Zawl khawpui zin thu

Kumin January hapta hnihnaaah khan zan khat chauh riakin Zawl khawpuiah ka zin a. Krismas chu sawi loh, New Year day kan lawmna pawh hapta khat lai a liam tawh a, sawrkar leh Kohhran Office te pawh dan pangngaiin a inhawng leh deuh vek tawh. Hmanni lawka Krismas leh new year day kham lo taka lawmtu office hnathawktute pawhin rilru chanve-ah Bethlehem lam hre reng chungin tha tho rih lo takin file an keu leh nak nak tawh a.

Mahse, chuti chung chuan Bethlehem tlang ngaih chulhnu chuan Zawl khawpui a la kiansan fel lo tih chiang taka a lanna chu mi tam takin an in cheimawina an la hlip thla kim phal lo a. Tuallai kawngpui dungte pawh Krismas tree mawi tak tak leh thuziak lung tileng tak tak “Joy to the World, The Lord is come” tih te “Merry Christmas & Happy New Year” tihte leh ‘Christmas for all” tihte chu hmun tam takah chhiar tur a lo la intar fer fur a. Zan han lenchhuah phei chuan Krismas kan hmang nawn leh dawn ta emaw tih mai turin veng tinah mawi tak tak hian a lo la eng chiai chuai a, a lunglenthlak hle mai. Halpuah lam kan tibo ta bawk a, khawnge cheimawi lam hi i han uar tak tak leh thung ang an ti a nih dawn hi ka ti rilru a.

Kan naute in, Mission Veng huam chhungah thleng mah ila hmanni lawkah ropui taka Synod Inkhawmpui an nghahna hmun, Mission Vengthlang Biak Inah Januanary ni 7, Nizai zan chu ka fapa nen kan inkhawm a. Ani hi kum 2007-2009 khan Mission Vengthlanga Synod Higher Secondary School-ah a lut a, Hostel-ah te awmin, he Biak Inah hian kum 2 chhung lai nuam ti taka lo inkhawm tawh ṭhin a ni. Kum 5 emaw zet a chhuahsan tawh avangin heta zuk inkhawm leh hi a chak a, kei lahin an Biak In thar hi ka la hmuh loh avangin ka lo hmu chak ve bawk a. Kan zuk thlen chuan an Biak In lenzia leh a nawmzia, a kawt zawl zauzia te chuan belhchian a dawl hle mai.

Biak In chhung kan luh hnuin vawi thum chiah kan zai hman a, chung zinga vawikhat chu lenkhawm zai dana zai a ni a. Mi pathum vel chu lam turin an rawn chhuak nghal thuai a. Mahse, an khuangpute chuan chumi avang chuan hla lak nawn leh khuang vuak rina han tlir ran phah chiam chu an ti chuang hauh lo a. Biak In chhung a ni a, Worship Service a ni a, lenkhawmna hmun anga lam theih dan tur tinzawn ngawr ngawr a, han nawr chiam na tur hmun leh hun a nih lem loh dan an hrethiam viau ni awm a ni.

Tichuan, kan Zawl khawpui hi chuti teh zutin tlawh fo ngai hek lo i, mite hmuh fo tawh, Vanapa Hall bula Vanapa lim an dah thar chu kal pah chuan ka han thlir thuak thuak a. A hmelah Mizopa a nihzia a lang a, pasalṭha hmel pawh a pu khawp mai. Chutih rual erawh chuan ka duhthu a sam loh deuhna erawh chu duh aiin a pumrua hi an rel te deuhin ka hria. Ram khat pasalṭha leh tlawmngai hmingthang, hetiang meuha a lim te pawh siam ta rau rau kan nih chuan hei aia pumrua hleitling hret hian siam nise ṭha tur aw, ka ti vawng vawng a. Kawngpui zaupui kam, building lianpui bula ding a nih vang hian ka hmu te mai mai pawh a ni thei a. Hetiang hmuna ding tur a nih avang tak hian hei aia pumrua lian deuh hreta din a ṭha chu a ni reng a.

Milim sawi takah chuan a piaha lawka Gandhi-a lim te, Children Park-a Nehru leh Rokunga limte leh tuna din thar, Vanapa lim te hi hetia ngaisanga din ta rau rau, hliahkhuhtu awm hawt loa hetia nisa leh ruahpui vanawn tuar tir tlawk tlawk ngawt lo tur hian thira siam nihliap khumtir ni ta ṭheuh sela, a ṭhat hi maw le aw tih te ka ngaihtuah a. Vairamah pawh khuan hetiang mi pawimawh lim an din ṭhenkhatte khu chu nihliap an khum tir zauh zauh a, hei hi thil tih dan awm tak pawh niin a lang.

Han ti ta zel ila - thudang deuh, Republic Veng pan pheina kawngpui chhak, kan Governor bangla compound chhung englai pawha hnim eng eng emaw bawn luk reng mai hi ‘cleanliness’ hunte hian an sam fai ve ṭhin em aw ka ti rilru a, an sam fai ngai lo a nih chuan a fel lo khawpin ka hria. Khawpui chhung veng laili a ni a, kan ram lal ber chenna compound a ni bawk a, hetia hnim chhur reng mai tur hi a ni hauh lo. Samfai se, terrace ngil takin lai sela, a lei a min loh nan uluk takin lung rem bawk sela.

Chutah chuan thingbuk mawi tur chi leh pangpar mawi tak takte chingin phun bawk sela, a ṭha ngawt zawk ang tihte chu ka han hawi vel pah chuan ka ngaihtuah vel a. Chutihlai chuan, kan Zawl khawpuiah hian kei ve hian inchi khat bial takngial pawh ram ka nei lo tih hriain, ka ngaihtuah zui zel ta lo a...