Aizawl khawpuiah hian...

Aizawl khawpui chhungah hian hna avangin lirthei hmangin ka chhuakvak tam ve viau a, ngaimawhawm leh mit tikham eng eng emaw ka hmu fo a, chungte chu sawi chhuah ka duh. Ka sawi turte hi mi dang pawhin an hmuh ve fo ang a, an ngaimawh ve ṭhin ka ring. Chuvangin, mi tinin inenfiah nan hmang thei ila ka duh hle mai.

1. Aizawl khawpuia kawngpui penhleh deuh chu sawi loh, tlangdung kawngpuiah hian motor aṭanga kawngpuia bawlhhlawh paih chhuak mai mai hmuh an la tam hle. Private motor, taxi, maxicab leh city bus-te a ni vek mai. Motor chhung aṭanga bawlhhlawh paih chhuah hi a mawi lo tak zet a, a ṭhing bawk. Motor changkang tak tak kan neih rual hian kan rilru leh kan chet dante pawh kan tihchangkan tel ve a ngai.

Mi ṭhenkhat phei chuan motor chhung aṭangin kawngpuiah chil an chhak ṭhin. Hei phei hi chu a ṭhing lehzual a, a ṭawp a, a tenawm bawk. A nihna takah chuan mi hmuha 'Ka changkang lo hle' tih lantirna mai a ni. Motor chhung aṭangin khawpui chhung kawngpuiah bawlhhlawh chi hrang hrang, kuhva eina panhnah tereuhte thlengin i paih tawh lo teh ang u. Tifaitu kan ni thei lo hlawm; tihnawktu tal chu i ni lo tlang ang u.

2. Motor khalh chunga mobile phone hmang hmuh tur an tam. Motor khalh chunga phone hman hi danin a khap a ni a, man theih leh pawisa chawitir theih a ni. Phone hmang chunga motor an khalh hian mi dang a tibuai loah an ngai ṭhin a ni mai thei. Mahse, rilru an pek loh phah ni ngeiin a lang, an khalh danah a hriat fo. Chuvangin, motor khalh chung chuan phone hmang tawh lo ang u; pawimawh bik a awm a nih chuan kawng sirah din mai tur a ni. Chumi pawh a remchang mai lo a nih chuan remchang hmasa berah din a, call back mai tur a ni. Motor khalh chunga phone hmangte hi traffic police-te pawhin enliam mai mai lo se, man nghal mai an hreh a nih pawhin zilh ṭhin se, phone hmang lo turin hrilh ṭhin se a ṭha ang.

3. Tunlai chu fûr a ni a, ruah a sûr duh hle. Kan kawngpuite pawh a huh deuh reng a, hmun tam takah tui a luang a, tui a tling bawk ṭhin. Two wheeler, a bikin bike zingah a ke hnung lama mud-guard nei mumal lo, a hnunga chuangte a bike ke hnungin a phiah per ka hmu nual tawh. Bakah, an hnunga tlante tan an ngeiawm em em bawk. Fur lai a ni a, mud-guard nei mumal lo leh mud-guard tê lutuk bike khalhtute an fimkhur a ngai tak zet. Traffic lam pawhin mud-guard ṭha tak vuah vek tura ngenna/hriattirna an chhuah tawh kha i hre reng ang u.

- Zodinsanga