Hnam puan chungchang

Mizote hi hnamah kan chiang lo niin ka hre ṭhin. Kan hnam puan, ni bîk leh hun bîk nei vek, a sin/veng/khim thei chin awm hrang thliah, kût ni vangthlaa kan hman, lal leh hnamchawm thleng thliar hrang thei, kan Mizo puan heti tak maia kan han suasam ṭhin hi chu pawi ka ti.

Sawrkar term hmasa khan Tawlhlohpuan kha Chennai-a Mizo thi rawn phur chhotu vaipa te kha an lo bahtir tawh (chumi lo pawh chu awmin ka hria, ka chiang vek lo). Khami ṭum pawh khan ka thîkthu a chhiain ka lo dem hle tawh a ni.

Tun ṭumah hian kan Chief Minister chuan vaipa te inneih thilpek tuam mawi nan thangchhuah diar a hmang ve leh a; a dawngtute hi hrilh fiah hmasak zet loh phei chuan puan ṭial satliah ve maiah an ngai thei ang. Lo hrilh fiah hle pawh ni se, an tan eng nge a ṭangkaina leh a hlut viau chhan tur ni ang le? Sari ni ta se, an hlut viau zawk ang em? Nge ni a, kan CM hian khawvel mite hmuhah kan hnam puan hlu hi a tilang ve duh hrim hrim? Hetih lai hian, opposition party-te mit a lo timîm ve hle bawk a. Party ang zawng phei chuan tu mah indem thei an awmin ka hre lo. Mahse, kei chuan ka dem tlat che u.

TAWLHLOH PUAN: Tawlhloh puan hi a mawi em em. Puan dumah a sen leh engin khêl zâwn, mawng zâwn leh hma lamah inṭial thlain, a rawng thlâk a fuhin kan pi pute mit finzia a lang thei.

A pawimawhna :

Mizote, kan pi pute kha indo ṭhin an ni a, mahni khaw ṭhenawmte pawh do zêl mai an ni. Chutianga an indo chânga hnehna chang, tlangval huaisen, râl hmatâwngte kha Tawlhlohpuan an lo bàn ṭhin a ni. Hetianga kan pi pute aṭanga kan hnam ro, kan puan hi keini'n kan roh loh chuan hnam dangin min rohsak dawn lo a ni.

THANGCHHUAH DIAR: Thangchhuah diar pawh hi tawlhlohpuan ang bawka puan duma a eng leh sena ṭial a ni a, a dung leh vâng zâwnga ṭial a ni. Diar a nih angin a puan hi a lian lo.

A pawimawhna :

Hmanlai kan pi pute inelna leh an nih tum ber zinga mi chu ‘thangchhuah’ a ni. Thangchhuah tur hian ram lam leh in lamah thang a chhuah theih ve ve a, ram lam emaw, in lam emawa thangchhuah nu leh pate kha lal tluk deuh thawthângin an ropui a, an zah a, chawimawi nan ‘thangchhuah diar’ an khimtir ṭhin. Mizote tan a hluin a pawimawh êm êm a ni.

Tunlaiah chuan puan tahtute'n tahin mipa hoin kawrahte hâin sikul leh office ṭhenkhat leh ni bîk kan neihahte an ha ṭhin a, a mawi hle. Hetih lai hian, kan hman dan ṭhenkhat hi chuan kan puan ro leh hlu tak hi kan tikhawlo zo niin ka hria.

Aw le, kan ram leh hnam chhan a, humhalhna atan hian eng hi nge pawimawh ber ang le? Ramri, ṭawng, kan hnam thuam, kan nunphung, ruihhlo, sakhua... Hengte hi pakhat mah hlamchhiah tur awm lovin ngaihthah theih an ni lo vek a ni. Pakhat kan lâk vung a, a dang kan hlamchhiah si chuan kan hnam hian tlakchham a nei tho tho dawn.

Chuvangin, a vaiah khian ṭan kan la vek thei lo a nih pawhin, kan ban phâk tâwk ṭheuh leh kan theihna chin chinah hma i la zêl ang u. Kâ maiin ram leh hnam hi humhalh lovin, a tak takin i humhalh ang u.

- Tharbawihi Colney