MLPC Act a khauh zel ang em?

Dan sawisel hlawh leh dodal hlawh ang reng tak MLPC Act chu kenkawh a ni ta a, tun thlenga an kenkawh dan chinah chuan a lungawithlak viau mai. 'Ham case'-a man an awm nual tawh a, hetiang hian ngati nge MLPT Act kha an kenkawh ve mai loh, tihte pawh a awl rum rum mai. A la hlimchhawn a, sorkar leh dan kengkawhtute lamin ṭan an la la hle niin alang.

Excise Force lam duh ai chuan an la tlem deuh hlek a, khauh taka MLPC Act kengkawh reng tur chuan Excise-te hi tihchak a, a mihring zawng pawha tihpun a ngai a, chutiang a nih loh chuan khauh takin an kengkawh reng thei lo ang tih a hlauhawm hle.

Inhremna dan hrang hrang an siamte a ṭha hle a, chutiang chuan mi pawh an hrem ṭan nghal ta nual a, a lawmawm hle. Dan bawhchhiaten hremna tawk loa an pumpelh mai ṭhin hmuh hi a hrehawm a, mi tam takin dan an pawisak loh phah ṭhin. Dan hi a kenkawh tur ang taka kenkawh a nih loh hian dan ṭha si, awmze nei lo kan siam hnem tihna a ni. MLTP Act pawh kha a hlawhchhamna chhan pakhat chu hei tho hi niin alang. Mi rethei leh mi hausa a hriat hran anga lang kha a pawi hle bawk.

Vantlang hna thawhtira hrem theihna dan an siam hi a ṭha hle a, mi tam tak chuan jail-a kar khat tan ai chuan ni hnih chhung bazar phiah fai pawh an hreh zawk ngeiin a rinawm. Inhremna awmze nei leh ṭangkai si a ni a, a tuartute tan lah zahthlak leh hrehawm a ni. Hmai tuam kher loa vantlang hna thawhtirte pawh hi awm ta se, a effective zawk mah mai awm asin!

Dan kengkawhtute hmanraw neih ṭhat tawk leh tawk loh lam chu sawi lo ila, mahse thuneituten an ngaihtuah zel turah ngai ang. MLPC Act hi a ṭha a, a dana inhremna hrang hrangte pawh a ṭha hle. Mahse mi tam takin an hlauhthawn chu a tira an khauh ang hian an khauh reng thei lo ang tih a ni a, chutiang a thlen lohna tur chuan sorkar leh Excise-te hian hma la se, inthlahdul lo se, a ṭha ang.

Mut duh tawh huna zurui pakhat au bengchhengin khawtlang nun a tihral ṭit ṭhin pawh dan thar hmang hian a tihreh theih turah ngai ila, tleirawl zurui hawklakin mi kal mai mai an sawisak leh an cho phur a, an sualpui ringawt ṭhinte pawh dan thar hmang hian kan khap bet thei turah ngai ila, a thlamuan thlak deuh ang.

Dan ṭha em ema kan ngaih, MLTP Act an thlak ta rau rau bawk a, tuna kan dan neih thar hi a hlawhtlin reng theih nan ṭang takin a kengkawhtuten kengkawh zel se la, a hlimchhawn chauh ni lo, nakin zela a hlawhtlin zel theih nan hma la se, mipui chuan kan thlawp ṭha hle ngei ang.