CAPITAL PUNISHMENT DAN HMANGA NUNNA IN LAKSAK HI

Mikhail Gorbachev-a kaih­hruaina hnuaia Commu­nist kulhpui - USSR a chim a, kum 1991 aṭanga India ramin a economic system a thlak aṭang chiah khan kan ramah hmasawnna nasa takin a lo luang lut nghal a. Chumiin a rah chhuah IT hmasawnna chuan kan ram leilung pawh a lo thleng thuai a. Social Networking lar zual Facebook leh Whatsapp-in min rawn luhchilh tirh aṭanga tawha a hmangtu tena thil sual titute chunga an ṭawngka chhuak awm fo ṭhin chu ‘Khailum rawh se,’ ‘That ve nghal ang u’ tihte hi a ni nawk hlawm a.

Hemi ‘Dan anga mihring nunna inlaksak’ chungchang hi kan ram legal system leh Lal Isuan nun dan ṭha min zirtir dan nen a inrem chiah em tih hi ngaihtuahho atan ka rawn chhawpchhuak dawn a ni.

‘Capital Punishment’ hi ‘Death Penalty’ tia sawi ṭhin a ni bawk. A awmzia ber chu Dan hmanga nunna inlaksak tihna a ni ber. Khawvel huapa mihring dikna leh chanvo humhimtu pawl Amnesty International-ten kum 2012-a an tarlan dan chuan he hremna dan hi khawvel ram 141 te chuan an titawp tawh a. Tunhnai kum 2/1 kal ta vel pawh khan ram ṭhenkhat chuan an titawp nual bawk a ni awm a. Amaherawhchu, mak tak maiin kan ram erawh chuan he hremna dan hi kan la peih fel ve chiah lo a. Court sang ber, Supreme Court-in Bachan Singh v. State of Punjab (1980) 2 SCC 684 thubuaia thuremna a siam danah chuan ‘rarest of the rare case’ (thil tihsual uchuak) ah chuan he nunna inlaksak theihna dan hi la hman a ni ang a ti a. Mahse, eng nge ‘rarest of the rare’ tih tak erawh chu a tlachawpa ngaihtuah atan a dah a ni.

He hremna dan hian Indian Legal system leh International Humanitarian Law a kalh em tih hi tun hma aṭang tawh khan Juris­prudence lama kan mi thiamte zingah inhnialna vawi tam tak a chawk chhuak tawh a. Tunlaia an chai nasat berte zinga pakhat pawh a ni.

Kan ram Legal system innghahna bulpui ber pakhat chu British legal system a ni a. British Constitution hi codified (phuah rem) loh a nih avangin Unwritten Constitution tia sawi ṭhin a ni a. An innghahna bul ber chu ‘Natural Law’ (Principles of Natural Justice) a ni.

Hemi Natural Law kan tih hi khawi aṭanga inṭan nge ni a, Principles of Natural Justice thuthlung hi khawi aṭanga irhchhuak nge a nih kan tih chuan kan ‘Bible’ hi a ni. Jurist ṭhenkhat leh Political thinker ṭhenkhatten he Bible aṭanga irhchhuak a nihna hi an thuziakah hmaih lui fo ṭhin mah se, an thinlung erawh chuan a pawm tlat thung a rinawm.

Chuti a nih tak siah chuan kan Bible zirtirna hian he ‘Capital Punishment’ hremna dan hi a lo remti reng em, Lal Isuan nun dan ṭha min zirtir dan nen khan a inkalh em, a inrem thei ang em tih hi zawhna pawimawh tak a ni ta. Kan Theologian-te khan he zawhna hi lo chhang hlawm thei se la a lawmawm ngawt ang. Kan ram Danpuia Art. 13 (2) in min kawhhmuh dan chuan Parliament emaw Legislative Assembly emaw eng pawl emaw pawhin Constitution emaw a bik takin kan Funda­mental Rights emaw a kalh chuan Constitution chu a dingchang zawk tur a ni a. Chutiang bawkin kan Constitition emaw tuna kan legal system kalpui mek hian Constitutionalism nihphung a kalh a, Law of Nature (Principles of Natural Justice) a kalh nia kan hriat phawt chuan Court sang zawkah kan thlen ve thei tho tih pawh hi mitin hian kan hriat a ṭha.

India ram hmun hrang hranga Mizo hnahthlak, Dan (LL.B/ LL.M/ LL.D) zirlai leh zirchuak hlim deuhte hian inkungkaihna kan nei ṭha angreng hle a, kan inhre pawh deuh vek bawk a. Hemi chungchang pawh hi zan tam internet kaltlangin kan sawiho bakah questionnaire te kan siamho ṭhin a. Kan zingah chuan he ‘Capital Punishment’ hi thlawp leh ṭha ti kan awm mang miah lo a, kan duh lo tlang hlawm viau bawk. Chutihlai erawh chuan Dan zirna lama inhnamhnawih ve chiah lem lo, Dan thlirna tarmit aṭang bika ‘layman’ tiha auh theih turte zingah chuan ‘Capital Punishment’ thlawp leh ṭha ti hi an awm nuk thung. Hei hi thil mak ve tak chu a ni.

A thu tlangkawmnana ka rawn uar duh ber erawh chu he ‘Capital Punishment’ kalphung hi thil finthlak ber a ni em, nunna nunna veka thleng tum hi thil ṭha ber a ni ang em, nunna siamtu chu Pathian a ni a, mihring tena chu nunna hlu tak chu Dan ang thlapa kan lo tih tawp sak ve ringawt hi thil dik ber a ni dawn em ni? Tuna kan ramin kan la kalpui mek zelte hi, kan ram Danpui innghahna bul ber, Principles of Natural Justice bawhchhiatna a ni ve tho em, a bulthum ‘Bible’ zirtirna nen a inrem em tih hi mitin inzawt ila.

A bik takin kan Theolo­gian-te khan he zawhna hi rawn chhang hram teh u.