CALENDAR - Hlimthla/ thlalak
Tun ṭumah hian Calendar pawimawhna te, a lo chhuah ṭan dan leh a ṭangkainate hi ka sawi tum a ni lo a. Vanglaini chanchin pheka sava, nungcha leh thingkung danglam bikte leh Mizoram khaw hrang hrang thlalak an rawn tar lang ṭhin hi hmuh a nuamin a manhla hle.
Kan tlawh tawh leh hmuh tawh khua an rawn tarlan chang hian chu khua chu kan thinlungin a nem nghet a. Kan la tlawh loh khua an rawn tarlan chang hian chu khua chu suangtuahnain min fan tir ṭhin a, a manhla takzet a ni.
Calendar hian Ni leh Thla leh Kum min kawhhmuh a, chutih rual chuan sawrkar department hmalakna hrang hrang te, kohhran leh mimal sumdawngten an hmalakna phochhuah nan an hmang ṭhin. Ka han sawi duh tak chu Calendar-a thil lem (thlalak) tarlan fiahfai leh hmuh nuam bik tak hi a ni.
A bikin Mizoram Calendar, engtik emaw aṭang tawha kum tina Directorate of Information & Public Relations, Governemnt of Mizoramin an buatsaih ṭhin hi a felfai a, a quality a, ‘Mizoram’ chawia a hming sak a nihna hi ngaihsan awm ka ti. Ka fate Delhi lama lehkha zira an awm ve lai pawhin, an inah Mizoram Calendar ngei hi tar se tiin ka thawn ve hram hram ṭhin.
Chuti taka ka ngaihsan leh khel loa kum engemaw zat ka lo lei ve ṭhin chu engtik lai emaw aṭang khan a lem, thlalak tarlan duhthawh luat avanga chiri taka tarlan a awm ta fo mai a. A lem tarlan duhthawh luat avanga te tak te te tar lan ṭeuh hian a hlutna leh ngaihsanawmna a tiboin ka hria.
Entirnan kumin 2015 January thlaa sawrkar hmalakna pawimawh tak mai NLUP Govt’s Flagship programme tarlan nana an rawn hman ang chin te hian Mizoram Calendar hmel mawina a tibawrhbang tlatin ka hria. NLUP Govt’s Flagship programme lam hi chu ziakin kan hmu tam tawk hlein ka hria (a hlawhtlinna leh hlawhchhamna chu thu dang ni se) kan Chief Minister ni ngun ber leh ni rei ber kan chawimawi duh a nih pawhin amah Pu Lal Thanhawla thlalak hi fiah felfai taka tar lan ni mai se, tun an thik lo ang.
Chuti ni lo a, zo bawng, vawkpui no hruai (hnute hne lai) leh hmun tin kil tin bal leh ṭawphnawk tinreng kan hawl faina hmun phiah tel te leh kan Chief Minister zahawm tak han thlun pawlh hi chu a uihawm deuh lo maw? March (Vauthla) a Chapchar Kut (2014) hlim thla an rawn tar lan chiri lutuk te, July (Vawkhniahzawn) thlaa an tarlan ‘Kawtchhuah Ropui’ ropui tak mai, thlalak an tarlan fiahfai lo lutuk te hi a pawi ka ti.
Mizoram Calendar te, Department hrang hrang te, Kohhran hrang hrang leh mimal sumdawng liante pawhin Calendar hi kan la sawi zel dawn. A lem, thlalak tarlan dan hian Calendar mawina leh zahawmna hi a keng tel tlat a ni tih hi i hre reng ang u.