawk lo a, Zoram pawnah pawh kan el ngam tur a ni. Mizote kan luhlulna hi vai ho min ngaihsanna hmanrua a la ni thei tih hre thar leh ang u.

Kum tin Mizoram­ah ṭhalai degree nei sang tel an chhuak a, kan state sorkar pachhia leh ngaihna hre lo tak hian hna­thawh tur min siamsak vek thei lo a, min siamsak vek seng hek lo. He lai hi ṭhalaite'n kan hriatthiam a ngai. Sorkar hna beisei loa, mahnia eizawnna ngelnghet neih tum te tan pawh sorkar policy tam takah ṭhalai an telh loh avangin kawng a la zim hle a, bank te'n loan pek chhuah an harsat bawk si a, hnathawh nei lo lehkha thiam kan pung zel a nih hi!

Hetiang hi kan dinhmun a nih avangin Mizo ṭhalai luhlul tak tak hian ka khaw hawi kan thlak a ngai a, India ram luhchilh tak tak turin inbuatsaih a hun ta. Hemi atan hian kan lehkha zirna aṭanga kan inbuatsaih ṭan a ngai a, vai rama kan tlaktlum theih nan Hindi kan thiam a ngai a, Spoken Hindi zirna chu kan sorkarin min ngaihtuahsak theih beisei ang.

Delhi, Mumbai, Kolkata leh Bengaluru-ahte kan mikhual tawh lo a, mah se tun aia ngampa turin an zingah kan tel tam a, hna kan thawh a ngai a ni.